Die Kerweredd

Kerwepfarrer: Sascha Dittmar
Mundschenk: ?
Kerweborscht: ?

Einleitung

Isch gries Eisch vun dere gaglische Brick,
des letsche Mol welch schlimmes Geschick,

Denn des is net üwwertriewwe,
heit wärd Kerwegeschicht geschriewwe.

Isch stai do owwe net äloo,
Mundschenk und Borscht sin a noch do,

Dem oone isses glatt gelunge,
der hot den Werner Flemming Pokal 3 mol gewunne,

De onnere in soim weise Kittel,
der schenkt mer oi, un net nur a bissl,

un zum zwotte Mol des is Eisch klar,
liest Eisch die Levitte de Dittmar.

Isch gries Eisch all vun nah un fern,
Isch gries die, die mir brav zuhärn,

Isch gries Eisch do owwe un da unne,
Isch gries die aus waas waas isch wo kumme,

Isch gries die schlaue und die doofe,
die die schaffe, un die die beim schaffe schloofe,

Isch gries die Kinna in der Gasse,
die wu ´Farbisch sin un a die Blasse,

Isch gries die Trinker und Abstinente,
Isch gries die Leit, die net laut denke,

Isch gries de Bojemoschda un moi Kumpel,
un isch gries die Kerweschlumbl,

Isch gries die Rentner un onnere Alte,
Isch gries die, die wu ständisch die Händ uffhalte,

Isch gries die Kerweborscht do unne,
Isch gries Eisch all, die ihr seid kumme.

Was isch hier verzäil, des glabt ihr vielleischt net,
Jedes Wort is woar in moinerer Kerweredd,

Die Nome die isch nenn, sin net erfunne,
die Leit gibt’s wärklisch, ä paar seh isch do unne.

Auf Mundschenk geb mer mol en Woi,
Hoffentlisch loche se uns net oi!
Die Schadensmeldung

Wer in Hemschbach owens rumrennt und erkennt,
das net jedes Ladärnsche brennt,

der konn donn des jetzt – ohne Scheiss,
über das Internet melde, Hier ist der Beweis.

Als Schaden kommt in Betracht wie verwegen,
fehlende Schilder, Gullideckel un Löcher in Gewegen.

Do wärd man uffgerufe in amtdeutsch silwe,
zur sogenannten aktiven Mithilfe,

Um Schäden zu beseitigen, des is doch klar,
fülle mer nun aus des schäne Schadensformular.

Mundschenk schreib uff was der Veroin der Stadt,
alles an Schäden zu melden hat,

Die Brick die schwankt wie ä Fregatte,
mer brauche dringend Nägel un a Latte.

Moin Bescher is trogge un somit kaputt,
3-4 kalte Biersche des wär jetzt guud.

Am Kerwehäisl des fällt mer uff,
ghert a mol wirra Luft uff die Reife druff,

Die Schlumbl hängt schief un ghert ämol gerischt,
sagt Ehr Leit, seht Ihr das nicht?

Wo, der Umzug war, her je oh Schreck,
is leider die Gass doch ziemlisch verdreckt,

der Gullideckel vun de Schlumbl,
wenn isch misch nicht täusche,
der machte am Freitag komische Klappergeräusche.

Doch Mundschenk isch mach jedi Wett,
des Formular wird voll während de redd.

 

 

 

 

 

 

 

 

 

40 Tonner im alde Ort

Hemschbach hot zwo Kreisel, des is ganz doll,
awer en Fremder wes net, wie er uff die B 3 kumme soll.

En LKW aus Holland is letscht gonz verwirrt,
mit soim 40 Tonner im alte Ort rumgeirrt.

Wie er in de Frankfurter Schtroß is abgeboge,
war des Chaos perfekt, des is jetzt net geloge.

Es ging weder vorwäts noch rückwäts, die Ohwohner warn platt,
un häwe vielleischt Ongscht um ehr Heiser ghatt.

En haufe Monnsleit sin vorwäts un rückwäts gewetzt,
um dem Fahrer zu helfe, es war wie verhext.

Bis zum Bahnhof hot sisch de Verkehr schun gestaut,
ma hot gemont, do hot ohna en Mordsunfall gebaut.

Nooch fascht drei Stund sin die 40 Tonne,
endlisch Rischtung B 3 gestonne.

De Fahrer is entnervt die Bachgass nuffgedonnert,
Is in Hemschbach en Erdbewe?
Hot sisch monscher gewunnert.

Do frog isch doch heit e mol unser Stadträt gonz wild,
wieso is donn on unserm Kurpfalzkreisel ko Schild

mit nem Hinweis: uff die B 3 geht’s gradaus?
Do hätt ma doch endlisch die LKWs ausem alde Ort raus.

Un dieses Thema is doch klar,
ghört a ins Schadensformular.

Isch brauch jetzt en Schluck un sag eisch bloß,
om Frankfurter Kreiz is als nett so viel los.

Der Galgen

Om Dunnerstag uff dere Brick,
do installiere die Schmitte den Galge mit Strick.

De Maddyn un de Helle die froge a glei,
wie groß werdn der Kronz dodefer soi ?

In de letschde Johrn, do hing an dem Mast,
en Kronz, wo grad emol die Schlumbl dorchbasst.

Die zwa nicke sich zu, un mit Geschick
naggle die den Galge on die Brick.

Om Freitag moind, was e Gezeter,
steht on de Turnhall e Wagerad von 1 ½ Meter.

Uff die Statik ohgesproche dut de Maddyn es Gesicht verziehn,
do soll de Bojemoschter halt net so fescht am Seil ziehn.

Un als hätte mer geahnt was donn bassiert,
hawwe mer zum Glick noch zwa Kerweborscht uff de Brick installiert.

Un wie de Pauli zieht mit Kraweng un Gedunner,
kimmt statt em Kronz nuff de Galge runner.

Es gab ko verletzte un mer konnte all lache,
uff de Hemsbächer Kerwe bassiern halt die dollste Sache.

Mundschenk nemm doi Formular un du schreiwe,
nächst Johr muss die Stadt en neie Galge ufftreiwe.

Ich trink uff den Kronz un heb jetzt moin Becher,
die Brick hält Stand, zum Glick sin mir ko dicke Zecher.

Ägypten Reise

Reisen bildet, ma lernt wuonnerscht sehr viel,
für 4 Hemschäscher war im Frihjohr Ägypten das Ziel,

Ä Nilkreuzfahrt hawe se dort gemacht,
un zwische antike Gemäuer viel Zeit verbracht,

Awer nochra Woch Kultur, do is ma fascht meschugge,
do will ma ko Tempel un alte Gräwer mehr ogugge,

Also gings weiter, die vier freute sich sehr,
mit em Flieger zur Erholung ons Roude Meer,

In Luxor am Flughafe warn die Koffer verlade,
glei geihts in de Flieger, der bringt se zum Bade,

die 50 Passagiere sin im Bus zur Abfahrt bereit,
de Pilot is on Bord, glei isses soweit,

doch vun unsre 4 Hemschbäscher,
isch sags unumwunde,
war oom soi Fraa gonz plötzlich verschwunde,

vor 5 Minute war se doch noch do,
sie war a vorher schun längscht uffm Kloo,

ma hot inzwische wild spekuliert,
vielleicht hot se in Araber entführt,

der Monn war inzwische außer Rond und Bond,
do drückt em der Steward des Mikrofon in die Hond,

un in Luxor, wu sunscht alles arabisch durch de Lautsprecher dringt,
ganz plötzlich in Deutsch eine Stimme erklingt,

die säischt, ach Schatz wo bischt du donn bloß,
kum schnell her, sunscht fliege ma ohne disch los.

Plötzlich kum se ums Eck , un säischt zu ehrm Alde,
isch hab misch doch bloß im Souvenierlade uffghalte,

In Luxor hot ä Hemschbeschern isch sags mit bedacht,
on dem Dag de gonze Flugplon dorschenonna gebracht.

Kumm Mundschenk mir losse de Kopp net sinke,
mit dun uff die Hemsbäscher Urlauber trinke.

 

 

 

 

 

 

Singstund

Jeden Dunnerschtag owend, stellt eisch des emol vor,
probt im Pfarrsaal de Laurentiuschor.

Des Winde Erwin un soi Tochter sin do a immer dort,
gehen nooch de Tagesschau kurz nach de achte immer fort.
Doch letscht regt sisch de Erwin e bissl uff,
un rieft gonz bös die Treppe nuff: (andere Stimme)

seit re Stund left hier des Wasser, des is jo zum groine,
hoscht bald ferdisch geduscht, ei is gleich vetel neune.

Do kimmt die Märy die Treppe nunner,
awer es hot immer noch geplätschert,
des war jetzt e Wunner.

Die säischt zu ehrm Vatta gonz bestimmt: (andere Stimme)
Des hört sisch o, als wenns ausem Keller kimmt!

Do kriegt de Erwin en Schock, des war jetzt net foi,
denn im Keller lagert soin gute selbschdgemachte Woi!

Fun owe kam nix, do war alles normal,
e geplatztes Rohr im Keller, des war escht fatal.

Die Singstund war uff omol vergesse,
die häwe de Keller geputzt, wie besesse.

Un erscht ziemlich weit noch Mittanacht,
war die Woirettungsaktion vollbracht.

Isch was awer, dass de Erwin gonz ungeniert,
soine Gäscht seitem Frühjahr blouß noch Schorle serviert!

Do hilft ko Schadensformular, isch tu net iwwertreiwe,
den Schaden muss er soiner Versicherung schreiwe.

Isch heb jetzt moin Bescher un du hier vermelde,
isch trink uff die alte Hemsbescher Helde.

 

 

 

 

 

 

 

 

 

Pfarrer Ulmer

Moin Kollesch de Ullmer, er is jo net mehr long do,
un isch hab fascht de Oidruck,
er is dodriwer monschmol gonz froh.

Des was em letscht passiert is, ließ en gonz schee bewe,
des war en traurischer punkt in soim Hemschbacher Lewe.

Vom Owalt kam en Brief, de Ullmer war verzagt,
en Laurebacher Frosch hot en nämlich verklagt.

Weil ma des Kreiz uffem Kreizberg hot vasetzt,
hot en Laurebescha die Messer gewetzt.

Des Kreizbergteam hot gewirkt, is doch klar,
un de Kreizberg gemacht wie er früher mol war.

Wo die Kapell war, is jetzt e Mauer,
aus Sto net aus Holz,
des Kreiz mittedrin, do driwer war jeder stolz.

Doch kimmt heit e Klage, wird was unernumme,
do is gleich mol oni vum Denkmalomt kumme.

Un bei strömendem Regen hot die Frau gonz versesse,
mitem Ullmer un ehre Mannschaft de Kreizberg vermesse!

Donn macht die do owwe en Kompromiss,
un mont, (andere Stimme)
wege 5 Zentimeter mache ma doch ko Geschiss!

Un säischt donn gonz korz, und es war net verkehrt:
Die Klage aus Laudenbach ist abgewehrt.

Entfernt sisch vum Kreizberg ziemlich eilisch,
de Parre war froh, denn de Kreizberg bleibt heilisch.

Isch trink uff de Ullmer, bal isses soweit,
denn für ihn beginnt bal die Rentnerzeit.

 

 

 

 

 

 

 

 

 

Navigationssystem

En Hemschbescher Monn säischt,
isch fahr in Zukunft bequem,
un kaaft sisch e neues Navigationssystem.

Soin Freund mont des tu ma mol probiern,
des soll uns nach Woinem zum Marktplatz navigiern.

Sie starte in de Goethestroß, und vor de B 3,
soll des Auto Rischtung Pennymarkt noi!?!

Do mont de Fahrer des is vielleischt heiter,
mir fahrn uff de B3, die Stroß is dort breiter.

In Woinem säischt die Stimm gonz beflisse,
dass se hinner de Ourewaldbohn links abbiege misse.

Des mache se net, des is a net foi,
weil in dere Stroß derfe nur Olieger noi.

On de Brauerei biege se ab Richtung Diesbachhaus,
do mont des Gerät – nu jetzt geradeaus.

Do greischt de Walter, des is doch zum flenne,
des Scheißding dut net e mol Oibohnstroße erkenne!

Sie fahrn Friedrichstroße, Bohnhofstroße und on de Reiterin säischt des Dings,
un jetzt bitte abbiegen – und zwar nach links.

Die zwa gucke sisch o, des Gerät is doch meschugge,
fahrn ma links,
könne ma im Moderne de neischte Film ogucke!

Do is es dem Käufer longom zum dumm,
mir packe des oi und tausches wirra um!

Soin Kumpl hot e mol unterdesse,
die Gebrauchsoweisung rischtigsch dorschgelese.

Er fängt o zu lache, un mont donn: (andere Stimme)
Du mir fahr die gonz Zeit mim Fußgängerprogramm!!

Donn hawe se des Gerät richtisch programmiert,
un schun hot des Gerät a richitsch funktionert.

Isch trink e mol uff eisch all do drunne,
ihr habt die Kerwegass a ohne Navigation gfunne.

 

 

 

 

 

 

Badsanierung

Wonn mer dehom des Bad saniert,
do werd mer gonz sche schickaniert.

Konn weder Dusche oder Bade,
a mim Geschäft verrichte muss mer waade.

Un wonn werklich mol was im Ohflug ist,
mer sich schnell amol zum Nochbar verpisst.

Jetzt kimmt de Bu ins Bad un frägt gonz gebickt:(andere Stimme)
Herr Handwerker, bei mir do drickts uun zwickts!
(andere Stimme)
Do hoscht jetzt ko Chanc, des konnscht jo sehn,
gibt em de Webers Tim zu verstehn.

10 Minute späder kimmt de Bu ins Bad zurick,
im Gesicht diesmol en zufriedene Blick.
(andere Stimme)
Ging awwer schnell, odder hoscht nur geblöfft?!
So wie du geguckt hoscht, do war des doch a graiser Gschäft.

Ich bräucht alloh zum Nochbar hie fie Zeit,
ins Stockwerk runner so isses schunn weit.

Do nimmt der Kloh den Installateur uff die Seit,
un seischt: (andere Stimme)ich bin halt schun gscheit!

Machts Schloofzimmer uff un seijscht gonz froh,
(andere Stimme)siehscht du do hinne des Katzeklo?

En Haufe, wie en e Katz net scheener macht,
hot de Til im Katzeklo vollbracht!

Un die Moral, isch sags Ratz fatz,
glücklisch bischt du,
hoscht du beim Badumbau noch e Klo fun de Katz.

Ich heb jetzt moin Bescher un stoß mit eisch oh,
uff de Till, fun de Flemmings de Kloh.

 

 

 

 

 

 

 

 

 

 

 

 

 

 

Der gerettete Frosch

In Laudebach man die Kerwe beginnt,
indem en Kerweborschd en Frosch in de Bach drin find.

Vor zwa Johr, do wars wie verflucht,
do hawwe die den Frosch in de Bach gesucht.

Unser Vorstand setzt e End dem Treiwe,
un iwwerreicht soim Kolleg e Bekennerschreiwe.

Die Hemsbächer Kerweborscht die warn so nett
Un hawwe den Frosch vorm ertrinke gerett.

Ausgelöst wern sollt der Frosch mit Bier 30 Liter
Un jetzt er leit wird die Geschichte bitter.

Ich steh jetzt vor eich, un mach ko bosse,
ich hätt net geglabt dass die Fresch sich so Lumpe losse.

Fum Laurebächer Parre hawwe mer vor zwa Johr e Ehrenwort gehert,
awwer scheinbar is e Ehrewort fun em Frosch nix mehr Wert.

Ehr Laurebächer do drunne jetzt hert mer gut zu,
was ich eich fun do howwe jetzt vorrechne du.

30 Liter Bier in zwa Johr plus Zinse,
dodezu Zinseszins, jetzt hert er uff zu Grinse.

Ich nemm en Zinssatz fun 4 Prozent,
un die Inflation die Jeder kennt.

Jetzt sin mer bei Liter 44,3
Zusätzlich 6 Liter fer moi Geschrei.

Macht summasumarum 50 Liter Bier,
un die fordere ich jetzt un hier.

Un kriege mer die net bis zu eirer Kerwe,
donn losse mer den Frosch es nächste mol sterwe.

Auf Mundschenk loss de Kopp net sinke,
dete mer uff die Fresch wade, hätte mer jetzt nix zu trinke.

 

 

 

 

 

 

Homepage

Des Internet is ä foini Sach,
surfe konnscht do ohne wenn un ach,

doch suchscht du do die Kerweseit,
isch sag eisch nur, ehr liewe Leit,

ihr werds jetzt net glaawe, des is schun doof,
einige Zeit hatte die Kerweseit schlof.

Do wollt oona ä Update mache,
awer mit souem Update,des sin sou Sache,

hot de falsche Knopp gedrückt,un des war schlecht,
uff omol war die Kerweseit gelöscht.

Do stellt sisch doch glei mol die Frog,
wer macht donn die Kerweseit blouß dot?

Die Kerweborscht hawe do net viel Geduld,
jeder säisch nur, isch war do net schuld,

un wer des war is inzwische klar,
ma was,daß es de letschde Kerweparra war.

Doch inzwische erschiene wirra im neue Kleid,
im Internet unser neie Kerweseit.

kumm Munschenk loß de Kopp net sinke
isch will mol uff unse frühere Kerweparre trinke.
Jahrgang 46/47

Dass sisch eschte Hemschbescher net gonz vergesse,
treffe sisch monsche Joargäng regelmäßsisch zum Trinke un Esse,

do wärd gebabbelt, geratscht, Neiischkeite vazäilt,
wer gstorwe is, geheiert hot, wer mit wem geijt,

sou was weis ma immer, was passiert is im Lond,
is Gerüschteteschnisch uffm neischte Stond,

In de Zeitung lese die 46/47er Schulkamerade,
er wärd zur Weihnachtsfeier ins KOchemer Bayes gelade,
ma will sich bei Kerzelischt un schöne Dinge,
so longsom uff die Woinacht oistimme,

Doch jetzt kimmt der Clou, es is net geloge,
in Hemsbasch hot ma sisch vor Lache geboge,

denn die Oiladung fa die Woinachtsfeier, des sin jetzt ko Ferz,
erschien in de Zeitung om 12te März.

Mir hot jo ooni vun denne overtraut,
dieses Esse hawe mir schun längscht verdaut.

Isch will misch jo net in die Nessel setze,
un iwwer die Woinemer Nochrischte hetze,

awer der wu des druckt is doch ä bissl bled,
muss doch sehn dass ma im März net zur Woinachtsfeier oiläd.

Kumm Mundschenk tu mir de Bescher bringe,
isch glaab die vun der Zeitung die spinne.

 

 

 

 

 

 

 

 

Die Farbenfahrt

An nem schene Frühlingsdag – den muscht du kenne
fuhr oner zum Bauhaus nach Verne,

Im Baumarkt okumme ,er war ja koner von de dumme,
hotter soi Sach a glei gfunne

e paar Emer Farb vers Büro, des wollter streiche,
un dud dorsch die Gäng vum Bauhaus schleiche,

des Zeig gekaaft und im Kofferaum verschachert,
isser Richtung Hemschbach üwwer die B38 gekrachert.

Ihr wisst jo was am Autohaus Ebert Diehm neierdings sizt,
a neie Kamera, die sogar umseck rum blitzt.

De Fahrer mit der Farb im Auto, war flott im Verkähr,
plötzlich merkta – ooohh ich muss jo bremse, sunscht häwwe die ä Foddo von mer.

Die Ampel springt von gri uff gelb,
des horra schun gemerkt unsern Held,

Donn steigt genüsslich uff die Eise,
un schickte soi Emer Farb uff die Reise,

Bei Rot warer gestonne – isch mach jetzt ko Sprüche,
der Innerraum war komplett nei gestriche.

Mundschenk schenk oi, isch drink uff de Beschte,
isch trinke mol uff de Christian Reschke.

See der Sinne

Letscht Joar im September, als es zu kalt war zum Bade,
hot die Stadt zum See der Sinne gelade,

Mit Musik un Donz, Gitarriste un viel mehr,
probiert ma neues, des gibt escht mol was her,

Eigentlisch wars perfekt, doch hawe se ons vergesse,
gehen die Leit heit wohie, wolle se Trinke un Esse.

De Loibner vum Max hot Garnele gegrillt,
um Neune warn se all, die Leit warn gonz wild,

un renne zum Kuche, doch va die meischte wars Pech,
denn dort warn nur a paar Krümel uffm Blech,

Die Männer tat schnell zum Bierstond wetze,
die wußte, das 7 Bier eine Mahlzeit ersetze,

Do frog isch misch doch, un sich mach jetzt ko Posse,
ma konmn doch net halb Hemschbach verhungern losse,

Dobei war doch des Esse garnet weit un gonz frisch,
unserm Wiesensee is doch voll mit Fisch,

die rausgeholt, gegrillt un 12 Euro genumme,
hätt die Leit gegeischtert, un des Fescht war gelunge.

Mundschenk schreib ins Schadensformular,
See der Sinne, mehr zu esse, wunderbar.
Isch brauch jetzt en Schluck, sag de Stadt zum Wohle,
näscht Joar wolle se des Event wiederhole.

 

 

 

 

 

 

 

 

 

 

 

 

 

 

Rathausumbau

Beim Umbau vum Rathaus, do geht’s Rund,
ich sag nur noch Villa Kunterbunt.

Wonn ich en Haufe Geld ausgeb, fer e paar ohmer Farwe,
donn was ich ah wie die Farb heest, des kennt er mer glaawe.

Fun em gebrochene Sandsteinton is die Redd oh wie schee,
en gebrochene Sandsteinton, den hab ich gestern uffem hohmweg Plackeweis geseh.

Mit Farb, wonn die Sunn scheint hell, bei Bewölkung lila
Do werds Rathaus geschitzt,
Ich frog mich bloß wie der Kaschde aussieht wonns blitzt ?

Wie ich in de Zeitung gelese hab, die hätte e Kleinod gefunne,
dacht ich schon die Stadt wär zu Geld gekumme.

Awwer wenn unser Herrn unner em Kleinod zwa Zimmer verstehn,
do versteh ich net, dass die so mit unserm Geld umgehn.

Zwa Turmzimmer, ohne was ohzubaue,
ohns als Sozialraum, des onnern zum Traue.

Vorm Rathaus säigt die Braut, jetzt gibt’s ko zurick,
jetzt geht’s mim Fahrstuhl ins Eheglick.

Doch aufgemerkt, ich bin jo net bled,
denkt dro, dass es noch de Heirat a wia abwärts geht.

Un während die Leit im Vorzimmer warte,
gucke die Verantwortliche beim Max in de Garte.

Im Keller, do kimmt e Gewölbe vun 70 m² zu Dag,
wahrscheins hot des on de nächst Kerwe de Lobner in Beschlag.

Ich heb jetzt moin Becher uffs Rathaus,
meh will ich net sage,
denkt dro, noch de Kerwe geht’s weiter mit de Ausseohlage.

 

 

 

 

 

 

 

 

 

Schleppertreffe

Die Freunde historischer Fahrzeuge Hemsbach genannt,
kurzum als Schlepperclub bekannt.

Die sin noch Groß Rohrem gefahrn Ende Mai,
zum Schleppertreffe im Ried, do sin mer debei.

Dort ohkumme fahrn se im Ort umher,
froge Leit wo donn des Schleppertreffe wär.

Doch die Leit gewwe ne nur zu verstehn, (andere Stimme)
scheene alte Traktorn, die hawwe letschti Woch im Ort gesehn.

En Monat später fahrn se in de Odewald naus,
in Igelsbach do stelle se ihr Fahrzeuge aus.

Mit ihrne Traktorn stehn se do es war wir verflucht,
un widder hawwe se des Treffe gesucht.

Im Ort, do wern se gefrogt, (andere Stimme)
wo wollt er donn hie?
Fers Schleppertreffe, do seit er e Johr zu frieh.

Donn wars widder soweit, die nächst Ausstellung steht oh,
diesmol warn se schlauer un rufe vorher mol oh.

Julius Rutz un Martin Maier,
hase beim Schlepperclub die Terminuffschreiwer.

Ich trink uff die zwa un schreibts mol uff ohne Mucke,
im September konn mer om Wiesesee wia alte Schlepper ohgucke.

 

 

Bachgassefest

Hemschbachs Feste sin bekonnt,
do kumme die Leit ausem gonze Lond,

des Bachgassefescht im Juli is en Hit,
do mache a viel Kinna mit.

De Bojemoschter is als Bierspender bekannt,
drum hot man a diesjohr zum Ehrebachgässler ernannt.

Die Weinhoheite sin uff die Kerschetrepp gekrabblt,
dort hawe se brav ihr Sprüch gebabblt,

im Designerdirndl grüße se die Zecher,
de Woi allerdings,hatte se im Plastikbecher,

doch während die Hoheite an de St.Laurentius spaliern,
geijt oner mit ährne Weinpokale dorsch die Bachgass spazieren.

in de owere Bachgass dut sisch ooni mit ihrm Krempl vors Haisel setze,
obwohl se net ogemeld war,sou konn ma a die Leit vergrätze.

Drunne on de Poscht hot sich gar nix bewegt,
alles eng beinonna,alles war belegt,

 

weil er mitem Auto net hifahrn konnt,
des sinn jetzt ko Bosse,
schreibt der Poschtler on die Tür,hier is heute geschlosse.

Ko Briefe,Pakete,Bilder konnt ma do bringe,
un Geld zu hole,wollt a net gelinge,

blouß weil der Kerl zu faul zum laafe war,
läßt der ofach soin Lade zu,
wasn gonz schene Zustand war.

Es is schun monschmol ä verrückti Welt,
Der hot nix Gschafft,un verdient trotzdem soi Geld.

isch trink emol,des mach isch doch gerne,
uff die Deutsche Post un onnere Großkonzerne.

 

Berlin

En Hemsbächer wollt uff sich uffmerksam mache,
un wonn ichs eich sag, es war net zum lache.

Hemsbach in de Weltpress es war zum heule,
en Ohschlag uff en Ami on de Siegessäule,

Der Farb Bomber von Hemsbach, so stands in de Bild,
fährt Amok in unsrer Hauptstadt wie wild.

Andreas Sch., 40 Johr im Daihatsu Cuore,
sorgt uff de Obama Fanmeile fer Furore.

In de Zeitunge hab ichs gelese, mann war der Dumm,
fährt der do sämtliche Absperrgitter um.

Un weil er mähnt er wer de Idiot,
macht er denn noch de gonze Platz rot.

Hätt mern noch e halb stunn fahre losse,
vielleicht hätt er mit weißer Farb noch es Hemsbächer Wappe uff de Asphalt gegosse.

Mit Eisestonge hawwe sen donn zur Räsong gebrocht,
un in de Geschlossene Oigelocht.

Was der in korzer Zeit aus Hemsbachs Ruf gemacht,
des hot der wahrscheinlich net bedacht.

Zu der herrnlos Aktion, do fällt mer nix oi
Zieht der doch Hemsbach in de Dreck enoi.

Fliegscht Du moje noch Omerika donn gucke die uff die Liste,
die mohne jetzt in Hemsbach wohne blous Terroriste.

Un er Leit des is doch klar,
auch Berlin braucht jetzt ä Schadensformular.

Mundschenk schenk oi, ich trink uff des Drama,
Uff die nächst Kerwe do lade mern oi, den Barrack Obama,

 

 

 

 

 

 

 

 

Abschluss Drama Kerweveroin

Ebbes kimmt jetzt gonz zum Schluss,
des Drama vum Kerweveroin is hier noch ä muss,

denn bei dem Veroin zu dem isch a gher,
gings im Frihjoar hin un her,

Zur Versammlung im Januar, es war verzwickt,
hot net jedes Mitglied ä Oiladung kriegt,

de Höhnle is Vorstand worn, doch des wurd vertagt,
wege Formfehler, hot ma om Gericht geklagt,

Im Februar is donn de nächscht Brief kumme,
mit dem Hinweis – im Januar war alles ver umme.

Doch a die Oiladung, des war wischtisch,
war formaljuristisch a net gonz rischtisch,

Weil de Höhnle gemont hot, er is Vorstand jetzt,
hot er die Mitgleider iwwer de nächschte Termin in Kenntnis gesetzt,

was wiederum ein Fehler war,
die Posse ging weiter – wunderbar.

Im März kam die Einladung Nummer drei,
do wars bei monsche mit de Geduld vorbei,

un hawe sisch plötzlisch gonz befliesse,
behakt, beschimpft un mit Dreck beschmisse,

doch wer jetzt mont, des isses gewese,
no, denn bald konnte die Mitglieder in neie Brief lese,

de gleiche Text, des is schun klar,
daß a diesmol net formgerecht oigelade war,

Für diese Posse isch sags jetzt mol nett,
breischt ma ä eigeni Kerweredd.

Isch sag eisch als Parre, isch muss des jetzt tun,
loßt die Streitereie un Häme endlisch ruhn,

üwerloßt des Chaos net irgendwelche Erwe,
sunscht dut unsere Kerwe irgenwonn sterwe,

Machts wie Ommi, wu Obama un Hillery sich bekriegt,
oona gewinn, donn wird sisch wirra geliebt,

Vertragt eisch endlisch wirra, des is niemols verkehrt, unsere Kerwe in Hemsbasch , is des allemol wert.

 

 

 

Segen

Ehr Leit isch will eier Gedonke lenke,
un zum Schluss noch moin Sege spende,

Feiert heut weida un trinkt eier Bier un en Woi,
do kimmt wirra Geld in die Veroinskass noi,

Kaaft Lose un geijt Reitschul fahrn,
denn uff unserer Kerwe muss ma net sparn,

un find oner soin Pfandbon nimme,
weil er is schun voll,
gebt ens Geld a so, treibts net so doll,

isch segne die Leit die immer schaffe un helfe,
hätte ma die nett, wär Schluss schun um elfe,

Ihr Kinna, Männer und Damen,
danke vers kumme sagt eisch de Sascha, AMEN

Wem ghert die Kerwe?