1.
Isch griess eisch all emol do drunne,
de Kerweverein hot wia mol en dabedde gfunne.

Es is halt e Elend meine Damen und Herrn,
wer will donn heit noch Parre wern ?

Isch mach des gern, ehr kennt mers glaawe,
doch dodezu muß isch eisch saare,
bescheiden wie es sisch geziehmt,
Hemschbach Du hoscht misch verdient.

Vor zwee Johr heb isch schunn fun dem Gerischt,
sou monschem gsad was Sache ist.

Dodrin bin ich geübt wie ehr glei seht,
moi Redd fun domols sogar im Internet steht.

Als gescheider Bu heb isch heit Nacht,
e bissel Geschischtsforschung gemacht.

Am Anfang war nichts,
un der Geist des Parre schwebte im All,
er lies ohner fahrn, des war der Urknall.

Ehr werds net glaawe awer ich sags gonz frei,
uff Noahs Arche war als blinner Passagier de erschte Parre debei.

Bei de Neandertaler isses donn weitergonge,
nur hot dem soi gebabbel kooner verschtonne.

Speter war die Kerwe es is ungeheier,
donn e keltischi Sunnwendfeier.

Ohn Parre kam seinerzeit uff leise Sohle,
hot de Kleopatra, die Uschuld gestohle.

Donn war do mol ohner, des is a kohm bekonnt,
mit Könisch Karl dem Grosse verwond.

Zwa Johr, bevor de Kolumbus Amerika osteiert,
hot mer in Hemschbach nochweislich Kerwe gefeiert.

Isch trink jetzt erscht mol, – unn manscher is jetzt verwunnert –
Uff misch – de letschte Kerweparre – im 20ste Jahrhunnert.

2.
Vor Woche uffeme Fescht, do hot sich de Landrat brüskiert,
dass unser Kersch ehrn Butz verliert.

Die Deck, die Wänd un de Aldar sehn aus,
ehr leit, ehr leit des is en graus.

Kennt ihr die net emol iwwerhole ?
Antwort fum Ullmer: Mer hewwe ko Kohle !

Er hätt schunn e Briefaktion gestart,
un hätt Woche vergebens gewart.

Quenn Mum, Hans Eichel odder en onnere fun de Reiche,
kohner lässt sich fa e Spend erweiche.

A de Erzbischof hot festgestellt,
er hätt alles, blos koh Geld.

Des Denkmolamt in Stuttgart drowwe,
hätt ah de Zuschuss fortgeschowwe.
Die Stadt hot selbscht genung Gelersch,
hot koh Geld fa unser Kersch.

Un jetzt, jetzt isse zugerommelt,
weil se vor sich hie gegommelt.

Deshalb hot de Veroin beschlosse,
sich was oifalle zu losse.

Mer wisse e Lösung, mer sinn die Spitze,
mer wisse wie mer de Ullmer unnerstitze.

Mer sammle daß die Gelder komme,
net alloh nur fun de Fromme.
Ob katholisch oder evangelisch,
alle seid ehr kerweselisch.

Ah die Britta kennt ehr seh,
iwwer unser Kerwe geh.

Die Kersch is unser aller Erwe,
is de Grund fa unser Kerwe.
Denn ohne en Sankt Laurentius,
do is mit unsrer Kerwe Schluss.

Ich bitt eich um e klohni Spende,
möget euer Haupt ihr Wende,
do unne zu de Ministronte,
die mit denne Halsgirlonde.

Un ball do werd, ich will net prahle,
in neuem Glanz die Kersch erstrahle.
De Markus konn orgeln, de Ullmer zelebriern,
kohner fun de Kerschgänger braucht sich de Arsch zu verfriern.

Gebbt e paar Mark fa die Kersch, unser Erwe,
lang lebe unser Hemsbäscher Kerwe.
Prost.

3.
Frier do hot ma sich in Hemschbach vertrage,
un heit do dut ma sich in Hemschbach verschlare

Seit de Wahle ehr leit, des find ich net schee,
gibts halt in Hemschbach kohn zusammehalt mee.

Sogar gonze Familie werre gelitte,
die sinn seit de Stadtratswahle zerstritte.

Funn ause betracht war die Wahl e gepader.
Grad wie e schlechtes Bauerntheater.

Theatersticke weje de Longeweile,
dut ma bekonntlich in korze Akte oideile.

Bevor jetzt de erschte Akt beginnt,
de Parre e Schliggl zu sich nimmt.
4.
1. Akt Wahlkampftheater

Wer forgs Johr dorsch Hemschbach fährt,
der hot geglabt er sieht verkehrt.

On jedere Stroßelatern do hengt e Schild,
de Wahlkampf, der war diesmol werklisch wild.

Isch fand des gut, weil die Plakatierung die wilde,
besinnt mich on de Urlaub in siedliche Gefilde.

Un donn im Oktower isses sou kumme,
die mit de Plakate hewwe werklich gewunne.

Siwwe Leit im Stadtrat die Wahl war bestonne,
doch donn isses Theater erscht rischtisch lousgonge.

Bei denne Plakatierer war ohner debei,
der wollt halt ah in de Stadtrat noi.

Ich heb geglabt ich her net recht,
der Kerl, der hot die Wahl ohgefescht,
unn grigt om End sogar noch recht.

Die onnern Parteie die hawwe des genosse,
de Wahlsieger hot sich e Eigetor geschosse.

Uffem Rothaus do hot ohner falsch gehondelt,
der hot zwa Wählervereinischunge wie Parteie behondelt.

Er hots halt wia sou gemacht wies schunn immer war,
seit em Krieg is in Hemschbach kohn Wahlausgang klar.

Isch heib jetzt moin Bescher mit gepader,
des war de erschte Akt Wahlkampftheater.

5.
Der Mensch der braucht Urlaub, des war schunn immer so,
des gilt nadierlisch ah fer die Familie Dugimont.

En echte Fronzous fährt noch Fronkreich ehr Leit,
un vor Woche donn wars a wia mol soweit.

Sie fahn nach Discho parkes Auto un donn weiter,
mit em Boot uffem Fluß, es Wetter war heiter.

Sou hawwe se sisch zwaa Woche fum Schtress erhohlt,
unn donn mitem Auto wia hohm gewollt.

De Alain merkts als erschter wia on soin Karre kimmt,
dass irgendebbes on dem Warre net stimmt.

Er greift sisch on de Kopp, des hotter bis heit net kapiert,
häwwem doch soi Landsleit die Nummernschilder abmontiert.

Freidags middags uff die Polizei un des gonze gemeld,
unn donn in Deitschlond bei de Versischerung ohgeschellt.

Die saagem Alain a bleiwe se noch e bissel hier,
am Mondag kimmt donn mit Schilder unsern Kurier.

Des kimmt gar net in Frog säigt de Alain jetzt wild,
do fahr isch halt hohm grad ohne Schild.

Gäit in en Lade dut sisch e paar Sache hole,
hockt sisch uff die Gass un fängt oh zu mole.

Mit zwa Schilder aus Pappe fährter etwas speter,
zurick noch Deitschlond, cirka 700 Kilometer.

Sie warn fascht in Karlsruh do werdsene gonz flau,
en riese Unfall, fascht zeie Kilometer Stau.

Die Autobohn voll fun Polizei,
winke freundlisch den Dugimont vorbei.

De Alain konn des bis heit net verstehn,
kohn Polizist hot soi scheenes Nummerschild gesehn.

Un dehohm in de Garaasch säigt er zu de Hilde blouss,
isch mach jetzt uff Kunschtmoler, do bin isch gonz grous.

Isch trink jetzt emol, des muss jetzt mol soin,
uff de Ehrevorsitzende fum Kerweverein.

6.
Zwaa Hemschbescher Fraue, des konn isch verstäin,
die wollte mol gut esse gäin.

Grous fort wollte se net ich sags eich gonz offe,
do sinn se halt in die Turnhall geloffe.

E fertel Stunn long do häwwe se gonz interessiert,
die Speisekart nuff un nunner studiert.

Bestelle zwaa mol Schnitzel, Pommes Salat
aussergewehnlich war des jo net grad.

E weil speter des is ungewöhnlich,
serwiert de Gastwirt höchstpersönlich

Do häwwe die Weibsleit die Nas nuffgezoge,
uffem Deller do warn Nudeln mit Schweinebrote.

Der Gastwirt erklärt de Frau Müller un Laier,
des kennte se ruhig esse es wär genauso deier.

Der Brohte wär gut unn nett sou fett,
Schnitzel unn Pommes des gebts heit halt net.

Do häwwe die Fraue mit vornehmer Blässe,
alle zwaa schee ern Deller leer gesse.

Moin Mundschenk un isch mer gäin moje hie,
uff de Kart do stäit Cevapcici,
warscheins gibts donn Kartoffelbrie.

Auf Mundschenk schenk mer ohner oi,
es muß emol getrunke soi.

 

7.
Autofahrn is ziemlisch deier,
koscht Sprit Versischerung unn Schteier.

Un hoscht zwa Autos, do muscht wisse,
gäits doim Geldbeitel ball beschisse.

E Fraa in de Graweschtross kimmt sou zu dem Schluß,
isch loss de Karre in de Garasch un fahr blouß noch Bus.

Die Stadt sponsert Karte, des is schunn en Grund,
unn bei Wind un Wetter on de Bus, do bleibscht a noch gsund.

Sie flitzt mojens on die B3 weil se die Linie 22 nimmt,
un sou pinktlisch zum Geschäftsbeginn noch Woinem kimmt.

Doch Somschdags mojens im April, sou um dreifertel neune,
is rä ebbes bassiert, es war fascht zum Groine.

In forschem Schritt isse die Schlossgass nuffgerennt,
doch on de Brauche Käthsche hat des gonze e End.

Fun rechts noch links gäit en grouße Zaun,
lässt sisch net bewege des war net grad en Traum.

Sie guckt noch em Helfer, zu zweit meests doch gehn,
doch Samschtdags mojens um neune is do ko Aas zu sehn.

Sie probierts owedriwwer un hengt on dem Gitter,
do fährt grad de Bus vorbei, ehr Leit des war bitter.

Also wia zurick uns Auto genumme,
halt ä bissel zu schpäit noch Woinem kumme.

Zeie Mark fers Parkhaus, des war escht zum plärre
blouss weil die Hemschbescher ohfach Schtrosse zuschperre.

Isch trink jetzt emol, du was in moin Hals enoi,
isch heb gehert die Fraa steigt seitdem on de alt Kinnerschul oi.

8.
2. Akt Wahlkampftheater

Die alte Parteie konnte gar net verstäin,
warum blous 60 % Hemschbescher wehle gäin.

Doch bei de Wahle im Mai do warn se sich klar,
wählt uns jeder Mann unn jedi Hemsbäscher Fraa.

Um des zu erreiche hot ma Loim ohgeriehrt,
unn Hemschbach jetzt völlich zuplakatiert.

8 Daag speter ehr Leit des war gonz bekloppt,
häwwe se die Plakate wia runnergerobbt.

Der saubere Wahlkampf moin liewer Monn,
der is mit de Zeit immer dreckischer worn.

Mit Prozesse unn Leserbriefe es war gonz verrickt,
hot mer sich gejeseitisch die Grutz zugedrickt.

In Parteizeitunge do hot so monscher sein Nome verschondelt,
awwer des Thema werd fun mir speter extra behondelt.

Der alte Stadtrat der hot noch bis in de Mai noi regiert,
un der is förmlich explodiert.

Die häwwe sich selbscht gedreht unn gedehnt,
die Kreisstroß wurd sogar nochträglich abgelehnt.

Mer hot fer die Mischelhall e neies Dach beschlosse,
sogar Solarzelle wolle se druffbaue losse.

Hätt mer mit de Nochwahle noch e bissel gewaht,
mer kennte wia schwimme im Hallebad.

Unn im Tierpark dohinne des geb ich zu beachte,
kennt ma wa Ponys un Wildsai betrachte.

Vielleicht hätte ma a, un isch schließ jetzt den Satz,
sou wi frieher en scheene Minigolfplatz.

Ich heib jetzt moin Becher mit gepader,
un trink uff de 2. Akt Wahlkampftheater.

9.
Kerwe des waas mer un net nur als Christ,
dass des Fescht Laurentiuspatrozinium ist.

Mer dut net nur feiern, trinke un esse,
sondern gäit ah in die Kersch um den Sinn net zu vergesse.

De Kerweparre, de Vorschtond un die Kerweborscht,
gäje Sundags mojens dohie un vergesse ehrn dorscht.

Un donn gibts denoch dort Riwwelkuche un Woi,
sou gäit des schunn seit Johrn, des is rischtisch foi.

Un letscht Johr beschliesst mer, des werd ökumenisch,
beim feiern do gibts ko katholisch un evangelisch.

Die Glocke leite, die Kersch is schee voll,
doch kohn katholische Parre zu sehn, des war net sou doll.

De Ullmer in Urlaub wie immer weit fort,
de Kaplan hält die Mess onneme onnere Ort.

Weit un breit nix zu sehn fum Diakon Müller,
on Laurentius kohner do, des war escht de Knüller.

De evangelische Parre mit soim Posaunechor
im katholische Chorraum schtellt eisch des emol vor.

Die Frau Friedrich hot gebet sou notgedrunge,
uff de Empore hot de Kerschechor wie immer schee gesunge.

Des hot de Chrischte noch imponiert,
die häwwe om Schluß ziemlisch applaudiert.

Awwer on Laurentius kohn Parre, do hawe viel Leit gemeckert,
do hot sich die Geistlichkeit net grad mit Ruhm bekleckert.

Doch ohner hotsem gsad, des war gar net nett,
Herr Parre heit sin se in de Kerweredd.
Do war der gar net driwwer froh,
un deshalb warer heit a do.

Isch trink jetzt mol wie en Berschtebinner,
uff die Parre un onnere Kerwesünder.

10.
Die forsch Woch, war ich gonz verwerrt,
wäjem Sulzbescher Ochsewert.

Der hot in Hemschbach Plakate uffghängt,
bei ihm spielt e gudi Tanzmusikband.

Ich heb gemohnt ich wer verrickt,
de Ochsewert hot sich vornehm ausgedrickt.

Kirchweihfest stand grous un brat,
statt Kerwe uff soim Werbeplakat.

Der Ochsewert, des war donn klar,
schreibt Kirchweihfest mit S – C – H.

Wonn ehr emol dorsch Sulzbach fahrt,
guggt jo net uff dem soi Wertschaftsplakat.

Do stäit Preis mit scharfem „ß“ un Schnitzel ohne T.
Vor lache – siegscht die stross nimmee.

Mundschenk schenk oi, los misch net sou stäin,
de Ochsewert kennt emol uff die Volkshochschul gäin.

11.
E Tradition gonz ohne Schwanz,
on Walpurgisnacht is Hexedanz.

A dis Johr, sou wie mer se kennt,
sinn die Hexe om Hartmus um e Feier gerennt.

Mitternacht noch 12 Uhr am erschte Mai,
die naggische Hexe mache e geschrei.

Sie wolle all donze, doch meine Fresse
hot oh Hex die Musik vergesse.

Donn hewwe se halt in Trance gonz benumme,
e paar Hemsbescher Kerweborschtlieder gesunge.

In Hemsbach do gibts ah e Hex die heest Klaus,
die kennt sich gut mit Stereoohlage aus.

Fer die Walpurgisnacht jetzt losst mich mol spinne
kennt mer den jo als DJ gewinne.

Des werd a nix koschte jetzt krigt mol ko Falte,
weil Hexe die misse zusammehalte.

Auf Mundschenk schenk mer ohner oi,
es muß ah mol getrunke soi.

12.
Wahlkampftheater 3. Akt

Im Mai warn die Stadtratswahle ohgefonge,
die etablierte Parteie sinn unnergonge.

Unn der der ohgeblisch e Eigetor geschosse,
hot jetzt als Elfmeterschütze getroffe.

11 neie Stadträt ohn Kopp unn ohn Arsch,
des war fa die Alte e groußi Blamahsch.

Die kennes bis heit noch net verstäin,
warum blous 50% Hemsbescher wehle gäin.

Ich sags eich als Parre un als Wähler,
in de erschte Wahlanalyse war schoinbar en Fehler.

Die Stroß war zwar e Thema der Wahle,
doch do liegt net der Hund begrawe.

Weil die Fraa, die schunn immer geje die Kreisstroß gerunge,
die is a nimee in de Stadtrat noikumme.

De alte Stadtrat der hot sich halt faht,
mit Gewalt kaputtgespart.

Unn die neie die hewwes halt plakatiert,
in Hemschbach werd wia investiert.

Wollt ihr Stadträt in 5 Johr net groine,
donn spahrt net on Hemschbach un on de Veroine.

Die leit die sich seit de Wahle nimee vertrache,
kennte longsom es Kriegbeil begrawe.

Donn Hemschbach regiert, macht die Ohrn uff donn horschter,
schun eh un je de Bojemoschter.

Ich her jetzt uff mit meim gepader,
des is de Schluss vom Wahlkampftheater.

14.
En Hemschbescher Gastwirt des is schee,
der fährt en dicke BMW.

Un wer den Wert kennt, dem is klar,
des Auto butzt die Monika.

Schene daags es war im Winter,
do butzt donn selbscht de Mangolds Ginter.

Unn weil der Kerl om Geld net spaht,
do fährt ern in die Waschohlag.

E sauweres Auto braucht der Monn,
er nimmt des volle Waschprogromm.

Nochem zweite Wäsche fällt em oi,
eigentlich meest die Ontenn noch noi.

Er sterzt in die Ohlag wie verrickt,
hot die Ontenn mit de Hond noigetrickt.

Doch wia rauskimmt ungelorre,
do warer mit heißem Wachs iwwerzorre.

De Ginter hott jetzt geglenzt wer hätt des gedacht,
doch de Motor fun de Ontenn hotter om Arsch gemacht.

Seitdem wäscht soi Auto wia die Fraa,
Mundschenk, mer trinke mol uff die Monika.

15.
Domit die Leit on Fasnacht lache,
mache viele Unnerhalter gonz ernschte Sache,

do werd geprobt, studiert, gemacht,
dass a oin jeder on de rischtisch schtell lacht.

Woikenischin Carina un Thomas de Kerweparre,
probe en Sketch, dasse lache die Narre,

Sie ihwe in de Tornhall, es derf kohner gucke,
un zwischedrin dun se oneme Wasser nur schlucke.

Doch donn kimmt de Hunger fum viele probiern,
also schnell in die Wertschaft, der soll was serviern.

Sie erzähle un kischern un warte uff die Speise,
derweil dun sisch die Leit die Meiler verreisse.

De Thomas merkt des als erschter, fregt is was ehr Leit,
un guckt on sisch nunner, donn waser Bescheid.

Vor lauter Probe, bei all der Mieh,
vergesse die zwa sisch ohzuziehe.

Un hocke in de Wertschaft, des is jetzt kohn Witz,
er in de Unnerhosse sie owwe fascht nix.

Schoinbar hot er net gefrorn, isch sags gonz verwege,
denn de Bademontel hot uff de Bonk gelege.

Was häwwe die Leit in de Wertschaft gelacht,
net weje dem Sketch, awwer weje de Unnerhose -Größe acht.

Isch trink jetzt en Schluck, uff Fasnachter un Narre,
un uff de Pohl, de letschtjährisch Kerweparre.

16.
In de Zeitung do stands dick un fett,
Kerwe un Heimatverein im Internet.

Ich will eich jetzt net mit Werbung quäle,
doch die Seit Kerwe.de die is zu empfehle.

Ich war 20 stunn drin, 40 Mark ginge bade,
hab a alte Kerweredde runnergelade.

Un jetzt basst emol all uff do drunne,
zum Thema Michelhall hab ich was in Paulis Kerweredd gefunne.

Gehalten am 2. August 1981
Kerweparre Volker Pauli, Mundschenk Thomas Schneiderheinze,
1. Kerweborscht Bernd Ströbel

De Gegner wird es Ongschd un Bong
rolle Hemschbachs Sportler on.
Sogar in Canaria gibts Gerüschte,
die Hemschbescher, die sinn zum Fürschde.
Doch dehom in de Mischel-Hall,
werd des en umgekehrter Fall.
Isch des hier mol sage muß,
schunn beim kloonschde Rejeguss.
Vielleischt hebbt ehrs a schunn vernumme
dud ene die Ongschd schunn aus de Aare kumme.
Die hewwe Ongschd, des is ko Witzsche,
vor riesegrouße Wasserpitsche.
Om Samschdag, es war bei me Hoimspiel,
do hotts gerejet e bissel viel.
Drin hots gedropst, s`is runnergeloffe,
faschd wär die Hall noch abgesoffe.
Des Spiel musst unnerbroche wern,
sou war des do Ihr Dome un Herrn.
De Hedderichs Karl, de Bauers Herrmann,
die kame mit dem Lumpe an.
Die Spieler tate a mitmische,
un finge oh mit uffzuwische.
Isch frog eich, die ehr die Stadt dut representiern,
kenne mer uns net besser blamiern ?
Alla drum e bissel munter,
om Mittwoch kimmt des Dach erunner.
Om Dunnerschdag kummt nuff e frisches,
donn herts mol uff des Uffgewisches.
Mit eich Stadträt stouss ich immer noch net oh,
jetzt sinn erscht mol die Sportler dro.

De Volker hot domols e scheenie Kerweredd gehalte,
doch in de Mischelhall drinn blieb alles beim alte.

Seit 20 Johr des is net foi,
tropst do immer noch es Wasser noi.

Ich kipp mer ohner in die Kehl,
un trink uff unser Tropfsteinhehl.

17.
Inneme Wohn un Geschäftshaus in de Graweschtross,
do wohne viel Leit drin, klo un gross.

Jeder verschteit sisch, `s gibt ko gezank,
`s is alles schee friedlisch, Gott soi Donk.

Vor e paar Woche awwer, `s war mojens um Acht,
do hots dovorne heftisch gekracht.

Der Italiener Luigi war schunn frieh om werke,
schtellts Wasser ab, un mohnt kohner duts merke.

De Rischter hot grad soi Zeh gebutzt,
koh Wasser meh do, was warer verdutzt.

Soi Marlis unner de Dusch dut schee erschrecke,
ja soll isch den Schaum mit de Zung abschlecke ?

Die Gabi owe säigt des is gar net schee,
wie krig isch jetzt moi Schönheitsmaske fum Dekolltee.

Mitm Rasierschaum im Gesischt kimmt de Ehret gebraust,
un schennt warum issen ko Wasser im Haus.

Die Frau Sorn hot im Keller die Weschmaschien laafe,
denkt die is jetzt kaputt, isch muss e neji kaafe.

Dem Zohdokter gäie die erschte Patiente verlorn,
weil ohne Wasser konn der net bohrn.

Was warn die all beis, es war escht beschisse,
mer konnt sisch net wesche, mer konnt net emol Pisse.

Blous weil sou e Mennele, isch sags ohne Schpott,
dem gonze Haus ohfach des Wasser abgeschtellt hot.

Isch trink jetzt en Schluck fum Woi dem Rote,
dem Luigi häwwe se es Haus verbote.

18.
En Wäschetrockner is en Kaschte,
der dut sou monschi Fraa entlaschte.

Bei Ablufttrockner des is wohr,
gäit hinnenaus e Abluftrohr.

In de Bachgass do drunne, hot ohner net bled,
dorsch die Hauswand des Rohr in de Hof naus gelegt.

Soin Nochbar ehr leit, des konn isch berischte,
dut Sai, 40 Hase un Hinkel zischte.

Der Nachbar macht e mords Geschrei,
der Hof stinkt wie e Wäscherei.

Er war de ganze Dag am Motze,
die Sai gregte Ausschlag un die Hase den kotze.

Do hot de Fernandez, des is net gelorre,
des Abluftrohr uff die Stross nausgezorre.

Ball druff do sieht ma den junge Fred,
wia em Nochbar es Rohr absägt.

Ehr Kerwegäscht ich mach kohn Witz,
der Fred säischt laut des Rohr bringt nix.

Om End do warn se vor Gerischt,
des gefällt mir, als Parre nicht.

Dir Rischterin, sou hab isch vernumme,
is extra noch Hemschbach zum riesche kumme.

Seitdem sin se halt verstritte,
die Nachbarschaft hot schwer gelitte.

Als Kerweparre sag isch hier,
ehr liewe Leit, vertragt eich wia.

Gäit uff die Kerwe, losst de Kummer zu Haus,
isch geb eisch ah e Birsche aus.

Mundschenk schenk oi, bei mir hilft kohn Dokter,
ich kotz net wäjem Wäschetrockner.

19.
Unsern neie Stadtrat hot sich im Mai getroffe,
un schunn is alles gonz onnerscht geloffe.

Die Sitzordnung im Rathaussaal
wars Thema eins glei noch de Wahl.

Pro Hemsbach, a PH genannt
wollt noch rechts uffs schwarze Land.

Die schwarze fonge oh zu douwe,
mer gäin net niwwer zu de Route.

Die Route hawe a gegroint,
rechts hockt normal der Klassefeind.

Der freie Wähler un die Grie,
die musste a wo onnerscht hie.

Ä halwi Stunn long kommer sage,
warn Zuständ wie im Kinnergarde.

Donn is de Pauli aus der Mitte
Kraft seines Amtes oigeschritte.

Er mußt in den saure Appel noibeisse,
un jedem Stadtrat soin Sitzplatz zuweise.

Seit dem wie in de Kinnerschul,
säge se on Paulis Stuhl.

Ich hebb domols gemohnt mich häibts aus de Socke,
a denne Stiehl werds egal soi was fer Glutähe druffhocke.

Glutähe ehr leit ich sags eich gonz barsch,
sinn Muskeln die bilde de menschlische Arsch.

En Vorschlag fun mir un der is net banal,
stellt dem Silver soi Reitschul in de Rothaussaal.

De Bojemoschter wie Ben Hur,
hockt vorne als Gallionsfigur.

Donn dreht sisch des Stadtratskarusell,
un jeder kimmt mol on jedi Stell.

Auf Mundschenk schenk oi sunscht isses zu spät,
on moim Stuhl werd heit ah noch gesägt.

 

 

20.
Des negschte Thema isch sags unschenniert,
dreht sich ums Saufe, weil do meischtens was bassiert.

En Monn unn soi Fraa, kumme späit owends noch Haus,
de Hausschlissel vergesse, des war schunn en Graus.

Doch der Monn net in Panik, behellt erscht mol soi Ruh,
mer wecke unsern Bu, dem soi Fenschter is net zu.

Un weils schunn sehr speht is, probiert ers erscht mol gonz sacht,
doch es bassiert leider net sou wie er sichs gedacht.

Er hott halt zu dem Zeitpunkt noch net gewisst,
dass soin Christoph bei de Pfadfinder gewese ist.

Dort hotter gezescht, dut uffem Hohmweg nur lalle,
un is dehohm mit voller Montur ins Bett noigefalle.

De Vadder werd lauter, er will endlich ins Haus,
dem Christof soi schnarsche des heert er bis naus.

Der Alt, e ziemlischi Wut jetzt im Bauch,
greift sich em Nochbar soin Garteschlauch.

Des Zimmer gewässert, soin Filius geweckt,
der uff ohmol, hellwach unn ziemlisch erschreckt.

Lässt die Alte ins Haus un dort wern se blass,
de Deppisch, di Schränk alles war do klatschnass.

Doch alles Jammern un Klage hot nix genutzt,
bis mojens um fünfe häwwe se Zimmer gebutzt.

Jetzt brauch ich en Schluck un heib mol moin Bescher,
uff de Pfadfindervorstand un onnere Zescher.

21.
Es Ströbels Eck is als Wertschaft bekonnt,
die war frieher mol fescht in Erleschorschs Hond.

Mer hockt halt gern unn lange hier,
unn trinkt soin Woi unn ah soi Bier.

Do war letscht ohner stark debei,
trinkt erscht fünf Bier unn donn neie Woi.

Uff ohmol is der spurlos weg,
de Kneipe Werner krigt en Schreck.

Unn schennt uff alles in de Welt,
jetzt hot der Kerl soi Zesch geprellt.

Doch Gott sei Donk, er kennt den Borscht,
unn waas der hot moje ah wia Dorscht.

Die Zeit vergeht, de Feierowend war net weit,
do hot uff ohmol soi Telefon geleit.

De Zeschpreller in de Leitung, de Werner war fun de Socke,
der säigt er det uffem Abbort druff hocke.

Wär schunn seit drei Schtunn uffem Örtsche hier,
unn braischt nur e paar frische Unnerhosse unn viel Klopapier.

Wobei er newebei noch säigt,
daß neie Woi un Bier sich net sou verträgt.

Fügt noch hinzu, er wär am verrecke,
awwer zum Glick hotters Handy oistecke.

Ma waas net genau, un ma werds ah nie wisse,
vielleicht war des Handy jo ah noch verschisse.

De Gräbers Walter ich mach jetzt koh bosse,
trägt seitdem dem Ströbel soi unnerhosse.

Unn die Moral fun derre Gschischt,
wonnd seifscht vergess doi Handy nicht.

Ich heib jetzt moin Bescher, isch bin sou frei,
unn hoff ehr hebbt all eier Handy debei.

22.
Letscht Johr, do gabs e Geschrei um e Scheier,
die war net genehmischt un des werd donn deier.

Die Nachbarn warn sauer, die Schutzmänner warn da,
daß des net so soi konn, des is jo wohl klar.

Domit negscht Johr nix schief gäit, do due die Buwe,
ä rischtisch Scheier in de Kerwegass buche.

Ich trink uff die Buwe mit ihrem Malör,
ich sags eich schunn dis Johr, die Piratescheier muß her.

23.
Zum Schluß ehr Leit, wie konns onnascht soi,
noch en Spruch zu unserm Kerweveroin.

Zu denne Vorständ sag isch leise,
neue Köpfe alte Scheiße.

Doch oh Idee war werklisch fett,
de Kerweveroin im Internet.

Iwwer 5000 warn drin ich mach jetzt koh Sache,
ma konnt ah beieme Gewinnspiel mitmache.

Ä Reis, ä Fahrrad en Roller wie foi,
konn mer nochher Gewinne beim Kerweveroin.

Innere halwe Stunn sou nemm ich oh,
fängt drowwe uff de Bühn die Verlosung oh.

Des war moi Redd ehr liewe Leit,
ich gab mol wia moi beschtes heit.

Unklarheite sinn beseidischt,
ich heb ah niemand grouß beleidischt.

Es hot misch gefraht, das wia so viele kamen.
Proscht ehr leit in ewischkeit Amen.