Als Kerweparre grieß isch heit,

aisch Hemschbäscher un fremme Leit.

Isch grieß die Schlosser, Dreher, Schweißer,

hauptomtlische Formularverreißer.

Isch grieß die Auto-, Schuh- un Worschtverkäufer,

die hoomlische un uhoomlische Säufer.

Isch grieß die Konditore, Bäcker, Viehbarone,

Bedienunge mit – un owwe ohne.

Isch grieß die Schuster, Schneider, Dinscher,

die grouße un die kloone Pinscher.

Isch grieß die Lehrer un Doktore,

isch grieß aa die normal geborne.

Isch grieß die Richter un Schondarme,

vergeß aa nedd die geistisch Arme.

Isch grieß die Rechts- un Linksohwält,

die Leit mit un uhne Geld.

Isch grieß die Metzger aus’m Städtsche,

die schwere un die leischde Mädsche.

Isch grieß die Parre un die Küster,

die gude un die schleschde Biester.

Isch grieß die Meweltischler, Schroiner,

die arme un die reische Groiner.

Isch grieß die Bauern, Farmer, Rancher,

un aa die pälza Routwoiponscher.

Isch grieß die Ronzische un Madische,

die badische un uhsymbadische.

Isch grieß jetzt iwwahaupt konn mehr,

sondern ehr Leit jetzt hört mol her,

was im vergongene Jahre,

in unsere Stadt sisch zugetrage.

Awa erscht isch moin Becher heb,

fa all die isch vergesse heb.

 

Noch’re longe Oileidung,

iwwa misch ä korzi Vorstellung,

isch kumm aus Hemschbach, des iss klar,

verließ die Stadt mit 20 Jahr,

un fuhr zur See, so iwwa’s Meer,

damit isch mol was onares höhr.

Mit 30, ja da hat isch Glick.

Isch fand hier Arbeit, kam zurick.

isch spiel noch Hondball beim TV,

un bin de Beschde – beim graische „Au“.

Dehom moi Appolonia sprischd:

„Dicker, Du bischd nimmä discht!

Mit doine alte, morsche Knoche,

ach Gott, wie oft warn die gebroche?

Beim Dr. Jensen bischd Stommkunde,

gell, ehr häbt ä scheeni Runde?

Denn stäischd Du unna soina Türe,

do dud der schun de Gips ohrühre.“

Heit gibts koon Gips – un’s gibt koo Salbe,

heit trinke mer liewa noch in Halbe.

 

Ä paar Bekonnde vum TV,

wollte kaafe eine Sau.

Um zu zeige onre Kinnerschar,

wie früher mol ä Schlachtfeschd war.

Sie sinn ins Ried gfahrn,

mit’em Auto un em Karre,

verlade dort des Tier mit Borschde,

bezahlde was die Sau tat koschde.

Uffm Homweg, ’s dauert nedd long,

war ä Gehupe dort im Gong.

Fremme Fahrer, ihr liewe Leit,

häwwe uff den Karsch gedeit.

Sie steige aus un gucke noch,

ach was war der Schrecke groß.

Donn dem Hänger soi Klapp,

war gfalle gonz herab.

Des onnare zu rode is nedd schwer,

nädirschlisch war der Karre leer.

Ja, wu is die Sau nur hie?

Wu rennts jetzt rum des Borschdevieh?

Do häwwe sisch donn sou zwa Brave,

uff de Weg gemacht, un sinn zurickgelaafe.

Aber no, des konn nedd soin,

iwwa die Wisse rennt des bleede Schwoin.

Sie nemme die Boo donn in die Händ,

un sinn’re hinnenoch gerennt.

Als se dort sinn, mit Radau,

schmeißt sisch de Werner uff die Sau.

Häibt se feschd, die Harry kimmt,

un se mimme Strick feschtbind.

Ma hot se hordisch oigelade,

un is mit’re homgefahre.

Dort war die Freude riesengroß,

denn donn ging des Schlachtfescht los.

Isch trink uff die, die die Sau tate schlachte,

un de Kinner eine Freude machte.

 

Ihr liewe Leit! Gäit all zur Wahl,

sou hots getönt aus jedem Saal.

Ob schwarz, ob rout un des, des mon isch,

in ohm Punkt warn se sisch all ohnisch.

In Hemschbach gibts blouß ona der konns,

drum wähle ma all de Michels Hons.

Ma hott noch Kondidade gsucht,

ach Gott, wer hott sisch do versucht.

Denn korz bevor die Frist verstrische,

kame noch zwa ohgeschlische.

Der one mit ‚re nedd gonz weiße West,

in Profi im Bewerbergschäft.

Der wollt wohl als BM versuche,

soin Schuldeberg mol abzubuche.

Der onna kam, des Hern voll Ferz,

wollt baue viele Autoplätz.

Mit unserm Geld do wollde der,

oirischde in Werksverkehr.

Ja um alles in der Welt,

fa sou Krempf häwwe mer ko Geld.

Drum hemma denn gewählt, der konns,

es war halt wira de Michels Hons.

Ja, ja Hons Michel heißt er,

auf Ihr Wohl Herr Bürgermeister.

 

Noch soure Wahl s’is Tradition,

der Boijemoschda grigt en Boom.

De Bürger Anton Schwöbel sprischt,

zu soine Leit: Fastäit er misch,

er gäit mer naus, sou um die Sechse,

un schlagt ä scheenes Holzgewächse.

Ä Fischt 10 Meter denk isch mer,

die stelle ma donn vor soi Deer.

Die Stadt in tiefem Schlaf noch liegt,

die zwaa Monn ’s in de Wald naus ziegt.

Sie mache um des bissl Holz,

gäin donn hoom un sinn gonz stolz.

Un pletzlisch werd nes doch gonz komisch,

was is heit unser Stadt so trohmisch.

Sie gäin donn hi zu einer Zelle,

Herrn Schwöbel aus dem Schlof zu schelle.

Wer den Bürger Schwöbel kennt,

der waas was lous is wonn der schennt.

Er hott in soiner eigen Art,

gsagt was lous is in de Stadt.

Daß sechse owends er gemohnt,

nedd mojens, wonn noch alles trohmt.

Zu dieser Gschischt sag isch on Ton,

ein Prosit uff de Schwöbels Anton.

 

Der Boom lag nun im Mühlwegtal,

die Situation war gonz fatal.

Die Stadträt froge: „Was bassiert,

wonn jemond uns de Boom kassiert?“

Do häwwe sisch isch find des klasse,

3 Rät erklärt druff uffzubasse.

Die häwwe abwechselnd gschaut,

daß koona aa des Bemsche klaut.

Ja, ehr Stadträt pflischdbewußt,

hott ma des schun früher gewußt.

Un wer der onna Bojemoschda worn,

ja isch glaab der heed aisch donn,

des wär nadirlisch noch viel schleschder,

oigstellt als Parkplatzwäschder.

Isch stoß nedd uff aisch Stadträt oo,

ehr seid noch ä paarmol droo.

 

Wie se stelle uff den Boom,

do wollt ona gonz noch vorn.

Der hott schoins noch niemols gsehn,

irgendwu ä Bemsche stehn.

Un wie er streckt sou vor soin Zinge,

dud ona mimme Priggl winge.

Fuchdelt rum mit soure Eiselatt,

un hagt dem Fritz des Näsel platt.

Blattschuß – säigt ma bei de Jäger,

un zum allergräischde Ärga.

Mußt er noch ins Krongehaus,

fa ehn war donn der Owend aus.

Ma streckt aa nedd dohie soi Gulle,

wu die onnan schaffe wolle.

Isch nehm moin Becher un trink weiter,

uff die Glotzer, Schaffer, Schwarzarbeiter.

 

In Hemschbäscher denkt sisch, isch fahr halt aa,

nunna mol, noch Afrika.

Er packt soi Koffa, dud se verlade,

um zum Flugplatz hiezufahre.

Wie er dorschbläddert soi Babiern,

do dud er mit de Aare stiern.

De Reisepaß war abgeloffe,

soi Herz, des fällt ihm in die Hosse.

Do stand er nun der Monn – geplagt,

es war nadirlisch aa noch – Somstag.

En Ohruf long, ä Maid’sche springt,

un macht de gonz Verwaltung Wind.

Es hott geklappt, de Karl konnt fliege,

ja, ihr Lait, isch du nedd liege.

War des nedd schee gemacht vun denne,

iwwa die mer sou oft schenne?

Drum loßt misch den Becher hewe,

unser Verwaltung, die soll lewe.

 

Wißt ihr noch vergongenes Jahr,

war monscher vun uns Fernsehstar.

Do häwwe se in Film gedreht,

was sisch in unsre Stadt sou regt.

Om Freitag tat uns dieser Schinge,

wira aussem Kaschde winge.

Die Kegler, Ringer un Fußballer,

de Jet-Club als besondre Knaller.

Isch muß nix sare, ehr wißt des doch,

der Film gkehrt verbrennt im Offeloch.

Die suchte dort die Michel-Hall,

do in de Gaß, ehr wißt des all.

Doch fährt ma vun de Autobohn,

donn stäißt ma druff, was soll des donn?

Do seid ihr schlau aisch vorgekumme,

weil ihr uns uff de Arm genumme.

Mer konnde uns noch nedd mol wehrn,

sou wars gonz ohfach zu entehrn.

Drum bleibt in Moinz ehr Moinzelmänner,

macht Bilder vun de Parkplatzpenner.

Filmt doch blous noch Mickey-Maus,

donn kimmt nedd sou en Scheißdreck raus.

Isch trink uff Hemschbach moin Toast,

trinkt ihr mit uns, alla Prost.

 

 

Beklagt wird sisch mit Weh un Ach,

bleibt all hier, un kaaft in Hemschbach.

Die Geschäftsleit fihle sisch zurickgestellt,

weil alles in die Großmärkt rennt.

Doch kimmt die schee Urlaubszeit,

find ma monschmol weit un breit,

koon Lade der noch offe hott,

weil alles in de Ferie hockt.

De Ehret’s Kurt donn fahre muß,

noch Woinem, blous fa oo Glas Mus.

Sprecht aisch doch ab Fresalienhändler,

fahrt abwechselnd in ferne Länder.

Donn dud sou Ebbes nedd bassiern,

un hört mol uff zu lommediern.

Isch will schnell moinen Becher hewe,

un trink uff die, die vum drufflege lewe.

Prost ihr Klickerlesgroiner.

 

Wie schun sou oft, aa in diesem Jahr,

war vun de Katholische wira Bazar.

Mit Bier un Woi un Steaks vum Grill,

alles was de Mage will.

Sunndags, do gibt’s als Spezialität,

ä Erbsesupp, vum Club Gourmet.

Un Mondags kimmt donn noch gonz frisch,

en Kessel Wellfleisch uff de Tisch.

Doch ob Sunndag ora aa Mondag,

isch waaß nedd worons liege mag,

es longt halt nedd, ma konn nix mache,

ihr Leit, was sinn donn des fa Sache.

Isch bild ma oi, es is nedd schwer,

zu bestelle noch ä bissl mehr.

Un bleibt was iwrisch vun dem Esse,

donn seit halt doch nedd sou vermesse,

gebt’s billisch denne, die’s nädisch hawwe,

des sag isch aisch als Kerweparre.

Drum bin isch uff den Bazar gschpont,

wu Supp und Wellfleisch wira longt.

 

 

Om selwe Sunndag, sou um zehn,

do sah ma se dorschs Zelt donn gehn.

Die klone Buwe mit Babiern,

die wollte aisch doch animiern,

zu gehe do de Mihlweg nuff,

do drowwe in de neie Scheier,

hert uff des is doch viel zu deier.

Do seht ihr alte Buse wackeln,

die Fraue mache aisch zu Dackeln.

Moin Borscht war dort, hot niemond gfunne,

ihr wart halt all beim Bazar drunne.

Uffm Bazar gab’s Schnaps, Bier und Woi,

Kumm, schenk ma aa noch emol oi.

 

 

Do hinne bei dem Märschenpark,

gibt’s en Elefondepfad.

Sou grouße Viescher sind halt laut,

dofer häwwe die ä dicki Haut.

Trotz dem bitt isch aisch, er Elefonde,

hert uff sou laut rumzutromple.

Paßt uff, uff die, die halt dort wohne,

donn dud ma aier Haut noch schone.

Außerdem ma was nedd wie,

passt in sou Viescher en haufe Brie.

Die trinke sou viel, un des is doll,

weil des ä paar Dag longe soll.

Nadierlisch gibt’s aa Ausnohme,

des sind Elefonde, die halt mohne,

dass ma jeden Dag viel saufe muß,

drum merkt aisch hier zum gude Schluß,

isch rot aisch Ausnohm-Elefonde,

versucht mol nischdern homzudromple.

Gebt ma schnell des Becherlein,

weil isch schmaus ä Ausnahmlein.

 

 

Dorsch die Presse schalt es laut,

in Hemschbach do werd gern getraut.

Sogar die vun de Bild-Zeitung,

Berichte des mit Hochachtung.

Noch em verlorne Fußballspiel,

saß ma zusamme mit dem Ziel,

zu trinke un aa gut zu esse,

selbst de Boijemoschter hot debeigesesse.

Un mit einem junge Paar,

kimmt er ins Gespräch sogar.

Isch kick bei Waldhof, säigt der Monn,

un kenn moi Mädsche noch nedd long,

moje werdes grad 2 Dag,

dass isch den 1. Kuß ihr gab.

De Boijemoschter bekonnt gonz fix,

ach kum, gäi her, des mäschd doch nix.

Ihr misst schnell heiern, ihr junge Leit,

bevor ihr wira vunonna seid.

Flugs, do lässt es sisch schun bringe,

die Omtskett un die Eheringe.

Er hott die zwa wohl soi verschrickt,

wahrschoinlisch häwwe se blous genickt.

De Fußballer gestond’s mit Grause,

er hatte gonz schee Muffesause.

Wonn awa sou ä Päärsche kimmt,

un disch emol beim Wort donn nimmt,

isch bin iwerzeugt, disch konn niemond hinnern,

Pettern zu wern, donn bei de Kinnern.

Isch will die Gelegenheit aber nutze,

un trink mol uff die kloone Grutze.

 

 

De TC Wiesensee spielt Tennis,

un dodorsch, dass de Platz zu koo is,

frogt er bei de Verwaltung an,

ob er nedd vergräißern kann.

Des Vorhawe wurd akzeptiert,

die Genehmigung mindlich garantiert.

Ma fängt schun oo mol oizuebne,

die Fläsch mit Schotter zu belege.

Doch donn kam des grouße Aus,

es wern koo Tennisplätz draus.

En Ohwohner hot sich beschwert,

weil ihn des Ballgedopse stört.

Der ging herum, isch musses berischde,

un sommelt aa noch Unnerschirfte.

Rischdisch, was solle die do dreiwe Sport,

isch mon, ä Fabrik muß hie, do on den Ort.

Oni, die sou rischdisch stinkt,

awa dass ma koona kimmt,

un will donn ebbes onres hawwe,

do war die Chance, du hoschd’se kadde.

Wenn dir in unsrer Stadt noch mäi nedd gfällt,

donn isses ohfachschde der Welt,

du nimmscht unner de Arm doin Gräz,

un gäischd dohi wu de Pfeffer wächst.

Liewe Tennisspieler, vum TC-Wiesensee:

Ihr häbt uffs mindlische aisch verlosse,

häbd’s aisch nedd schriftlich gewwe losse,

bei uns des iss ä alti Gschicht,

zählt halt mol ä Unnerschrift.

Mensch, was is moi Kehl sou drucke,

in Aageblick, isch muß was schlucke.

 

 

In Hemschbach West, ihr häbds schun gsehn,

do dud en helzerne Kerschturm stehn.

Un drowwe hängt, in dem Gebälk,

ä Gleckl, s’niedlischste der Welt.

Des bimmelt laut, mo konn es hörn,

un monsche schoint es aa zu störn.

Denn omol, als de Parre schaut,

do war des Glockesaal geklaut.

Er hot nedd long rumgezottelt,

un  hot ä naies hiegeknoddelt.

Doch nedd longe währt des Glick,

do warer wira fort der Strick.

er hot sich garnedd long scheniert,

un hot ä naies hie mondiert.

Isch bin mol gsponnt was donn hie kimmt,

wonn wira ooners Saal wegnimmt.

Isch setz jetz ämol aus mimm trinke,

moi Fraa, dud mer alleweil schun winke.

 

 

De Gegner wird es Ongschd un Bong,

rolle Hemschbachs Sportler on.

Sogar in Canaria gibst Gerüschde,

die Hemschbächer, die sinn zum Fürschde.

Doch dehom, in de Mischels-Hall,

werd des en umgekehrder Fall.

Isch des hier mol sage muß,

schun beim kloonschde Rejeguß.

Vielleischt häbt er’s aa schun vernumme,

dud ne die Ongschd schun aus de Aare kumme.

Sie häwwe Ongschd, des is koo Witzsche,

vor riesegrouße Wasserpitsche.

Om Somsdag, es war bei mä Hoimspiel,

do hotts gerejert ä bissel viel.

Drin hotts gedropst , s’is runnageloffe,

faschd wär die Hall noch abgesoffe.

Des Spiel musst unnerbroche wern,

sou war des do, ihr Dome und Herrn.

De Hedderichs Karl, de Bauers Hermann,

die kame mit dem Lumpe an.

Die Spieler tate aa mitmische,

un finge oo mit uffzuwische.

Isch forg aisch, die es die Stadt dud repräsentiern,

kenne ma uns nedd besser blomiern.

Alla drum ä bissel munter,

om Mittwoch kimmt des Dach herunter,

om Dunnerschdag kimmt nuff ä frisches,

donn herts mol uff des Uffgewisches.

Mit aisch Stadträt stouß isch immer noch nedd oo,

jetzt sinn erscht die Sportler droo.

 

 

Ä jedie Stadt in aller Welt,

die braucht ä Truppe falls es brennt.

Un wie’s sou is im deitsche Lond,

ä Truppe braucht en Kummondont.

Beim Alarm isses bassiert,

de Ehrenfried zu spät is lousmaschiert.

Des erste Auto vorwärtsstürmt,

do kimmt er hinnenochgetürmt.

Un wihlt sisch noch in soin Kombi,

do rutscht er aus un fällt glei hie.

Es das en Schlag, er lag donn do,

direkt vorm Feierwehrauto.

Aus wars er konnt jetzt nimmer spritze,

er musst dehom im Sessel sitze.

Soin Stellvertreter hots vollbracht,

der hott des Feier ausgemacht.

Der nächste Trinkspruch is nedd schwer,

es lewe unser Feierwehr.

 

 

Unser liewe Stadtverwaltung,

platzt aus de Näht, des wisst er all schun.

De Bojemoschter spricht schun long,

mer brauche en neie Pavillon.

Om Rothausplatz, do hott man gfunne,

de alte, fer die Volksbonkkunne.

In diese Bonk ward noigestellt,

en Eiseschronk, fa unser Geld.

Beim Umbau stellt sisch donn die Frage,

wu dun mer den Tresor hie trage.

Gesagt, getan, der Kilian,

nahm sisch dieser Blechdos an.

Verläd’se uff soin Lasterzug,

stellt’se in Woinem in soi Stub.

Zum öffne muß ma Zahle kenne,

er frägt herum, wer könnt die nenne?

Vum Direktor bis zum kloonste Bote,

s’wußt kooner mer den Zahlenkode.

Er fleht, erforscht doch noch’s Gewisse,

s’dud kooner mer die Zahle wisse.

Ma riddelt rum, ma häischt a druff,

der Schronk bleibt zu, un gäit nedd uff.

Horscht mol her, er fun de Bonk,

wert er dofu nedd gonz kronk.

Gäit niwwer mol ins Cafe Londes,

do gibt’s noch oon, isch glaab der konn des.

Isch trink uff die, die sou viel häwwe,

daßes uff die Bonk noch trage kenne.

 

 

Do um die Eck, ä bissel weiter,

do stäit ä Haus, doch leider, leider.

Es kumme Autos, grouße Brummer,

die renne donn zu Jaspers Kummer.

Soi Fachwerkhaisel korz un kloo,

sou stäit er donn belämmert doo.

Paß uff, du fliegst noch mit doim Fachwerkhaus,

bestimmt aus der Versicherung raus.

Auf Mundschenk, loß disch doch nedd lumpe,

reisch mer riwwer mol de Humpe.

 

 

In unserer schönen Bildungsstätte,

hamm mer ä Halle zu dem Zwecke,

dass mer dreiwe kenne Sport,

doch was fern Ton herrscht on dem Ort.

Do will wohl ona Läit vergrätze,

will sisch vielleicht ä Denkmol setze.

Versucht hotts ona im April,

Des Schild kam weg, weil’s niemand will.

Denkmal, konnscht du hawwe, un gonz schnell,

verkünd isch hier von dere Stell,

isch ruf aus mit lautem Schalle,

mer häwwe ä Theo Wallendorf Halle.

Isch trink mol uff die guten Geister,

die Haus- un Hof- un Hallenmeister.

 

 

Des Sunndags, wenn ma Ruhe hat,

sou en Verein halt aa mol dacht.

Mer fahrn fort, gekickt wird nedd,

un nemme was zu trinkte mit.

Vor lauter trinke in dem Bus,

die gonz Gesellschaft pisse muß.

Un donn uff de Autobahn,

der Bus fährt raus, un hält auch an.

Ona pisst un pisst un pisst,

un hott halt sou des Bus vermisst.

Der Bus kimmt hom, die Freunde denke,

wu mag nur unser Helmut henke?

Sie renne hie, sie renne her,

die Boo, die wurde longsom schwer.

Sie sage, bevor ma noch all hinke,

gäin mer liewer glei was trinke.

Un sou sinn die donn all zusamme,

in die nächst bescht Wertschaft noigange.

Uff omol gucke die gonz dumm,

wer saß donn do am Stommtisch rum?

Gell, jetzt werde er’s all schun wisse,

es war der, der sou long musst pisse.

Er fuhr in unserem Zeitalter,

wie sich’s gehört, halt per Anhalter.

Aa will isch meinen Becher hewe,

unser Fußballer, hoch soll’n se lewe.

 

 

En Hemschbäscher, noch nedd gonz Millionär,

dacht, dass es des Beste wär,

isch bring moi Geld mol uff die Bonk,

do isses sicherer als im Kihlschronk.

Schwingt sisch ins Auto zu dem Zwecke,

fährt erst im Gschäft, sou um paar Ecke.

Steigt aus em VW-Bus aus, der Gute,

un dud sisch in soin Lade spute.

Den Schlissel un den gonze Zaschder,

den lässt er drinn im Mini-Laschter.

Drin rennt er rum, un krutschtelt dort,

un wie er raus kimmt, isser fort.

En Kunde kimmt, un säischt was Wunner,

du fährst doch grad die Brick änunner.

Des bin nedd isch, des is moi Kutsch,

ach Gott, jetzt is moin Zaschder futsch.

Doch weit gefehlt, hat es den Monn,

ä paar Stund später stäit sodonn,

soin Laschter wieder vor soim Haus,

un siehe da, was läd er aus,

ä Plastikdud, soi zum Oikaafe,

er macht’se uff, un konn’s koum glaawe.

Er fällt noch faschd uff’s Drodwar hin,

die 30.000,– warn noch drin.

Also folgt der Schluß sodann,

es kimmt uff die Verpackung an.

De Fokko macht nie Defizit,

auf er Leit trinkt all mol mit.

 

 

Es is bekannt, seit alters her,

des Alleinsein, des is schwer.

Sou aa ä Dome dachte,

drum hert mol her, was die sou machte.

Do driwwe in dem Kerschesaal,

gibt’s ab un zu mol’s Abendmahl.

Es sei vergift, hott se gesagt,

un hot aus dem Grund verklagt,

de Stadtchef un mit ihm de Parre,

ja Mädsche, du hoschd doch en Sparre.

Was muschd du fa en Ronze hewe,

um sou ä Attentat zu iwerlewe.

Donn hot die Fraa sisch uhverdrosse,

dort in ä Stübbsche schließe losse.

Wollt warde uff den Monn in Schwarz,

vielleicht als neuen Herzensschatz.

Debai hott der vun dere Dolle,

doch iwerhaupt nix wisse wolle.

Donn frägt se, sie war gonz Ohr,

noch de Adress vum Parre Mohr.

Vielleicht dud’se devor on misch jetzt gehn,

die Fraa, die dud uff Parre stehn.

Lieb Mädsche drall und hitzisch,

sou ebbes, is nimmer witzisch.

Drum horsch mol her, du altie Bäile,

du herscht jetzt uff mimm Parre Quäile.

Gäischd in de Jet-Clu, bei der Blooß,

do werscht die gräischde Hitz du los.

Bevor ihr mir wollt’s Fell verhaue,

isch stoß mol oo, mit Aisch, ihr Fraue.

 

 

Beim Grillfeschd do beim Liederkronz,

hott aa ona geglaabt er konns.

Er kam mit soiner grouße Schnud,

frischen Herz un noch mehr Mut.

Un säischd, isch bin doch aa nedd faul,

isch reit mol uff me rischd’sche Gaul.

De Gerhard, ä Figur wie’n Muff,

kam nedd mol uff des Pferd änuff.

Ä Laader her, schnell wars getan,

sou kletterte er dann hinan.

Is owe, macht soi Boosche krum,

sou saß er schun verkehrt herum.

Ja, wie konn sou was nur bassiern,

kurzum, er tats nochmal probiern.

Die Laader uff die ona Seit,

änuff geklettert, s’war soweit,

er saß donn rischdisch mit soim Arsch,

unn ritt ä Rund Parademarsch.

Isch trink uff diesen edlen Reiter,

in Aageblick, s’gäit glei weiter.

 

 

In unserer Gegend gibt’s ä Gruppe,

mit’m nen gonz gewalt’sche Duppe.

Die moone, die wärn Leit vun Welt,

weil se nedd wisse wuhie mit’m Geld.

Die häwwe vor, die grouße Buchse,

de Wiesensee uns abzuluchse.

Wolle baue, mit viel Gelder,

ä riesegroußes Freizeitcenter.

Wolle baue drumrum ä houhes Gatter,

dass ma nedd sieht die FKK’ler.

Wolle verbiete dem Dr. Degenring,

soin Somsdags-Morgen-Trimm.

Wolle, dass ma zahlt fers Surfen,

schwimme, segle, Schdo noi werfe.

Un sogar für gehen-spaziern,

wolle die Gebührn kassiern.

Nadirlisch, kenne die jetzt nedd hergeh,

un sage, verkaaft uns mol de Wiesensee.

Die mache des um ä paar Ecke rum,

in Stuttgart im Minischderium.

Do versuche die zu schmern,

damit die Leit dort uff se hern.

Wolle vielleicht den See uff die Art hawe,

dass ma macht ä Umlegverfahre.

Falls die kumme, er Stadträt isch aisch oofleh,

gebt nedd her de Wiesensee.

Falls er doch noch uff den Trischder kommt,

merk er’s bei de nächst Wahl prombt.

Donn kimmt do niwer, er mir des glawe kennt,

ä nagelneies Stadtparlament.

Drum behalte mer den Wiesensee,

dass es weira is sou schee.

Unser Städtsche weit und breit,

mer dankes aisch mit Herzischkeit.

Uff aisch Stadträt stouß isch immer noch nedd oo,

ihr seid jetzad glei wira droo.

 

 

Gäit ma in Hemschbach mol spaziern,

konns om unnerwegs passiern,

dass ma hängt belämmert doo,

weil ma stäit im weische Schdoo.

Verstäit er nedd, den Schdoo den weische,

donn sag isch’s halt, s’is Hundescheiße.

Ä Hundekloo wurd vorgeschlage,

un ma hott es aa berate,

bei SPD und CDU,

doch jetzt kimmt der grouße Kluu,

hinner der verschlossner Tür,

ja, do warn se all defür.

Doch al’se kam die Abstimmung,

war die Mehrheit donn grad onerschd rum.

Liewe Stadträt ihr misch kennt,

un er mir’s nedd iwel nemmt,

isch gönn aisch jedem mol uff soine Weise,

en Tritt, dief in die Hundescheiße.

Jetzt er Stadträt jetzt stouß isch uff aisch oo,

denn er kummt heit nimmer droo.

 

 

In Deitschlond waas es aa der letschte,

mer Hemschbächer, mer feiern Feschde.

Ob Woifeschd, oder Tanz in de Mai,

do gibt’s oon, der is immer debai.

Des is halt sou en ältrer Recke,

der donzt ä Nacht dorsch, wie in Lumpe om Stecke.

Un guckt ma mol zur Donzfläch hin,

der hott immer ä neii Partnerin.

Mit de junge Frau donzt der Beat,

do kumm isch schun nimmer mit.

Walzer mit de reife Dome,

ihm niemols dunn die Fiß erlohme.

Er gäit erscht hom, wonns Dag schun long,

monschmol isch’s nedd glaawe konn.

Un neune wira geputzt un lackiert,

er donn dorsch die Stadt maschiert.

Er rennt rum, es is kon Witz,

zackisch, wie de alte Fritz.

Ä freundlich Gsischt, ä frohes Lache,

wer dud dem des noch nochmache?

Der Monn is fit, is geistig rege,

weil er dud soi Hern bewege.

Im Kerschchor do singt der Baß,

er is aa dort des grouße Ass.

Isch frog misch wu hot der die Kuttel her,

der Monn hott ä Nadur wie’n Bär.

Glaabt mer ihr Leit, issch net oogeb,

isch kenn en schun sou long isch leb.

Uns Junge macht der längst was vor,

der is schun iwa 80 Joar.

Gell sou longsom kennt ern all,

doo stäit er rum, die Schäfers Karl.

 

 

Dem letzte Kerweparre isses bassiert,

er Leit un des is nedd glossiert.

Es kam donn noch de Kerwe bald,

en bäise Brief vum Rechtsowalt.

Isch mon isch verstäih des gut,

wonn des monschem nedd sou passe dud.

Doch bedenkt, worums hier geht,

mol uffzuzeige, wu’s aa fehlt.

Nedd blous zu kloppe bleede Sprich,

uff die Art verstäih isch misch.

Als Kerweparre hier und heit,

doch jetzt, jetzt is genug fa heit.

Bevor isch du mer Fronze plappern,

loßt uns liewer ebbes schlappern,

loßt uns ebbes Gutes esse,

loßt die Sorge uns vergesse,

loßt uns gucke noch de Mädsche,

mer häwwe hübsche hier im Städtsche.

Do stäin sou viele schöne Damen,

isch kum jetzt zu aisch

Amen, Amen.