Kerweredd 1999 (die fünfezwonzigschd)

Vunn de Kerwe schunn gonz buglisch und krumm,
grieß ich aisch – all do unne rum.

Wer mich ned kennt, horsch ämol her,
isch bin de Kommandont vunn dä Feierwehr.

Monchem vunn aich – bin ich bekonnt,
vumm Grundbuch unn vum Stondesomt.

Dieses Jahr ist es möglich – meine Damen und Herr´n,
vumm Kerweparre getraut zu werrn.

Isch selwer bin mit oins versteiert,
unn souzusare ned vaheiert.

Als äschder Hemschbescher, des gäid in die Ohrn,
bin isch in de Bachgass do owwe geborn.

Ehr Leit häbt ihr des Johr ä Glick,
isch stäi als Parre uff de Brigg.

Als 25. Merkwürden uff dem Gschdellaasch,
stäit Thomas Pohl mit Kopp unn Arsch.

Ich duh aich vunn owwe erscht emol winke,
un jetzt gibt´s glei noch was zu trinke.

Vor zäie Johr woll isch schunn Parre soi – jawohl,
doch damals galt noch des TV Monopol.

Unn wäie moim schunn immer unbändische Dorscht,
war ich blouß begehrt als Mundschenk un Borscht.

Doch ihr seht, isch bin gegrawwelt – immer weiter,
uff de Kerweparrekarriereleiter.

Moin Mundschenk is Medzger, a Saidoud genonnt,
is wie en bunte Hund in Hemschbach bekonnt.

Unn wäie soim Umgong mit de Tiere,
dud er gute Kerweeigenschafte führe.

Er hot in Maare – wie ä Kuh,
ä Schell gar – wie en Stier däzu.

Hot Kräfte wie en junge Eber,
sou perfekt is a net jeder.

Außerdem ich sags eisch genau,
wara geschdern owend voll wie ä Sau.

On Joohre sind mer zwaa nimmer sou frisch,
awwer ä bissel was – geht immer noch – glab isch.

Kumm Theo mer drinke uff dich als Metzgermoschder,
un uff mich als Stadtbrondmoschder,
bezahle dud´s de Bojemoschder.

Oh dunn mer die Aare weh,
seh ich unsan Wiesensee.

Donn die Wasserqualität fun dem Teisch,
liegt im owwere Grenzwertbereich.

Woher des kimmt – des iss doch klar,
weil fer monchen de See schunn – soin Abbort war.

A Düngemittel die ins Grundwasser fließe,
wern im Seewasser nochgewiese.

Vielleicht sollte ma wirr mol, ich mach jetzt koo bosse,
s´Hemschbäscher Bachwasser, uff die Wisse noilaafe losse.

Jetzt lefts in de Tierpark – dohinne wie foi,
un donn dorsch de Freidenbergsdreck ins Grundwasser noi.

Die Ohwohner außerum, heen a nix dägäije,
ehr batschnasse Keller trockezuläije.

Frau Wörmann-Wiese fun de SPD,
was noch in Grund fa den dreckede See.

Die Kloingärtner säischt se, dehn viel zu stark dünge,
un dodorch den See außem Gleichgewicht bringe.

Sie mohnt, sou grouße Salatkepp unn Tomate wie die,
grigschd blous mit Nitrophoska hie.

Die Kloingärtner häwwe sisch iwwa die Zeitung gewehrt,
un gschriwwe die Aussage wär gonz vakehrt.

Der Grund fer die Größe fun ehrm Gemüse,
wär der – das sä er Sach mit Seewasser gieße.

Auf Mundschenk schenk ma ooner oi,
awwa duh ma koo Wieseseewasser noi.

Auslondskondakte wie konn´s onnascht soin,
pflegt unsan Pardnerschafdsvaroin.

Fronkraisch unn Englond stellt eich emol vor,
trifft sich in Hemschbach es gonze Johr.

Om Woifeschd häwwe die sich – mit Englond gedroffe,
un fünf bis sechs Käschde Woi leer gesoffe.

Die Woiprob war diesmol in de Kron,
mit ausschließlich Woine aus de Region.

On ebbes häwwe sisch die Woigeischder gschiede,
warum duht ma in Hemschbach – Rhoihessiche Woi ohbiete?

Sou monscher in Englond denkt jetzt gewiss,
dass unsa Hemschbach – Roihessisch is.

De Partnerschaftsvaroin hott schoinbar koo Gewisse,
odda hed in de Schul bessa uffbasse misse!

Vielleicht denke die a global – oder soo,
un negschd Johr gibt ´s Hemschbescher Woi aus Bordo.

Roihessische Woi – des is bekonnt,
dring isch – beim Kretzlers Paul om Stond.

Auf Mundschenk schenk mer ohner oi,
mehr wolle niemols hessisch soi.

In Hemschbach gibt´s des wisse viele,
in jedem Johr, die Ferienspiele.

Do wird gewonderd, gschpielt, gezelt,
ma macht – was heit de Kid´s gefällt.

Als Höhepunkt wie jeder weiß,
do bringt de Bojemoschda, fa all ä Eis.

A ledschdes Johr – macht a sich mim Jung uff de Weg,
uffm Ricksitz schdehds Eis – in eme dolle Gerät.

Ä elektrisch Kühlbox des is vielleischd foi,
muß blouß de Schdecker in de Zigareddeozinda noi,

do konnschd fahrn un fahrn bis grau bischd un ald,
des macht iwwerhaubd nix, des Eis des bleibt kald.

Sou sin se in de Ourewald mit groußem Durschd,
im Auto fuffzisch Grad, s war ofong Auguschd.

De Bojemoschder hängt im Gurt, de Schweiß vunemm rinnt,
un irgendwonn merkda, daß do was net schdimmd.

Du Bernd fällt ehm – uff emol oi,
mißt in dem Loch net in Stecker drin soi?

Der war werklisch ned drin, isch redd jetzt kon Quatsch,
in de Box war ko Eis meh, s´war blouß noch Matsch.

Doch zum Glick schaffe bei uns – wie jeder weiß,
in jedem Kaff, Italiener – un mache foines Eis.

Sou ruft – ä bissel später der kloone Holger,
ewe kimmts Eis un de Bojemoschda Volker.

Blouß de Junge Bernd hots om ärgschde getroffe,
der hot faschd acht dag – blouß Milschschäik gesoffe.

Isch heib jetzt moin Bescher, mir rinnt de Schweiß,
awwer du ma blouß Bier noi, un jo ko Eis.

Dä Kärwevaroin hott negschd Johr Jubiläum,
doch wie ma jedzd waas, halt ohne Museum.

Vum Rat der Stadt Hemschbach mohnte die meischde,
ma kenne uns sou ä Museum ned leischde.

Un ä öffendliches Gebäude sou saare die,
kimmt on de B 3, im Läb Dag net hie.

Awwer der Kinndergarde den wolle se erhalde,
doch wer will donn des Ding dort als Wohnraum gestalde?

Die Decke: 3 meter achtzisch, konn Abbord,
– die Stroß, unn de Krach,
unantastbar de heilische Josef om Dach.

Wer des Haisel keefd, ich sags ohne Scheu,
der konn nett gonz gebacke soi,

De Kerwevaroin wolld die Renovierung selber finanziern,
des dut die Städträd ned indressiern.

Dorch sou ä Museum, kennt ma vielleicht noch ä Ompel erzwinge,
doch des det die Autofahrer gege de Stadtrat uffbringe.

Zuletscht deht noch ohner, des derf nett bassiere,
iwwer die Audobohn noch Woinem kutschiere.

Un dem Kerwevaroin, ich lach wie in Gaul,
dem schmern ä paar Stadträt noch Honisch ums Maul.

Vielleicht saare die – weerd in de Schlossgaß was aldes gekaaft,
doch die Stadt Hemschbach is pleite, ma hot alles verschlaaft.

 

Dä Kerwevaroin denkt, es geht net um die Stroß´un ums Geld,
die moone, die falsche häwwe den Otrag gestellt.

Drum Kerwevaroin feiert schee Jubiläum,
un verbrennt eiern Krembel fas Hoimatmuseum.

Mer vun de Feierwehr wie ma uns kennt,
häwwe unser hisdorischi Holzfeierwehrlaader schunn long verbrennt.

Sou Theo jetzt konn isch das saare,
de Stadtrat uns Rodhaus, gugge uns jetzt nimmäi in die Aare,
awwer hed isch den Text net verleese,
wern mer die längschd Zeit uff dere Brigg gewese.

Drum schenk noch ooner oi –
uffs Museum un de Hoimatvaroi.

Zwei Freundinne, die Frau S. und Frau W.
Fahrn uf de Monnemer Flohmarkt die zwee.

Die wolle ehrn alte Grembel verkaafe,
fahrn morjens om Viere, des Gschäft muß laafe.

Herr S. den ich kenn, hot mer´s gsaat im Vertraue,
die kaafe mäi oi, wie sä verkaaafe die Fraue.

 

Frau W. die war diesmol gonz gut bestückt,
die hot fun de Schwägerin noch Klamotte mitgriegt.

Sou om Achte rum, s Gschäft war gut om laafe,
do wollt sä ehrm Bruder soin Kittel verkaafe.

Der Käufer mohnt – 50 Mark fa den Kittel – den alte,
des is viel zu deier, den konnscht grad gepalte.

Un wie sie grad 40 Mark saare wollt,
do is ausem Kittel was rausgerollt.

Sie häibds glei uff, wärd blass, un steckt´s oi,
swarn 4.000,– Mark in 1.000,– der Schoi.

Mer sin die zwee Fraue jo gut bekonnt,
beim negschde Flohmarkt, kaaf ich uhgsehn den Stond.

Auf Mundschenk losses laafe heit,
in Hemschbach gibt´s halt reische Leit.

Uff de Bergstroß fährt´n Monn uff de Luisehof zu,
sou on heilisch Owend, iwweraal war schun Ruh.

Mit eme Gschenk will er soi aldi Mudder erfreun,
er fährt uff de Parkplatz sou kurz vor halb neun.

Do blaibd dem uff omol soi Herz faschd stehn,
vor laurer Qualm konnt der des Haus nimmäi sehn.

Er noi in soin Karre, un ab uff de Stell,
rast er on die negschd Telefonzell.

 

Ou bitte kummt schnell hot a in de Hörer geflennt,
unser Aldershoim – hier, de Luisehof brennt.

Der Owend war plötzlisch gar nimmeh hailisch,
fünf Löschzüg mit Polizeieskorte, die hattes jetzt eilisch.

Notärzte, Rettungswaage unn Christopher drei,
rase vum Land und aus de Luft herbei.

Doch was glaabd ihr was lous war in de heilische Nacht ?
Als ich des gsehn häb, hab isch garned gelacht.

Do hot doch der Briggl, gonz ungehemmt,
on Woihnachde soin alde Grembel verbrennt.

Hot gedenkt, die Ordnungshieder sin heit dähoom,
also Feier gemacht und weg mit dem Kroom.

Wollt sich schoinbar um die Müllkoschde drigge,
doch so was duht gonz selte glücke.

Isch brauch was zu dringe, mir is schun gonz warm,
zum Glick war des domols – falsche Alarm.

Bei uns die Oikaafsmeil is, isch sags eisch blooß,
fun vorne bis hinne, die Berliner Strooß.

Do konnscht kaafe zu futtern fascht in jedem Haus,
blouß unser Bachgass, moi Geburtsstroß – die sterbt longsom aus.

Inn de Bachgass müßt dringend enn Oikaafsmarkt soi,
doo meeste die Alte ned in de Weste noi.

Zwaa Apotheke newänonner,
war fa viel enn grouße Hommer.

Unn ä Reformhaus, mit biologische Sache,
die solle uns all gsünder mache.

Kriegscht Pille unn Salbe, biologisches Fett,
doch was gscheides zu Esse, des griegscht du dort net.

Beim Neithard unne, gibt’s scheenes Gscherr,
awwer koo Lebensmittel, do werscht gonz err.

Beim Zinnkonn gibt’s uff viele Sache Rabatt,
doch vun Elektroartikel werschd a ned satt.

Un jetzt kimmt de Metzger, mit Worschd und Salad,
nur fa Vegerarier hot der a nix parat.

Donn kumme noch zwaa Archidegde – o Graus,
also wirra nix zu kaafe, häigschdens ä nei Haus.

Weiter owwe zwaa Friseure, s´is schunn zum lache,
nix in de Bauch, awwer konschd da Dauerwelle mache.

Donn sinn noch zwaa Obdiger mit scheene Brille,
awwer futtern konscht du die ned – a beim beschde Wille.

In de Mitt vunn de Gass, gibt’s in zwaa Bonke Geld,
doch wuu gibschd des aus – um alles in de Welt?

Es gibt donn noch Duwag, de Otto un mehr,
un de Rest vun de Gschäfte, is leider halt leer.

Muscht noch uff die Poschd – ä paar Sache kaafe,
do derfschd inzwische zwaa Kilometer laafe.

Unn gäid des sou weider, isch sag´s eisch glatt,
kimmt die Kreisstroßemauer, unn mir sinn ä Geischderstadt.

Jetzt brauch isch en Schluck – denn ons is gonz doll,
wenigschdens on Kerwe, is die Altstadt schee voll.

Im Hölzerlip´s Club trifft ma Hemschbachs Elite,
wer dort Mitglied wärn will, der muß schunn was biete.

Vorg´s Johr er leit, jetzt gebt ermol acht,
do häwwe die Helde en Ausflug gemacht.

Noch Paris ging die Fahrt, un des ohne Fraue,
do konn ma die Stadt halt besser beschaue.

De Förschders Hoinz, der is g´fahrn bis Paris,
doch in die Stadt wollt der ned fahrn, do horra halt Schiss.

De Schmitte Fronk, dieser Halunke,
saischd ich fahr nett, ich häb getrunke.

Dem Krafte Roland, dem fällt oi,
mehr fahrn mit de OEG, in die Innestadt noi.

De Paulis Volker hott sich g´fraht,
OEG fährt der mit Monatskaart.

Doch Herbert Kaufmann was Bescheid,
die Metro fährt uns noi – ehr Leit.

Ä Metroschtation war schoins ball g´funne,
was in Paris noch passiert, is – isch habs net vernumme.

Die Hölzerlips Bonde, so häb ich erfahrn,
is hom zus – ah mit de Metro g´fahrn.

Blous häwwe die Kerl ehr Auto nett gfunne,
die erschd Metrostation, die war wie verschwunne.

Sie häwwe sich doch noch, das des jo nett passiert,
om Metro Ausgong, den Noome nodierd.

Kraft, Förster, Kaufmann- Schmitt unn Pauliii,
die suche des Auto, on de Station – „Sortie“.

Auf Mundschenk loss de Kopp ned sinke,
mehr wolle uff den Ausgong trinke.

In jedem Johr, sou im Juli erum,
feiern Abiduriende mit groußem Gebrumm.

Do wern die Verstärker unn Discoblitzer
druffgebaut uff Traktore, un onnere Flitzer,

Donn fahrn se dorchs Ort, mit viel Gebrüll,
spende konn jeder was er grad will.

Fer ä Party om BIZ, des is doch klar,
weils immer schunn Brauch, in Hemschbach war.

Doch dies Johr wars onnerschd, isch du ned lüge,
die Millionekränk solle die Honnelsriese kriege.

Häwwe monsche Regale vunn Lewensmittel bereit,
zum Verfallsdatum sinn die meischd nimme weit.

Do wernn die rumgerohmt – de Preis reduziert,
Unn monsches weggschmisse, wonns Datum bresiert.

Doch fer unser Abiduriende gabs trotz Betteln und Bitte,
ko Worschd, un ko Bier aus des Marktes Mitte.

Awwer oons muß isch lous wern, vunn hier owwe runner,
daß die nix griegt häwwe, is a ko Wunna.

Donn wenn se mit Drillerpeif, dorsch de Laade ziege,
daß Kinner und Rentner faschd en Herzschlag kriege,

selbschd junge Leit des Gsischd verrenke,
sollte Teens und Twenns – mol oofonge zu denke.

Gibt’s halt nix in dem Lade – donn raus unn fort,
s´beim negschde browierd, onneme onnere Ort.

Isch drink jetzt in Schluck, uff Märkte unn so,
funn denne wus was gewwe hot – die sinn all nimmeh do.

 

Do owwe in de Gaß, lebt in fleisische Racker,
der hot ä Friseergschäft , zwaa Gaase un en Acker.

Uff dem pflonzt a Tomaate, Kartoffel unn Bohne,
bei de heitische Preise, duht sich des schunn lohne.

Doch ledschdes Johr, hot er gewaldisch gepennt,
beim erschde Froscht iss er erscht uff soin Acker gerennt,

do war er donn gschdonne, hot de Petrus verflucht.
Die Kartoffel ausmache, hot er mehrfach versucht.

De Acker knallhart gfrorn, on alle Ecke,
er hot gschafft, wie en Wilder, es war zum verrecke.

Gäid hoom, holtd die Spitzhack unn de Presslufthomma,
er hot nix rausgriegd, es war schun en Jommer.

Do schlaischd er sisch hoom wie en begossene Pudel,
un owends gabs halt – statts Kartoffel nur Nudel.

Zwee Dag später, isser donn noch emol hin,
s´war fa die Katz, die Dinger sin heit noch drin.

Ma hot en als gsehn, in die Bachgass laafe,
un uffm Bauernmarkt sich Kartoffel kaafe.

Ich trink jetzt emol, uff ex werrd jetzt gschluckt,
Uff die Jahrgangskartoffel, Hemschbachs Meischter Produkt.

 

Die Kerwe iss die Zeit faa die Männer, die Borscht,
die häwwe bekonntlisch schunn Morjens viel Dorscht.

Ja monsche, die saufe sou rischdisch doll,
un sinn donn um Halwer zwa – meischdens voll.

A vorsches Johr hot onner viel zu viel gschluckt,
hot om onse schun ziemlisch glaasisch geguckt.

Die Regel besagt jo, ma solls ned vergesse,
wonnd säufscht, sollscht zwischenoi mol was esse.

Also beschdellt er in Weck un ä Worscht,
un glei noch en Halwe fa soin Dorscht.

Des Bier, des war schun glei parat,
blouss uff die Worscht hot er zwaa Stunne gewaat.

Donn hot er vor Hunger ä paar Rouse geschluckt,
die Welt vollgegrische, die Leit häwwe geguckt.

Geht oom on die Gorgl, doch der war ned faul,
un schläischd dem Grischer ä paar mol uff´s Maul.

Uff oomol rennt mitte, in die wild Keilerei,
dem Duschimoo so Jasmin mit em Gaadeschlauch bei.

Un hot die zwaa, des war gonz gewitzt,
mim Schlauch, direkt ins Sonitätszelt geschbritzt.

 

Der Soni drin – hot des glei geschnallt,
un die zwaa, rechts unn links uff ä Britsch geknallt.

Die häwwe lomedierd, doch des hot nix genützt,
ma hot ne in Beruischungscogdäil in de Arsch noi
gschbridsd.
Un zwaa Stunn später, mir warn vunn de Socke,
sieht ma se wieder in de Straußwirtschaft hogge.

Sie rufe, die Kerwe ghörd wieder unser,
un zwar vum Nawwel, bis zum Brunser.

Ich drink jetzt emol leer, un bin isch donn voll,
grieg isch a sou ä Schbrids, des find isch gonz doll.

Die Feierwehr rettet, löscht, schützt un bergt im gonze Lond,
des iss in Hemschbach jedem bekonnt.

Ma hot fa ä guti Eigenheit –
a öfters en gute Spruch bereit.

„Schnell wie die Feierwehr is sou ooner,
un schnell is der – wie sunscht kooner.

De Fernsehmonn aus de Feierwehr
mim Auto un zu fuß – flink wie ä Gewehr!

Doch neilisch bei re Übung im BIZ,
is a wirramol gerennt wie de Junge-Blitz.

Unn hot ä Fenster fer ä Deer gehalte,
des war awwer zu – do hot er gestutzt der Alte.

Mit 120 kg ist er on die Scheib gedunnert,
die Übungsteilnehmer warn sichtlich verwunnert.

Die Scheib hot gehalte – s´is faschd nix passiert,
de Klaus war sichtlich konstaniert.

Donn hot er sich wieder uffgerappelt,
s´häwwe a glei ä paar midem gebabbelt.

Um zu teste, ob im Hirn noch alles klar,
was dann a faschd zu beschdädische war.

Die Hausmoschder im BIZ wollte soin Grabb hiebabbe,
(Fenster zeigen)

awwer in Hemschbach wisse die Junge unn Alte,
in Sulzbescher Grabb konn den Klaus ned uffhalte.

Drum hot de Kronauers Heinz, was neies erfunne,
Ich stells eisch vor – s´is faschd fa umme.

(2. Fensterseite) (Fenster wird abgelassen)

Kum Steilens Klaus – jetzt hoschde –
ä Fenschder als Erinnerungsposchde.

Sai ned bäis – un denk dro glei!
es is a noch Werbung fa doi Lädl debei.

Kumm Theo mer drinke zum End,
uff em Klaus un em Kronauer soi Hexepatent.

In Hemschbach s´is ä aldi Leier,
do is de Hausmüll ziemlisch deier,

In Abfalloomer voll bis ruff,
koschd mer wie en Besuch im ….. (Mundschenk:) heer uff.

Die AVR, iss im Rechne spitze,
koh Wunner – wonn sich do die Gemüter erhitze.

Doch´s schlimmschde is, bei denne Borscht,
daß jeder Oomer extra koscht.

 

Des macht a, unserm Bauhouf Sorge,
weil viel Leit jetzt privat ensorge.

Oom Tierpark dohinne, guckt eisch emol um,
s´fliegt iwwaraal de Dreck erumm.

De Biomüll ab in de Gaade,
uff die Rattezucht – Anlage.

Worscht unn Fleisch, un sou musses soi,
kimmt in de Kompostierer noi.

Un Leit gibt´s, des wird interessiere,
die duhn im Abbort kompostiere.

Sou zum Dunnerwetter,
wern in Hemschbach die Ratte – immer fetter.

Die gräischd Ratt uffm Hausmüllberg,
is die AVR in Heidelberg.

Fer de Müll, duhn jetzt zwar die Kreisrät beschließe,
awwer denne ehrn Geldbaitel – musses genausou bieße.

Auf Mundschenk los schnell die Korke krache,
bevor die aus Abfall – unser Bier noch mache.

Jahrelong schun isses ä wischdischi Sach,
ä Pisshaisel muß her fer unser Hemschbach.

Gar mancher Parre hot schunn berischt
funn de Bemiehunge vum Rothaus in dere Gschicht.

Jetzt allerdings hot´s en Vorfall gewwe,
den muß ma bestimmt emol zum Olaß nemme,

In dere Sach fer Abhilf zu sorge,
wann a ned haid, donn spedeschdens morge.

Ä Laurebescher Persönlichkeit, daß ers wißt,
hot on de Hemschbescher Bahnhof gepißt.

Unn daß es in Hemsbach – kooner duht sehe,
nimmt der soi Fraa zum Schmiere stehe.

Fünf Hemschbescher hawwe den Froschpisser vaawischt,
un mir des für die Redd berischt.

Isch hebb sofort moin Bleistift gewetzt,
doch isch derf denn net nenne, wäiem Dateschutzgesetz.

Unn owwedroin noch, wie könnts onnerscht soin,
wernn die Frösch gestützt vumm Tierschutzvaroin.

Domit war des Thema glei vumm Disch,
bei uns is halt prominent nur – de Theo un isch.

Isch bin awwer der Moinung aa in Frosch is ko heilischi Kuh,
drum hört mir jetzt mol all gut zu.

Mir mache e Umfrog – des is doch klar,
wer den Noome fumm Pisser hern will rieft jetzt laut ja.
(Pause)

Des ja war zu leise – do halt isch moi Gosch,
ich mach nur noch oons – isch trink uff den Frosch.

Theo mer trinke onner uff dem Frosch soin Brunser,
die Hemschbescher Kerwe – die bleibt unser.

Des wär fa heit, moi Kerweredd,
fa monschen war se gar ned nett.

Ich bitt Euch um Vergebung hier,
mit jedem trink isch Woi unn Bier.

Den isch verletzt mit Hohn unn Spott,
verzeihe dut´s de liewe Gott.

Ich empfehl mich jetzt – gäid ned fort sogleich,
gaid liewer in ä Straußwerdschaft unn füllt Euer Baisch.

In besonnere Wunsch on die Originale,
duht jo – genau eier Zech bezahle.

Unn schdellt ooner was o – sagt mas glei,
donn kimmder negschd Johr in die Kerweredd noi.

Zum Schluß kommd mer noch en Gedonge,
isch will mich noch emool bedonge.

Isch donk jetzt erschd emool alle Persone,
die do in unsarä Kerwegass wohne.

Beim Bojemoschder moim Chef, bedonk isch misch flott,
weil der mer moi Kerweredd gschriwwe hodd.

Moi Kerweredd is roini Satire,
beschwerd äisch desswäie beim Bojemoschder om Dunnerschdag ab Viere.

Beim Streewels Bernd bedonk isch mich nicht,
der hot mich als Kerweparre verpflicht.

Kerwevadder Wilhelm donke schee,
faa manche ä gute Kerwe Idee.

Aisch Straußwärtschafte ä grouß Kombliment,
ehr hedd aisch widder noigerennt.

Unser Kerwe ist Hemschbach´s gröschdes Feschd,
des iss äisch zu verdonke – eisch Kerwegeschd.

Herzlichen Dank für alle die kamen,
isch gäi jetzt euer Parre Thomas – Amen.