„Begrüßung“
Isch muß eisch heit all mol grieße
die gutgelaunde, un ach die miesse
die kerweboschd, un all die glucke
die sich moje beim max en mennerstrip ogucke
isch griess die eschte hemschbescher fraue
die sich den mischt dort net oschaue
die wisse genau, un des sin viel on de zahl
de kerwemontag kehrt de buwe – do is kerweboschtwahl
isch griess a die – des sin jetzt ko bosse
die ihr handy in de kersch un uffm friedhof klingle losse
isch griess die parre un die woikönigin
die prinzessinne un die im altershoim drin
isch griess die kronke un a die gsunde
isch griess die dinne, un die runde
un moin bsonnere gruss – des macht ma ko mieh
geit jetzt noch heidelberg in die chirurgie
zu unserm boijemoschter, der dort liegt un groint
weil er die kerweredd heit versäumt
soi herz war kaputt, die op net zu verschiewe
awwer on troscht ism noch grad sou gebliewe
verleeft alles glatt, un er is ball wir de alde
donn is er 2010 on de kerwe, nemme zu halde
Moin Mundschenk werd eisch bekonnt vorkumme
Der is gut gebraucht, den heb isch iwernumme
Der war letschdjohr un johre zuvor debai
Bissel abgstaabt hemman,un schun wara wie nei
fer de brückebelastungstest – des is de gipfel
de eschte kerweboschd – de carsten zipfel
Unser Kerweredd, des sag isch nur
is Hemschbachs älteschde Kultur
also bassd gut uff, unn spitzt eier ohr
vielleischt kummt er jo a drin vor
Bevors lousgeht bau isch uffm Mundschenk soi Erfahrung
auf moin froind _ geb mer ä bissl Flüssischnahrung
„Parre“
Willscht Kerweparre wern, konscht net grad sou kumme
die nemme net jeden – vor allem ko dumme
gepflegt muss ma soi – net zu dinn net zu dick
die erschoinung muß wirge – hier uff de brigg
das isch do rischtisch bin des sieht en blinder
seh gut aus – bin 1,76 – ohne schuh un zilynder
bin sportlich un wohn in de neh vun de schul
moi hoor sin gepflegt, un isch bin net schwul
doch moi problem is, isch sags eisch do unne
die fra fers lewe, hab isch noch net gfunne
des werd sich ball ännern -isch was des genau
rtl macht die sendung – kerweparre sucht frau
ihr fraue ausm umkreis – vun monnem bis on die tromm
bewerbt eisch im intrenet unter kerweparre dott .com
isch bin iwerzeigt un sags fronk un frei
bei 100.000 bewerbunge is bestimmt oni debei
die moi single-dasoin beendet – doch isch mach jedi wett
wonn se unser kerwe net will – donn nemm isch se net
isch heib mol moin Becher – isch bin noch net blau
trink emol uff moi zukünftischi frau
„Beschwerdebriefe“
Unser kerwe is bekonnt,
die feiert ma im gonze Lond
Die Leit kumme, isch muss es betone,
inzwische aus alle deitsche Regione.
Drum muss ma mir heit emol erklern,
warum sich monsche Hemschbescher iwwer die Kerwe beschwern
Renne zum Boijemoschter – er braucht net zu gaffe,
wolle doch allen ernschtes unser Kerwe abschaffe.
Die one beschwere sich – un des muss ma wisse
iwwer asoziale die in Kellerlescher un Vorgärte pisse.
Die onnern – un des konn isch net verstehn,
weil se on de Kerwe Besoffene sehn.
Mer stelle ball Schilder uff – isch mach kon Spass,
ACHTUNG – Berunkene kreize die Gass.
Drum heb isch heit on eisch e Bitt
isch hoff, do macht er all jetzt mit.
Schreibt on de Pauli ausfierlisch und rischtisch
warum eisch unser Kerwe sou wischtisch.
Iwwer unser Broisch, un denne herrlische Daage,
un dass vun eisch koner in Grund hot zum klage.
Isch bin iwwerzeigt, un do bleib isch debei,
des Ergebnis PRO Kerwe werd 5000 zu 3.
Isch brauch jetzt in Schluck – de Mundschenk trinkt Wasser
mir trinke uff die Beschwerdeverfasser.
wem kert die kerwe ………………….
„Der Liederkranz“
Beim Liederkronz – des waas der Kenner,
werd gesunge un zwar nur fun Männer.
E paar fun denne Sänger im klone Kreis
geie dunnerschtags wondern, wie monscher weiss.
Noch Hepprem nuff des war ihr Ziel
sou 6 km sinn jo net viel.
Doch nochm Esse sage e paar grouß un breit
der Rickweg is uns viel zu weit.
De Bauch war halt voll – doch was e Glick,
geit fun Hepprem jo in Zug zurick.
Viel Spass uffm Rickweg rufe se de onnern zu,
un latsche in Rischtung Bohnhouf im nu.
Die Wonderer warn längscht in Hemschbach gelond
wu die Zugfahrer warn – war nirgends bekonnt.
Is de Zug entgleist – oder sunscht was bassiert,
sou hot ma heftisch spekuliert.
Sou longsom bricht iwwer Hemschbach die dunkelheit oi,
do fährt fun Woinem die Linie 21 noi.
Un wer fällt on de tornhall aus em Bus ?
unser Liederkronz-wonderer – des is konn Stuss.
De Zug hot in Hemschbach 3 Minute long gestonne,
es sinn a ordnungsgemäss alle Deern uffgonge.
Donn hot er sich weiter noch Woinem bewegt
jetzt hewwe ses gemerkt – doch jetzt wars zu spät.
Wärn se zurick geloffe un hätte net gepennt
hätte se sich schun 3 Stunn ausruhe gekennt.
Kumm Mundschenk loss de Kopp net singge
isch will e mol uff de Hemschbescher Liederkronz dringge.
“Kerweshirts“
Monche Hemschbescher moone, Junge un Alde
mer misse unsern schene Dialekt erhalde.
alles werd verhunzt – mit onnern Sproche vermischt
uff unser Hemschbescher Houchdeitsch leigt heit koner mee Gewischt.
Ma keft nemmee oi – ma geit heit schoppe
ma rennt nemmee rum – ma dud nur noch jogge.
Un Ponnekuche kriegscht – do bischt fascht hie
heit nur noch in de Creparie.
De Sekt is net trogge – des is a net gut
der heest heit Schompagner un is halt Bruuut .
Des wer jo alles noch zu ertrache
doch ons – des liegt ma gonz schwer im mache
Warum muss jetzt er leit – isch konns net verstehn,
uff unsre Kerwe-hemmer vorne – Sweet Home Hemsbach – stehn???
Unser Hemschbach is – isch bin gonz benumme
iwwer Nacht zum traute Hoim verkumme.
Ma hot mer verzeilt – des wer jetzt so,
schliesslich sin dies Johr gescht aus Wareham do
Geschtern sinn se gewonnert, dorsch de Wald geeiert
hewwe statt uff de kerwe on de Grillhitt gfeiert.
Un dass se sisch wohlfiehle – isch heb sche bled geguckt
hot ma halt was englisches uff die Hemmer gedruckt.
Isch will net wisse – wie weit des noch geit
wonn negscht Johr uffm Hemm was fronzeisisches steit.
Isch brauch jetzt in Drink – aus dies Cup from dies Wein
Ein Proscht uff die Bosse fum Kerweveroin.
„Zaun Biz“
Hemschbach hot Sorge – ma glabt es kaum,
im Stadtrat geits um en houche Zaun.
Weil brave Kinner – des is jo zum lache
de BIZ-Sportplatz e bissel dreckisch mache.
Sou sehns die one – die onnere dun sich die Hoor fascht raufe,
dun sich brave Kinner nachts mit Wodka die Huck vollsaufe?
Weil se brav sin und a noch sou gut,
mache se uffem Rase noch die Flasche kaputt.
Die Pizza un die Döner-Reste die se net esse,
hewwe se doch blous uff m Rase vergesse.
Un hewwe se de Sportplatz versaut un is es do nimme scheeh,
mache se die nägschst Party om Wiesesee.
Ihr liewe Stadträt – ihr seid doch ko dumme,
ihr misst doch uff die onzischt Lösung kumme.
Onstatt en haufe Geld in en Zaun zu investiern,
bezahlt e paar Kerweboschrt die dort nachts patrulliern.
Donn wern die Chaote fum Rase geschickt,
un om nägschte Dag, do werd sich donn ordentlisch gebickt.
De gonze Dag derfe se – die werrn net grad lache
ohne Hondschuh ern Dreck un die Scherwe wegmache.
Un statt Wodka gibts Wasser un wonn oner blous murrt
steit om rond in Polizei-Hund der ordentlisch knurrt.
In solche Methode investiert e bissel Geld,
weil koner fun denne fum Schaffe was hält.
Un wonn des nix nitzt weil moi idee is zu dumm,
donn macht halt om BIZ doch en Zaun drumrum.
Isch brauch jetzt en Schluck – des is gebode
gott lob sinn die meischte junge hemsbescher ko chaote.
„Brunne“
Wonn ma will spiele om See – des is bekannt
hot ma Spass mim Schippsche in Brabbel un Sand
Willscht du en Berufswunsch fun klohne Buwe hern,
gibts fascht nur o ding – ich will Baggerfahrer wern.
Ja ja des buddeln macht schun Spass
in gonz Hemsbach un a uff`m alte Rothausplatz
3 Buwe aus Hemsbach, ich du es mol so nenne.
finne ihr Erfüllung wonn se im Dreck wühle kenne
Bei Bauarbeite glei beim Rummelplatz do drunne,
hawwe die glatt en alte Brunne gefunne.
Wonn Euphorie un Phantasie sich mische,
krigscht du a Schatzfieber ähnlich wie beim Jage und Fische.
Die 3 gucke weiter noch dem gonz grosse Fong
tatsächlich ä paar stoo, was nur die alt Stadtmauer soi konn.
De Traum fun dere geschichtliche Sternstunde der war glei wia weg
die Unnersuchung ergab, es war des so wies aussah: nur Hemsbescher Dreck
De Brunne war also nur e Illusion awwer trotzdem sehr schön
isch heb jetzt moi Glas auf die Heimatforscher Rössling – Moos – und Höhn.
Mundschenk mach: ich heb en historische Dorscht
jetzt werd e mol de Inhalt fun moim Becher erforscht.
„Jogger“
Was ich eich jetzt verzehl – is fascht net zu glawe,
jeden Dag dud oner om Kreizberg long trawe
Die erscht Steigung om Miehlberg – nimmt der mit Karamba
weils dort zu steil is – mit soim blaue Fiat Panda.
Funn de Grillhitt zum Kreizberg – find er de weg a bei Nacht
doch diesmol will er weiter un hot sich gedacht.
Ich renn heit noch Laudebach- zu moim Vadder – dem alde
un du mich mol werrer mit dem unnerhalde.
Als er om Vierrittersturm war – hot der Panik gekriegt
weil Froschhausen doch eigentlich nördlicher liegt.
Er dreht um – un rennt weiter – is plötzlich hellwach
denn uff emol steht er in Liewerschbach.
Nimmt die nächscht Abzweigung – un hetzt durchs Gelände
doch 100 meter weiter war de Weg plötzlich zu Ende.
Jetzt hotter doch sou longsom geschwitzt,
doch weiter muss er – s hilft alles nix.
Denn eigentlich war doch Lauchebach soi ziel
er hots plötzlich gsehn – es fehlt nimmer viel
Erschöpft wie er war – hot er nimme viel gerafft
er waas jetzt nur – glei hewwischs geschafft.
De Buckel noch nunner muss ich jetzt nur noch gehn
do hot er plötzlich die Kersch fum Laurentius gesehn.
Die sieht ma fum Miehlberg aus – un do warem klar
dass er werra in Hemsbach war.
Wers Froschkaff net find – do bleiwisch debei
schaffts niemols zum Iron-men nach Hawaii
Ich drink uff moin Mundschenk es is so weit
uff de eifrische Jogger on moiner seit.
„Bierbänke“
En Fiererschoi denn ma konn mache
fers Mofa, Moped un onre Sache
Heitzudaag will ma jo a alles befahrn
sogar on de TV-Hall die Tatonbahn
Ma baut e Romp vun de Stross bis uff de Platz
so geit des Belade vum Hänger ratz fatz
Un weil die Garniturn zu long warn fer die Roll,
bleibt der Hänger halt uff, er war halt zu voll.
Kaum uff de Romp do hert mas schun krache
fort warn se die Benk – un isch hat was zu lache
Drumm wonn der Bierbenk fahrt dro denke
duud net blous uffbasse beim lenge
Denn Bierbonk plus Disch mol Schräge hert hie,
do rutscht des zeig fun de Roll wie noch nie.
Des ohne leid des annern freude
en scheene gruss on de Weithofer un soi Freunde
isch trink uff die Schaffer in alle Veroine
ohne die misste mir all bidderlisch groine
„Trimmgeräte“
Beim Urlaub in de Türkei kriegt vun de Stadt oner mit,
es gibt Trimmgeräte, domit halde alte Leit sich fit.
Un beschließt dort in Anatalya schon,
sowas kriegt ah, die Hemsbescher Rentnergeneration.
Die Stadträt finne des gud un dun ned verkenne,
wer fit iss, der muss weniger zum Doktor renne.
Om Wiesesee hewwe se donn die Dinger uffgebaut,
fer de Zeitungsbericht hawwe sich e paar alte getraut.
Doch waas ich inzwische ihr braucht net zu stutze,
die Dinger dun jetzt Kinner, Vädder un Jugendliche nutze.
Un wisst er warum, ich sags eich ihr Leit,
fer unser Seniore hier in den Gass iss de Weg halt zu weit.
Bis die erscht mol on de Wiesesee gedackelt
un donn noch e Stunn uff de Geräte rumgewaggeld.
Ich sags eich, wia hom iwwer die Brigg,
fährt ma se garantiert mit em Krongewage zurick.
E Iwwerlegung wärs wert, des deet sich echt lohne,
ma stellt die Dinger do uff, wo die Alte ah wohne.
Ich trink mol uf unser Seniore – ich bin sicher die meischde,
kenne sich koh Taxi zu de Trimmgeräte leischde.
„Pudding“
Im Urlaub des is jo wohl bekannt,
Do bischt Du Deitschlond Repräsentant
Drum tu dich bitte A bequeme
Tu dich wäsche, kämme un a benehme !
Uff de fronzäsische Autobahn
kimmt ona zurick aussem Urlaub gefahrn.
Un wie so longe Autofahrte halt sind
hockt newedro die Fraa und hinne hockts Kind.
Nach longer fahrt, des sag ich Dir
hängt dem Bu soin Mage uff halwer Vier.
Schlau wie der Klone is, fängt er o zu lamentieren,
un lässt sich en Schokopudding aus de Kühltasch servieren.
Als er des Ding hot halwer gegesse
is de Hunger gestillt un a glei widda vergesse.
„Mamma isch bin satt !“ krakehlt er heiter
un gibt nach vorne de halwe Pudding weiter.
In de Hond vun de Mamma schmiltzt des Ding in der Sun,
bis die Mamma aus Notwehr uff a Lösung kummt.
Bei 130 zum Glück do gibt’s ko Staus
Fällt dere de halwe Pudding zum Fenschter naus !
Des Schälsche fliegt naus awwer net nach unne
donk Luftwiederstand und Schwerkraft hot de Pudding zurick gefunne!
Ehe Mamma un Bu es sich versieht
warn Sie mit braune Flecke besprüht !
De Vadder lacht un lässt die Mitfahrer wisse
Ihr zwa seht aus wie Vollgeschisse.
On de Raststätt folgt die Reinigung von dem Malheur,
die Fronzose häwwe gestaunt des sag ich Dir!
Warumm seid ihr donn so bekloppt,
un habt zum Esse net glei on de Raststätt gestoppt ?
Ich hoff, des war denne 3 e Lehr uff de Urlaubsfahrt,
un de Fleischhauers bleibt sowas nächst mol erspart.
Mundschenk schenk oi, kaltes Bier wär schee !
Uff Michaela, Felix und Markus a Votre santee !
„Pfeifer“
Die Beethovenstross hot ma jetzt nei gemacht,
Die hewwe dort geschafft bei Dag un bei Nacht.
Bezahle duud des des Lond, awwa jetzt kimmt de Clou
Wonn die Beethovenstroß gemacht is, mache mer de Saukopptunnel zu.
Weil wonn de Tunnel gesperrt is, do wird de Verkehr wilder,
doe stehn sogar on de Autobahn un uff de B3 Umleitungsschilder.
Un im Odewald do steht ma, ich waas es genau,
statt in Mörlebach, halt schunn in Berkene im Stau.
Unn fun dere unendlische Geschichde
Duud Radio HR3 absolut Live berischde.
En Interviewpartner hewwe die glei gefunne,
un zwar en Friseur vun de Bachgass do drunne
Der dut, ich sags eich gonz bescheide,
in soim 2. Lade in Bergene de Leit a die Hohrn schneide.
Ma heerd aussem Radio, ich war wie begosse,
am beschde deed ma fer immer de Tunnel zu losse.
Des belebt des Geschäft, unn des muss ma verstehn,
weil di Leit jetzt mehr Zeit hawwe um schoppe zu gehn.
Unn anstadd inn de hizz in ihrm Auto zu leide,
losses se liewer bei ihm ihr Hoor emol schneide.
Der glaabt allen ernschdens, un des iss zum lache,
die losse ihr Auto stehen un duun Einkäufe mache.
Un bevor de Reporder zurick noch Fronkfort gejagt,
hot der Figaro soin Wahlspruch gesagt,
„macht es wie die Sonnenuhr“
„zähl lukrative Kunden nur“.
Noch dem Interview, do hab ich druff getippt,
dass schneller geht hot Peiffer bei de Beethovenstroß mitgeschippt.
Ich drink emol unverdrosse
Uff unsere Bergemer zeitgenosse.
„Güterzug“
Hot fun eich do drunne mol ohner uffem Bahnhof verharrt,
un die gonz Zeit uff en Zug noch Hepprum gewaard ?
Im Dezember, bei ca 3 Grad im Schatte,
wollt ohner uff ohmol nimme wadde
Bei dere Aussetemperatur, der Typ war net hell,
springt uff en Güterzug – und der war net schnell.
In Laudebach wia abspringe, uff die Idee isser kumme,
allerdings hot der Zug bis dohie ordentlich Fahrt uffgenumme.
Irgendwann wird des Ding schunn emol halde,
solang trotz er halt uffem Trittbrett denne Naturgewalde.
Un wie der Kerl in höhe Darmstadt uffem Brett steht gonz gebickt,
hot er donn halt emol soi Handy gezickt.
Doch jetzt des Problem, was soll er donn wähle?
Vielleicht die Polizei, doch was soll ern denne verzähle?
Er drickt die Wahlwiederholung, un macht koh krumme Dinger,
mehr is wohl net gonge mit gefrorene Finger.
Om onnern End die Freundin, derre er erzählt fun soim Dilemma,
Fraa, hol die Polizei moi Situation werd immer schlimmer.
Die Freundin gibt de Polizei awwer a net viel Stichpunkt,
säigt nur, moin Freund hockt uff em Gieterzug in nördlicher Richtung.
On de Endstation hots donn e End mit dem Schlamassel,
des war awwer 237 km weiter – in de Näh fun Kassel.
Wer der Schwarzfahrer war, des is net Gewiss,
Gerüchte sage jo, das des en Laudebächer is.
Uff den unbekannte Geisterfahrer heb ich jetzt moin Krug,
ich glab der fährt so schnell nimme mim Zug.
„IG Bachgasse“
Om letschte Sunntag hot ma, – es war on de Zeit, feierlisch unser neies Rothaus oigeweiht.
Die Geschäftsleit tate – ma braucht net zu stutze,
des Ereignis zum Sunntagserlebnisoinkauf nutze.
Wie isch Zeitung gelese heb – denk isch isch spinn,
was oner fun eich wo in de Bachgass 42 Geschäfte sinn.
Einkauf in de Bachgass – isch sag do blous,
brauchscht Koppwehtablette – is die Auswahl grous.
De Sunndag zum kaafe – bewegt uns doch sehr
als Verstärkung kumme die Händler vun ausserhalb her.
Die IG Bachgass gonz euphorisch
hawe preise verteilt – obligadorisch
doch kannte die net,-vielleischt warn se zu mied
vun Schaufenschter un Ständ de Unnerschied??
sou war de erschte plötzlich zweiter
un de zweite war erschter – un sou weiter
de zweite hot de preis gekriegt,un des war verkehrt
weil der net dem zweite sondern im erschte gehert
un donn de confroncie, des war jo zum lache
der sollt liewa werbung fer Schloftablette mache,
sou stands in em leserbrief,awer hot die net gewisst
dass der halt vun berufstechnisch Lehrer ist
Awwer unser Rothaus is schee, die Blumme die spriesse
die schwarze Sto drum rum brauscht net long zu giesse.
Die Treppe aus China sin a sehr gepflegt,
die hewwe se schunn zum zweite mol verlegt.
Vielleischt hawwe se ä paar sto fer unser hemschbescher dumme
aus ehrne alte chinesische mauer genumme
Ma hot gemont wonn die leit nur uffs Palais Pauli gucke
sehn se die abgebrochene Ecke net – ja sin die meschugge.
Un seh isch des wappe om rothaus,-mon isch,isch wer dumm
hawe se des schief hiegemolt – oder guck isch blous krumm??
Un das de Gärtner noch de kerwe net groint,
hot ma halt s halwe Rothaus oigezäunt
vielleischt is de a absicht,kann isch nur erzähle,
weil halt die treppe aus china immer noch fehle
Komm Mundschenk mach moin bescher mol voll
isch drink uffs neie Rothaus – des is werklisch toll.
„Ausflug“
Oin jeder Veroin – der was uff sisch hält,
mescht Busauflieg dorsch unser scheeh Welt.
Un wie konn des a onnerscht soin,
mescht des a unsern Kerweveroin.
DerDag war scheeh – des Progromm war groß
ma fährt uff de Fulda rum – mit eme Floß.
Un fer die Geselligkeit, war ma glei debei
besichtischt mer a noch e Brauerei.
De Gerschtesaft hot koner umgehaut
doch dodezu gabs Sauerkraut.
Als Laie waas isch a ohne studiert,
das Bier un Kraut meischtens zu Blähungen führt.
De Busfahrer konnt wenigschtens – des is net zum lache
bei sisch om Steier es Fenschter uffmache.
Die Weibsleit gonz hinne – hewwe um er Fassung gerunge
bei erne Kerl is Methangas aus em Auspuff gedrunge.
Mit denne viele Ferz – isch du jetzt net schenne
het mers Kerweheisel mit Biogas versorge kenne.
Im Zeitungsberischt konnt mer lese donn
die Rickfahrt war jo e bissel long.
Des war sou net rischtisch – des was isch bestimmt
weil der bei dem Gestonk e Minut wie e Stunn vorkimmt.
Des Busunternehme fährt se a nur noch – des is schun vermesse,
wonn se beim nägschte mol Wasser trinke und Salatdeller esse.
Isch heib jetzt moin Becher drink uff Bier un Kraut,
soviel isch waas, hewwe des inzwische alle verdaut.
„Der Spielplatz“
In Hemschbach wohne Buwe – des is rischtisch scheeh,
die hatte fer in Spielplatz e gudi Idee.
Im Brühl is en Platz do steiht en Ahornboom rum,
do baue mer e baumhaus – die idee war net dumm
doch bevor se dess mache – werds erscht offiziell
die erlaubnis fum pauli – die hatte se schnell
3 monat long – de nochbarn hots gegraut
hewwe se owwe e baumhaus un unne e bmx-streck gebaut
iwwer lescher un buckel jache se donn im nu
buwe sin halt sportlich – die medscher gucke zu
om ofong warn die alde noch voll debei
doch irgendwonn sterd se des kinnergeschrei
bevor se glei zum reschtsowalt renne
löst sich des problem, a ohne zu schenne
de erschte hot – des war schon verzwickt
mit soim bmx-rad die kurv net krigt
hot seit dem dag soin arm in gips
un guckt blous zu – mit fahrn is do nix
de negschte hot sich gonz beherzt
mim rad direkt uff de asphalt gschterzt
soi mudder fond des gar net gut
bei dem war zum glick blous de finger kaputt
de enkel funn de stadträtin hilde –
des is jo normalerweis gar kon wilde
baut den parkur wir uff bei 33 grad
lag donn mit hitschlag im bett s war rischtisch schad
im brühl is jetzt ruh doch isch sags gonz beflisse
die alte dunn die kinner schun rischtisch vermisse
isch heib jetzt moin krug isch du do net prahle
drink uff unser kinner, die mol moi rente bezahle
„Parken“
In jeder Stadt uff dere Welt
brauchd die Verwaldung immer Geld.
Frogt ihr wo unser Gemoinde ihrn Zaschder hernimmt ?
A fun de Autofahrer, des was ich bestimmd.
Doch glab ich longsom und sags unscheniert,
monsche Falschparker sind bei uns privilegiert.
Isse Stadtradsitzung donn steht die Bachgass voll
fun digge Schlitte es iss manchmol doll.
Un parke dun die des iss nimme schee,
nur werscht dort nie en Ordnungshüter seh.
Awwer ohmol im Johr des iss werklisch toll,
am Gridunnerschdag owend do is die Kersch schee voll
On dem Owend des wisse die uff de Stadt schon,
gehn die katholische Kinner zur erschten Kommunion.
Un viel leid die fun außerhalb kumme,
parke in de Bachgass un sinn donn die dumme.
Noch de Kersch donn hot schon mancher for Zorn gebebt,
wonn hinner soiner Windschutzscheib e Knöllsche klebt.
Wo ma werklich Geld hole konn ich sags Frank un Frei,
dess iss owwe om Kino on de B3.
Es is jeden Owend faschd des gleiche,
Fußgänger misse uff die Londstroß ausweiche.
Die Kinogugger krieje es net mit, ich sags ohne Spott,
weil do unsern Hilfssheriff längscht Feierobend hot.
Ich heb jetzt moin Becher ich bin net betroffe,
wonn ich in die käerch geh, do werd immer geloffe.
„Odenwaldklub“
In Hemsbach gibt es, wir sind nicht alleine
ausser uns noch ca. 100 onnern Vereine.
Fun denne sin, egal ob Kultur oder bei de Athlete
fascht nur äldere Leit in de Vorständ vertrete.
Was macht en Veroin um net zu sterwe ?
er tut halt junge Mitglieder werwe.
Ma hofft es mescht fun de junge – munter und heiter
wenigschtens oner im Veroin un im Vorstand weiter.
A mit de Mitgliederzahle siehts rückläufisch aus
Internet un Glotze – koner will me ausm Haus.
De onzische Grund innen Veroin oizutrete is leicht zu errate,
dehom hockt en Drache, un dud uff dich wate.
Fer die Mitgliedswerbung is en Vorstond besonne
uff e Patent un die hemsbescher Lösung gekomme.
Wonn ma junge Mitglieder find – des muss ma bedenke,
dud ma die Zahle erhöhe un de Altersschnitt senke
Beim schlappe dorsch de Ouchewald er noch siniert,
is im Dezember e Wunner bassiert.
Des Töschtersche lag – ist des net schee
net mit om – glei mit zwe Kinner in de Weh.
De Opa is clever – hot glei schlau iwwerlegt
dass er die Enkel im Veroin omelde geht.
Krawwle kenne die grad so – des Mädsche un de Bub
un sin schun Mitlieder im Ouchewaldclub.
Fer alle Veroine is die Devise jetzt klar,
geht hin und mehrt euch – mer sehn uns später in de Bar.
Geht feiern – macht eich locker – vergesst aber nicht
Wonn der später hom geit – dud schee eier Pflicht
Mundschenk loss de kopp net sinke
ich will e mol uff die Zwilling fum Ouchewaldclub trinke.
„Termine“
Große Feste dut ma longfristisch plane,
die Termine wern abgestimmt, dut ma mone
Doch unsere Hemsbecher Ploner, die sind schräg druff,
bei der diejährigen Planung hatte se Scheuklappe uff
ich glab hier tritt mich glei in Gaul,
do is doch etwas oberfaul !
Es ist, was mich hier stark erregt,
dass ma Hemsbecher Feschte uff die Nachbarkerwe legt !
Mim Rothausfescht hots angefange,
do sind viel Leut net nach Sulbach gegonge
Sulzbach is rum, die Kerwe is geloffe
dass es in Laurebach onnerscht wärd, bleibt nur zu hoffe
No ! – widda See der Sinne, was mich ärgert !
Ich hoff das in Laudebach die Sunn schoint un s in Hemsbach reiert !
Wonn sich die Bachgemeinden net onisch sin,
do ist dirch irgendwu de Wurm mit drin
Ihr Frösch un ihr Krabbe jetzt kimm in historische Moment
wu de Hemsbecher Parre Ostond kennt
Ich Entschuldige mich, auch im Namen der Stadt,
die froh soin konn dass se so in Kerweparre hot !
Uff die befreundete Kerweveroine heb ich moin Krug,
ihr wisst jo mir hocke im gleiche Zug !
„Segen“
Isch bin om enn – ihr liewe leit
Macht euch zum segen jetzt bereit.
Moin sege gewisch eisch do unne
Die ihr den weg zu uns hebbt gfunne
Isch segen in de veroine die dabbede affe
Die iwwer die kerwe rund um die uhr schaffe
Isch segen die hier wohne, un mach jedi wett
Funn dene kimmt on de kerwe koner vor drei ins bett
Moin sege geht zu allen hemschbeschern hin
Die iwwer die kerwe in urlaub gfahrn sinn.
Doch muss isch hier glei mol betone
Des sinn ko eschte hemschbescher, die dunn hier blous wohne
Isch segen polizei, rotes kreiz, all die helfer un leit
Die dodefer sorge, dass die kerwe friedlich bleibt
Isch bin jetzt feddisch, moi stimm dud erlahmen
Des wars vun euerm Parre – in ewichkeit A M E N
Wem khert die Kerwe…