als erschtes ein wichtiger Hinweis :
noch moine Redd braucht ihr net long suche,
om Kerwehaisl gibt’s foine Kaffe un Kuche.
Jetzt kema ohfonge…
Isch grüss eisch all die ihr kumme seit,
bei diesem (scheene Wetter oder miese Wetter) heit,
isch grüss eisch junge un eisch alte,
die ihr heit wart nimme zu halte,
misch hier uff dere Brigg zu sehn,
es isses letschte mol,isch konns verstehn,
die Kron wird halt verkauft,es gibt kein zurick,
awer wo is donn die Kerwereddbrick,?
Was bringt uns die Zukunft,ma stellt sisch des vor,
von wo predischt moin Nachfolger im nächschte Johr?
om alte Rothaus vielleischt,wer weiss das schon,
oder do unne im Altershoim uffem Balkon,
beim Winde Erwin im Hof,dass es rischtisch schee schallt,
oder vielleischt uffem Kreizberg im Wald,
vom Turm von Laurentius,dass ihr de Parre all schee seht,
awer donn moone unser Türke,de Mujezzin rieft zum Gebet,
oder im Weste im Kiefernweg bei de roigeplackte,
nur DIE wolle ihr Ruh hawe,des sin halt emol Fakte.
Drum mach isch jetzt in vorschlag,du misch a net geniern,
ihr kennt den von mir aus a all kritisiern,
isch det on unserm neie Biergaate ohne zu zage,
moi Kerwepredigt a heit schun vortrage,
was der uff die Boo gstellt hot,isch sags ohne Spott,
isses beschte was Hemschbach grad zu biete hot,
wenns regnt könne ma in de neie Saal un dozu sag isch nur,
do wern ma donn genau rischtisch,denn die Hemschbescher Kerwe is KULTUR.
Jetzt muss isch erscht mol moi Stimmbänder öle,
drum kipp isch was nasses in moi Kehle,
Prost

Unser Zehntscheier do drunne,die sieht vielleischt aus,
verwahrlost,vergommelt,es is escht en Graus,
des Hemschbescher Schmuckstück gibt ohne Frage,
fascht jedenTag in Grund zum Klage.
Do drunne könnt ma escht was draus mache,
un isch sag eisch jetzt was,do wird ehr glei Lache,
sou wies jetzt aussieht,des wär doch net bled,
wär gut,wenn mas als <dschungelcamp nutze det.
De Daniel Kübelbeck macht bestimmt wirra mit,
mit em Pauli als Konkurrent,des wär doch en Hit,
unsa Stadträt könnte sisch dort mol messe,
statt Steaks ä paar Kakerlake esse,
un RNF dut täglisch berischte,
de Rhoine Kurt derf Streitereie schlichte,
un wers nimme aushält zwische Ratte un re Maus,
der schluchzt in die Kamera – isch will hier wirra raus.
Des is hier die Lösung- is reine Tatsache,
was besseres konn ma aus dem Dreckloch nimme mache.
Isch tu jetzt moin Bescher on de Mund mol lenke,
bei de Zehntscheuer konn ma fascht net positiv denke.

Es gibt Weiber,des is net geheuer,
die sollte niemols hinners Steuer.
Ihr kennt se all,des is in Fetza,
die Petra vun de Schnawwelwetza,
schun letschtes Johr hot se ungeniert,
in de Wascholag ihr Auto demoliert.
Un letscht do fährt se,isch was net warum,
mit ihrm Monn im Wald herum.
Warum die do gfahrn sin, was isch a net sou rischtisch,
awer isch denk emol,des is gar net sou wischtisch,
Sie wollt,hot ma sou was bledes schun gsehn,
mitte uffem Waldweg des Auto rumdrehn,
un fragt noch gonz vorsorglisch ihrn Monn,
ob se hier rückwärts fahre konn,
doch der war irgendwie newa de Kapp,
un säischt gonz grimmisch un gonz knapp,
du bischt vielleischt ä bledes Stück,
jetzt geb halt Gas un setz zurück.
Des hot se rischtisch Brav gemacht,
doch donn hots fürchterlisch gekracht,
do helfe ko Träne un a ko Gezeter,
denn ungfähr siebzisch Zentimeter,
ragt in Baumstamm in de Kofferraum noi,
dort war alles kaputt,des war werklisch net foi.
Jetzt war der Karsch vun hinne nimme schee,
nur die Türn un die Vorderfront war noch ok.
Vielleischt hot ses gewollt,un des war gonz gschickt,
dass se demnächst ä neies Auto kriegt.
Isch brauch jetzt in Schluck – isch tu net nur schenne
Es gibt a noch Fraue,die Auto fahrn kenne.

Hab isch eisch des schun gsat ?
noch moine Redd braucht ihr net long suche,
om Kerwehaisl gibt’s foine Kaffe un Kuche.
Monsche Leit,un des is schlescht,
dene macht ma gar nix rescht,
die maule un könne domit net lewe,
dass mir jetzt vier Frisöre in de Bachgass häwe,
a wenn die sisch des Maul zerreise,
isch wird eisch hier jetzt mol beweise,
dass unser Friseure,ihr braucht net zu gaffe,
all die Arweit allo gar net schaffe.
In unsere Stadt,glabt es mir,
lewe 12500 Mensche hier,
bei dene all,un des is wohr,
wachse uff de Köpp viel Hoa.
Es is erwiese,isch mach jetzt ko Faxe,
sou ä Hoa dut täglisch ä drittel milimeter wachse.
Ä weitere Bereschnung sagt uns jetzt,
dass des Hoa im Monat zehn Milimeter wächst.
un weil ma halt schee soin will un gepflegt,
wird sisch halt alle Monat zum Friseur bewegt.
12000 Hemschbescher, ziegt ma die Glatzköpp mol ab,
renne monatlisch zum Frisör im Trab,
un reschnt ma weiter do merkt ma im Nu,
Sunndags un Montags häwe die Friseurgschäfte zu,
do kimmscht zum Ergebnis,es stimmt was isch jetzt sag,
circa 500 Leit wolle zum Friseur jeden Tag.
Jetzt frog isch eisch,-ihr braucht gar net zu gaffe,
wie solle des die vier Läde in de Bachgasse blous schaffe.
Als Fazit konn isch eisch nur noch erzehle,
dass bei uns noch mindestens fünf Frisörgschäfte fehle.
Isch trink mol in Schluck un stell grad fest,
isch bin schun ä Weil nimme beim Frisör gewest.

Uffem Matheisemarkt in Schriese,korz hinna Leitershause,
wern on oom Dag Bojemoschta gelade un a onnere Banause,
die laafe iwwer de Feschtplatz,fühle sisch mol rischtisch frei,
unsern Pauli hot noch die Woiköniginne dobei,
om Rieserad,hot er die Hond gehoben,
säischt ihr Mädels,- mir schwebe jetzt mol nach oben,
doch als er donn owe runna guckt,o weh un Ach,
wird unsern starke Bojemoschter uff omol gonz schwach,
wird Käsisch un greift sisch on soi Herz,
die Elena fleht,Volker mach jetzt ko Ferz,
de Volka mont jetzt,isch glab isch wird alt,
un hot was vun Herzrhythmusstörunge gelallt,
donn hot er sisch,isch mach jetzt werklisch ko Bosse,
hoch iwwa Schriese,von de vier Grazie bemuttern losse.
Wenn ihr misch frogt liewe Kerwegäst,
is des do owe puri Ongscht gewest,
in Monn der als Bungee Jamping springt,
im Rieserad mit de Fassung ringt,
hot entweder zuviel gsoffe,do isses om schlecht im Nu,
oder er geht mit Rieseschritte uffs Altershoim zu.
Isch trink uff unsern Bojemoschter,glabt mirs ehr Leit,
des mitem Altershoim is bei dem noch längscht net sou weit..

Hawe mir om Haisel Platz fa sou viel Leit?
noch moine Redd braucht ihr net long suche,
om Kerwehaisl gibt’s foine Kaffe un Kuche.
Unser Kerwe Chronischt Wilhelm,sou konns monschmol gehn,
will mitem Kronauers Hoinz ä Baustell begehn,
doch de Hoinz,der macht monschmol sou Bosse,
hot de Termin uff de Baustell ofach sause losse.
De Markus fährt zum Hoinz soim Büro,sieht leer is soin Sitz,
un vun irgend oom Termin was do kona nix,
jetzt rieft de Chronischt mit soim Händy o,
un prompt war de Hoinz om onnere End dro,
er dut sisch sofort Entschuldige un soo,
säischt er sitzt grad mit Diarrhoe uffem Kloo,
De Markus mont Dünnschiss geht om arg on die Knoche,
un monschmol dauert sou was fascht zwa Woche,
ach sou schlimm isses net,mont de Hoinz donn glei
un moje is des bestimmt a wirra vorbei,
säischt er hot blous Sauerkraut gesse un dozu Appelsaft getrunke,
ehr Leit des hot sogar dorschs Telefon gschtunke.
Ja Sauerkraut un Appelsaft,
sogar den stärkste Monn mol schafft.
Isch heb jetzt moin Bescher,dess mach isch mol heit,
un trink uff alle Hemschbescher kronke Leit.
Was machte die neulisch fa longe Gsischter,
die Vorständ von de Karnikkel –Züchter,
de Kassier vum Vaoin wird schon longsom verrickt,
die Stadt will Geld für Wasser,fa cirka hunnert Kubik.
Er rechnt un rechnt un säischt donn noch,
isch glab unser Wasserleitung hot ä Loch,
un de Vorstond mont noch,- o Mensch Meier,
des Loch zu suche,des wird vielleischt deier,
do hilft nur de Robert Reitermann,
der muss mit soiner Wünschelrute ran.
Der hots a gfune,- die grawe do unne,
un was finne die do,in verschüttete Brunne,
koo Rohr,- koo Loch,- un a kon Bruch,
do häwe se a nimme weiter gsucht.
Die kriege jetzt ä neies Rohr verlegt,
wu sisch s Wasser rischtisch dorschbewegt,
un wisse jetzt schun gonz bestimmt,
dass ko üwerhöhti Reschnung mehr kimmt.
Kumm Mundschenk schenk oi,isch derf net vergesse,
isch muss a wirra mol in Hasebrote esse.

Was isch noch sage wollt,
noch moine Redd braucht ihr net long suche,
om Kerwehaisl gibt’s foine Kaffe un Kuche.
Wenn ma Rentner is konn ma sou einiges mache,
ä Kart ab seschzisch un lauter sou Sache,
Vier Freundinne nutze des,sie warn schun ziemlisch weit,
ma hot jo nix zu tun,-ma hot halt viel Zeit.
Es war erscht letscht,die Sunn hot ne de Dag versüsst,
do sin se mitem Zug bis ins Elsass gedüst,
awer wenn ma long sitzt,des wird monscher wisse,
muss ma halt a mol öfter pisse,
in weissenburg do tun se des Plone,
sie finne ä toilett mit alle Schikone,
alles hochmodern, awer es koscht dreissisch Cent,
schun üwerlege die vier,wie ma des Geld spare kennt.
Die erscht bezahlt noch un säischt zu de onnere Alte,
wenn isch rauskumm tu isch ofach die Tür uffhalte,
sou häwe ses gemacht un des war bescheuert,
denn dieses Klo war Computergesteuert,
wenn do ko Geld kimmt,un s fällt doch was in die Schüssel
kimmt ä Generalroinischung,sou schnell wie ä Wiesel,
die Tür wird verschlosse,des Lischt geht aus,
aus acht Düse kimmt Schaum un Wasser raus,
zum schluss wird der Raum noch desinfiziert,
unser Frau war noch drin,die war vielleischt verschmiert,
erscht als alles sauber war,un frisch versiegelt,
wurd automatisch die Tür wieder entriegelt.
Fascht heulend kimmt unser Mädsche ausem Klo gekroche,
war patschnass un hot stark noch Meister Propper geroche.
Doch wenn ihr jetzt glabt,die hätte do draus was kapiert,
bei de onnere zwa ist donn des selwe passiert.
Donn sieht ma die viere uff re Bonk donn Hocke,
un zwei warn erscht noch ä paar Stund halbwegs trocke,
hewe nix erlebt,un fahrn glei wirra hom, die vier Holde,
nur weil se zu geizisch warn,un fürs pinkeln nix bezahle wollte.
Kumm Mundschenk loss de Kopp net sinke,
isch will emol uff unser Hemschbescha Frührentner trinke.

Letschdes Johr saischt zu de Mutter ä Maid,
isch will desjohr heiern,im Herbscht isses so weit,
im September im alte Rothaus mit siebzisch Gäschte,
im Oktober in de Kersch un jetzt kimmts Beschte,
die kerschlisch Trauung is on de Nordsee,ohne Stress,
un on doim 60ste Geburtstag montse noch kess.
Somstags im Oktober kumme se dort o,
die kerschlisch Trauung war Mittwochs dro,
alles war beschtens ,des Wetter war gut,
nur wenn se on die Hochzisch denkt, verlässt die Mutter de Mut,
sie sucht nämlisch seit drei Dag gonz gezielt,
irgend jemond der in de Kersch die Orgel spielt,
oder flötet oder singt,
irgendwas halt,wu ä bissel feierlisch klingt.
Owends vor de Trauung hockt se im Hotel,fängt fascht o zu flenne,
hätt die net in Hemschbach kerschlisch Heiern könne,
mit dem Markus on de Orgel,de Chor singt Mozart un Bach,
wenn se nur do dro denkt wern re die Knie gonz schwach.
Plötzlisch kriegt se ä Info,un die war viel Wert,
fünf junge Sänger sin hier,un mache moje ä Konzert,
die singe gonz toll un nenne sisch Voice,
un dene ihrn Manager wohnt in Neuss
und mit Internet Handy un all dene moderne Sache,
konnt se die Sänger uff de Insel ausfindisch mache,
un hot mit dene per telefon um Mitternacht,
für die Trauung um zehn alles perfekt gemacht.
Die Hochzeit de Geburtstag isch sags gonz vermesse,
wird vun dene mit Sischerheit koner sou schnell vergesse.
Isch brauch jetzt en Schluck isch bin gonz gerührt,
uff die Gaby ihr Tochter un dass Ausdauer immer zu was führt.

On Sylvester des is toll,
sin unser Kersche meischtens voll
ob Katholisch,oder evangelisch,
ma pflegt Ökumene,des macht die Leit fröhlisch.
O Johr isses in Laurentius ,im nächschte Johr in Luther,
sou kimmt jeder mol dro,sou is alles in Butter
Letschtes Johr war St.Laurentius dro,
die Kersch war voll,en Haufe Leit warn do.
De evongelisch Posaunechor war im Altarraum gsesse,
uffm Winde Markus soim Zettel hot ma die Posaune glatt vergesse,
die häwe trotzdem schee gspielt,vun owe hot de Kerschechor gsunge,
de Leit hots gfalle,sou war der Gottesdienscht gelunge.
Noch de Kersch stellt sisch awer schnell raus,
de Posaunechor war im falsche Haus.
Beim Ullmer sollte se spiele des is jo a gut,
sie häwe den halt in Hemschbach vermut,
nur der war in Sulzbach gonz elo,
ko Orgel – kon Chor – ko Posaune warn do.
Sou war de Parre in Sulzbach Alleinunterhalter,
er hot jo noch ä kräftischi Stimm fa soi Alter,
un de Pfliegensdörfer was jetzt,ma lernt jo nie aus,
de Parre Ullmer is in drei Pfarreie zu Haus.
Isch trink uff de Posaunechor,des is ma jetzt wischtisch,
heit moje in de Kersch,do warn se genau rischtisch.

Im BIZ do hot ma ,isch mach jetzt ko Bosse,
die Sporthall renoviere losse.
Mit schwerem Gerät dut ma de Bode löse,
ma macht die Türe uff,weils halt Staub gibt beim Fräse.
Die Schüler hawe noch Luft all gschnappt,
die Lehrer sin dorsch de Newel gedappt,
Computer warn verdreckt,s war alles ergraut,
ma hot dene gsagt, sou isses halt,wenn ma baut.
Jetzt isse fertisch,doch wenn ma noigeht mont ma, ma wär meschugge,
ma dut nur uff en Haufe Linie gucke.
Wu immer hiegeht in de Hall doin Blick,
lauter Linie un Kreise aus Mosaik,
fa Basketball,Hondball,Volleyball un sou weiter,
macht ma Linie in die Hall,ehr Leit,des wird heiter,
in de Eck ä longes Feld, die Schüler findes Cool,
ma vermut jetzt in dere Eck spielt ma Boule.
es is a bis jetzt noch net geklärt,
zu welsche Sportart welsche Linie ghört.
Wahrschoinlisch hot des a de Bojemoschta verwirrt,
er hot grad de Realschüler zum Abi gratuliert.
Beim nägschte Turnier könnt ihr misch do hinne sehn,
den Disput mit dene Linie loss isch mir net entgehn.
Isch brauch jetzt in Schluck, do kenn isch nix,
trink uff die neverending Story vum BIZ

Hemschbach 46/47er Schulkamerade,
tun jedes Johr zu nem Ausflug oilade,
sou häwe se schun viel vun de Heimat gseh,
ma is halt gern Beisomme,s is a immer schee.
Onem Dag im September sin se wirra gfahrn,
Idar Oberstein un Umgebung, stand uffem Plan,
De Bus fahrer stellt sisch vor,soin Name war Schorsch,
er war jo nimme de allerjüngschte Borsch,
Nach Idar Owersto wollt ihr, stellt eisch emol vor,
do bin isch schun gfahrn vor verzisch Johr.
Des häwe se gemerkt als se dort oigetroffe,
der Kerl is do rumgegurkt als wär er besoffe,
die im Bus häwe longsom mit de Fassung gerunge,
de Schorsch hot ofach des Edelsteinmuseum net gfune.
Ooni nimmt ihr Handy,hots Museum ogeklingelt,
derweil is de Schorsch dorsch die Vororte getingelt,
natürlisch kame se zu spät,es hot jeder beklagt,
ma hot die Grupp im Eiltempo durchs Museum gejagt.
Noch em Mittagesse donn,jetzt wars nimme heiter,
do ging die Irrfahrt grad sou weiter,
ä kloni Umleitung,des lässt de Schorsch kalt,
er fährt die Grupp jetzt direkt in de Wald.
Irgendwonn häwe se noch Bad Münster erreicht,
die Zeit dort hot grad für en Kaffee gereicht.
Von dem sonnische Dag,isch kum jetzt zum Schluss,
warn der Hemschbescher Johrgong cirka acht Stun im Bus.
Komm Mundschenk,loss de Kopp net sinke,
isch tu mol uff de 46/47er Johrgong trinke.

Unser Rothaus wird endlisch renoviert,
un dass de Akte nix passiert,
hot ma die komplett ausgeromt,
hot gschafft,gewirkt un net getromt,
hot Kischte gschleppt – Akte getrage,
üwer Arbeitsmangel konnt sisch koona beklage.
Beim Pohl hilft en Vollzugsbeomter – gonz beflisse,
doch plötzlisch is dem die Hos uffgerisse,
ä grousses Loch war von hinne zu sehn,
um ä gonzi Hos ozuziehe,wollt er grad gehen,
doch des hot de Thomas glei abgewend.
Saischt du bleibscht jetzt do,du fehlscht uns om End.
Un mach jetzt hier ko grosses Gschiss,
wege dere alte Hos un dem klone Riss.
Doch de Riss in de Hos wurd immer breiter,
doch de Kai derf net hom,es geht munter weiter,
immer öfter hot er sisch in die Ecke verdrückt,
un hot sisch a nimme sou arg gebückt,
hot Ongscht ghat,dass die Unnerhos a noch macht peng,
die war em nämlisch a ä bissel eng.
Um halwa achte,er hots fascht net geglaubt,
hotem de Thomas des Homgehn erlaubt
un säischt noch,mach moje früh jo ko Bosse,
du kimmscht nur noch mit Latex oder Gummihosse.
Isch trink jetzt emol uff all die Gestalte,
die bei uns uffem Rothaus schalte un walte.

Bevor ihr des vergesst,
noch moine Redd braucht ihr net long suche,
om Kerwehaisl gibt’s foine Kaffe un Kuche.
Ein jeder Mensch,des is doch klar,
der braucht ä Hobby,- Wunderbar.
Ein Hemschbescher liebt soi Hobby sehr,
is im Spielmonnszug bei de Feierwehr,
a sieht man ihn nun schon seit Jahre,
uffem Motorrad dorsch die Gegend fahre,
do fühlt er sisch so rischtisch frei,
un Freunde sin oft a dobei.
Letscht warn se unerwegs,mache donn mol in Halt,
die Sunn hot gschoint,es war net kalt,
donn fahrn se weiter,des war vermesse,
die häwe glatt ehrn Freund vergesse,
der nimmt des alles net so schwer,
un fährt gonz flott glei hinerher,
er hot se fascht oigholt un grinst verschmitzt,
do hots uff omol dreimol geblitzt,
er guckt uff de Tacho,un was donn,
das er jetzt bal laafe konn.
200kmh is er nämlisch gfahrn,
un zwar im Ourewald – net uff de Autobahn.
Un wisst ihr do unne,was in dem Fall passiert?
De Führerschoi wird oikassiert.
Zu diesem Thema tu isch kund,
laafe is doch a gonz gsund.
Für de Spielmannszug isses gut,isch sags ohne Spott,
weil der jetzt viel mehr Zeit zum üwe hot.
Isch trink jetzt emol,mir werds schun gonz warm,
mit moim Motorrad konn isch nur achzisch fahrn.

Fascht jeder Veroin macht Ausflüg,mit Monn un Maus,
un de TV. schliesst sisch do a net aus,
sie warn unnerwegs, un dess war toll,
der grousse Bus war proppevoll,
der Busfahrer macht irgendwonn mol ä Paus,
un lässt die Monnschaft on re Raststätte raus.
Ma muss mol uffs Klo, un will a mol was esse,
un beim TV. isses genau so gewese.
Noch re Weil geht’s weiter,do wird net long gfackelt,
die Weiwer hawe mitnonna gschnacklt,
uff omol säischt oni herrieh,
isch konn moin Alte gar net seh,
im Bus herrscht gedränge,sie war schier umzingelt,
also hot se ihn uff soim Handy ogeklingelt,
der meld sisch sofort un hot vielleischt gflucht,
er hot uffem Rastplatz den Bus dort noch gsucht,
der gute Fahrer, er war jo net bled,
hot on de nächschte Abfahrt den Bus rumgedreht,
den Monn donn a dort gonz schnell gfunne,
was gut war,- denn als Anhalter wär er net weit kumme.
Isch trink jetzt emol,des muss ofach soin,
uff de TV. Hemschbachs gröschten Veroin.

Monsche Leit bei uns die sin net im Bild,
die glawe de CHRISTO häts Rothaus verhüllt,
eisch sag isch jetzt,dass ihr des kapiert,
des alte Gemäuer wird endlisch renoviert.
Als erschten Schritt,damit des endlisch was werd
gabs des neie Nebengebäude,des war net verkehrt,
die Polizei is a in dem schene Haus,
un isch denk emol,des sieht gonz gut aus.
Es is donn oigeweiht worn,doch in dere Nacht,
hots om Himmel ordentlisch gekracht,
de Bojemoschter kimmt mitem Ozug un frisch rasiert,
do kriegt er die Meldung,es is was passiert,
die Arbeiter,die häwe,des war schun vermesse,
om Kellerschacht de PU. Schoum vergesse,
sou konnt sisch de Rege ohne halte,
im gonze Keller schee entfalte.
Die Männer vom Bauhof schaffe drei Stun ohne zu schenne,
sou hot ma den Bau noch oiweihe kenne.
Isch sag mol ehr Leit,monscher hot jo ko Geduld,
mont bei allem un jedem, die vun de Stadt sin Schuld,
ziehe iwwer de Pauli un die Verwaltung her,
weil,- schenne fällt jo niemond schwer.
Also hört doch emol uff die Leit dort zu nerve,
un die Verwaltung ewisch mit Dreck zu bewerfe,
die mache ehrn Job gut,des is jetzt mol Sache,
ma konns doch halt net immer jedem Rescht mache.
Un wenn unsern Bojemoschter gonz verkehrt,
für ä Sitzung,die in Woinem is,- nach Monnem fährt,
do fällt mir nur noch dozu oi,
es is werklisch net leischt,Bojemoschta zu soi.

Isch trink jetzt emol,- do braucht ihr net zu gaffe,
uff de Pauli ,un all die wu für unsa Hemschbach schaffe.

Jetzt sag ischs awer zum lezschte mol,
noch moine Redd braucht ihr net long suche,
om Kerwehaisl gibt’s foine Kaffe un Kuche.
Om Bachgassefescht gibt’s,wie jedes Johr,
ä Fässl Freibier vum Pauli,stellt eisch des emol vor,
doch schoinbar wird nimme sou viel gsoffe,
der Ausschonk vum Freibier is net sou geloffe.
Weil die IG. Bachgass Bier fa Geld ausschenkt,
hot der Vorsitzende Krusch glei mol gedenkt,
isch nehm den Rest von dem Bier,s merkt jo kona,
un mach noch en Reibach,wenn a blous en klona,
als Freibier gings net,des war noch nie der Fall,
erscht als es was gekoscht hot,wars donn schnell all.
In de Presse hot de Krusch donn verlaute losse,
wenn die IG Bachgass Gewinn macht,do macht se ko Bosse,
un dut sisch a net long domit ziern,
den Gewinn on bedürftische zu üweführn,
jetzt hoff isch nur,dass de Krusch net Pennt,
un ä paar bedürftische aus Hemschbach kennt.
Zur Not ,-isch mach do jetzt ko Bosse,
konn er den Üwerschuss a mir zukumme losse.
Isch brauch jetzt in Schluck,isch kumm net umhin,
in moim Bescher is heit viel Freiwoi drin.

Jetzt will ich meine Hände
Ihr kriegt nun meinen Kerwesegen,
ihr dürft jetzt in die Kneipe flüchten,
und auch nen kleinen Streit mal schlichten.
Und tut euch auch nicht lange zieren
Mir heut mal ein Bier spendieren.
Und fangt an Kerwe nicht an zu sparen,
geht mit den Kindern Reitschul fahren
und drückt die Blase bis zum letzten
tut euch auf die Toilette sezten
und pinkelt ja nicht an die Mauer,
moi Borscht die liegen auf der Lauer
ihr Frauen reagiert nicht rüde
sind eure Jungs an Kerwe müde
lasst sie nur bis zum Montag saufen
dann gehen sie am Dienstag Blumen kaufen
tut alle im Feiern nicht erlahmen
das sagt euch euer Markus
Amen.
Wem ghört die Kerwe