Guckt uff die Brick ehr Leit, zum Kerwefeschde,
steht do howwe, einer der Beschde.
Denn vor eich ehr Leit, in Frack un Zylinner,
steht de 3
-fache, Kerweborschdwahlgewinner.
Zum 4. mol also, steh ich uff denne Bretter,
und Lügen, straf ich alle Spötter.
weil jetzt hald ich zu Hemschbachs Glick,
die Kerweredd, fun derre Brick.
Als Mundschenk, de Bauers Christian on moiner Seit,
werd fun mir, in die Kerwerituale oigeweiht.
Es erschde Ritual, des wusst a flott,
daß moin Krug, nie Ebbe hot.
Newedroh de 1. Kerweborschd, macht nix verkehrt,
de Carsten Zipfel prüft zum 2. mol, ob die Brick sich bewährt.
Den stump ich später nunner, wie in de Brunne e Kind,
damit der moje net, e drittes Mol gewinnt.
Ich grieß all, mit Reck un die mit Hose,
die Schaffer un die Arbeitslose.
Ah die fum Rathaus, grien fun mir en Sege,
genau wie die, die sich beim schaffe a bewege.
Ich grieß alle Dame, un die Herrn,
die die ruisch sin, un die die plärrn.
En Gruß a an die Laudebächer, dies begreife,
es bringt nix, die Redd jetzt mitzuschreiwe.
In Donk on de Vettels Sebastian, denn jetzt ist gwiss,
das Laudebach bloß en Vorort vun Hemsbach iss.
Ich griß all, die jetz do hunne stehn,
die bei jedem Wetter, uff die Kerwe gehn.
Ich grieß a noch den Herrn S aus L,
ja, es gibt en Punkt in Mitteleuropa, un der scheint ziemlich Hell.
Un an dem Ort, waas jedes Kind,
die Mensche, mit besondere Vorzüg
e ausgestatt sind.
E Johr is rum, un ihr kennt mer glaawe,
es hot sich in Hembach, wia monches zugetrache.
Bassiert sin wia en haufe Sache,
die ohne zum kroine, die onnern zum Lache.
Un jeder, der e schlechtes gewisse hot, spitzt mol soi Ohr,
vielleicht kimmt er jo, in moiner Redd drin vor.
Auf ehr Leid, mol hoch mim Glas,
mer sinn do howwe net zum Spass
Mundschenk guck hi, donn machst nix verkehrt,
ich zeig dir mol, wie ma schnell en Humpe leert.
Hemsbecher Interessegemeinschafte, die sin foi,
die lade gern, zum feiern oi.
Die ohne in de Bachgass, die onnern zum Advent,
des sin Feschde, die jeder Hemsbecher kennt.
Willschd Du, net glei om erschde Dag, iwwer de Woinachtsmarkt laafe,
krigschd on monche Ständ schun nix meh zu kaafe.
Willschd Du als Veroin, e eigeni Bud uffmache,
konnschd Du verkaafe, nur selbstgebastelde Sache.
Weil Gliehwoi, un onnern alkoholische Getränge,
die derf om Woinachtsmarkt, blous ohner ausschenge.
Der hot e Privileg, es heest wege de Toilette,
als ob die, im neie Rathaus, koh Scheißhaiser hätte.
Im Juli es Bachgassefeschd, ich redd jetzt kohn Stuss,
do war middags um 3 Uhr schunn Schluss.
Wege de Weltmeisterschaft, do hatte se Schiss,
dass owends in de Gass, nix meh los is.
Seit iwwer 30 Johr, gibt’s des Bachgassefeschd, ned geloge,
doch noch nie hot die IG Bachgass wege FUSSBALL de Schwonz oigezoge.
Solle sich doch die Interessegemeinschafte verheiern,
als IG Hemsbach, kennt ma donn Feschde feiern.
En Woinachtsmarkt in de Bachgass, oder e Bachgassefeschd bis ums Rathaus herum,
Un jeder Veroin darf GLIEHWOI ausschenke,
des wär net dumm.
Macht des noch de Kerwe, des wär schee,
Häusl und Bühn losse mer donn grad steh‘.
Mundschenk schenk ma ohner oi,
es derf a gern en Gliewoi soi.
Mundschenk hoscht Du des vernumme ?
Ich glab in Woinem is ohner es Minarett nufgekumme !
Bis uff Hemschbach, konschdn hern,
dut unser scheeni Kerweredd störn.
Nur dass ers wisst, mit Religionsfreiheit un Toleranz, bin ich ganz vorne mit debei,
awwer bau Du heit als Christ, mol e Kersch in de Türkei.
Do werscht Du glei, ons End fun doine Grenze gestellt,
Grenze on die sich in Woinem, scheinbar kohner dro hält.
On dere Stell en Gruß ans Woinemer Baurechtsamt,
die hawwe den Fortschritt beim Moscheebau sehr spät erkannt.
En Minarettbau ohne Trepp, die sin gescheit,
won koh RAPUNZEL drin wohnt, kimmscht do net weit.
Viel Woinemer, hawwe sich beschwert,
awwer des hot die, fum Omt, gar net gescheert.
Basst mol uff, ich heb do mol recherschiert,
beinoh, wär uns ähnliches bassiert.
Zu Boijemooschder Michels Zeite hot mas kumme seh,
vor 23 Johr, en Ohtrag uff Errichtung fun erer Moschee.
In Hemschbach e muslimisches Gebetshaus, ich redd kohn stuss
Do wär mit unsrer Kerwe, ball schunn schluss
Un es geschieht net oft hier owwe,
ich muss do mol, unser Verwaltung lowe.
Mundschenk, mach! Moin Hals is trocke !
hoffentlich hert ma noch long, unser Kärscheglocke !
Wonn ich als emol in die Zeitung blick,
do mohn ich, ich steh umsunschd uff dere Brick
Jedes Johr in de Redd, un ich sag des net Leise,
wird do howwe gebabbeld iwwer Hundebesitzer,
Hunde, un denne ihr Scheiße.
Fun de Stadt, hot des scheinbar noch kohner interressiert,
erschd jetzt, wo so mancher Knoddel es Rothaus verziert.
In die Zeitung e Bild mit em riese Scheisshaufe, ich war entsetzt,
mer hot gemohnt, de Siebold hätt den in Szene gesetzt.
Der Artikel war net schlecht, der unner dem Bild debei steht,
blos mohnt ma halt, dass es denne nur ums Rathaus geht.
De Rest fun de Stadt, is denne scheinbar egal,
do frog ich mich, fer was ich Steuern bezahl.
Debei is des in gonz Hemschbach e problem,
iwwerall uff de Gass konn ma Scheiße fun Hunde sehn.
Awwer die uff de Stadt sage wies is, sinn jo a koh Blinne,
des Problem, is om owwere End fun de Loin zu finne.
Awwer jeglicher Appell scheint jo fun de Hundebesitzer abzupralle,
also rat ich, uff jeden Falle:
Verdoppelt die Hundesteuer, unn mit dem Geld,
werd ohner finanziert, der die Hemsbecher Stroße sauwer hält.
Ma kennt awwer denne Hundeausführer, ah e
Gieskann in die Hond dricke,
un gleichzeitich als Baumpate, uff Streife schicke.
Un donn konn jeder Hund, ohner druff losse,
die Grünfläche werrn net nur beschisse, sondern glei noch gegosse.
Mundschenk schenk oi, mit ruhigem Gewisse,
Bis jetzt hot noch kohner, uff die Brick geschisse.
In Hemsbächer Kegler, soin Nome egal,
war frieher im Kopp, noch gonz normal.
Un jetzt stellt eich vor, dorch Zehntscheierbier,
iss soi Bewusstsein verännert, er is nimme wie frieher.
Es war im Zehntscheierkeller, der Schmitte Christian,
donn, issa mim Auto, homzus gfahrn.
Unnawegs, horra in de Rückspiegel stiert,
sieht ä blauweisses Auto, un war irritiert.
Un in dem Moment, wara nimme zu halte,
des Zehntscheierbier, hot soi Groußhirn ausgschalte.
Er gibt Gas wie die Sau, fährt mit 100 dorchs Ort,
die Polizei hinner ihm, kimmt net sou schnell fort.
Er fährt uff die Autobohn
– Vollgas, Licht aus,
abgebremst, newe noi,
un schun fahrn die Bulle, mit Blaulicht vorbei.
Donn, de Rückwärtsgong noi, gibt Vollgas der Held,
fährt in Hemsbach wir raus, un hots Auto abgstellt.
Jetzt zittert der Christian, on Arm un Booh,
die Pupille sin weit, Verstond nimme do.
Er hots Auto stehnlosse, is fortgerennt,
unnerwegs, hot sich’s Groußhirn wir oigerenkt.
Noch rä Stunn wara donn, vor soim Auto gstonne,
die Polizei in Zivil, hotn herzlich empfonge.
De Blutalkoholtest erfolgt a soglei,
soin Promillewert UFFBASSE war:„Null
– Komma
– 3“
Ich was net was ich saare soll,
der Kerl war alles, blous net Voll.
Ma hot a uff onnere Droge, im Urintest geguckt,
ko Tablette, ko Spritze, ko Haschisch war gschnupt.
Ich denk des Zehntscheierbier, des war soi Problem,
des, gäiht uffs „Vegetative
– Nervesystem“.
Frieher wars halt besser, jetzt gebt emol acht,
onerthalb Liter Bier, war uhgfähr 0,8.
Wonn Heit was passiert, un des gäiht monschmol schnell,
bischt mit 0,1, schun schwer Kriminell.
Passiert nix, donn erscht mit 0,5, des was jedi Fraa,
is de Führerschoi fort, de evangelische a.
Ich Redd jetzt kon KÄSS
-MONN, ihr kennt eich all frahn,
noch ohm Zehntscheierbier konscht uff de Reitschul homfahrn.
Ich häib jetzt moin Becher gonz ohne zweifel,
un trink uff de Christian, den arme Deifel.
De Wiesesee, macht Furore mit Rekorde,
un zwar, fun de gonz besondre Sorte.
Im See, dun sich net nur Mensche trimme,
No, a Schwän, Ente und Fisch dun do drin schwimme.
Die meischte Fisch, des verrot ich jetzt,
wern uneigenützig, vun em Veroin do noigsetzt
Un die Fisch, so hätt mers gern,
solle donn mords, Kavenzmänner wern.
Sin se donn so rischtisch groß kumme die Ongler, mit de Wärmscherdos
Un wer mim dickschde Fisch homgeht,
als Fischerkönig, in de Zeitung steht.
Bei de Kinner, is es schwer zu sage
ob der König, soin Fong konnt trage.
E Rotauge mit 160 Gramm hot gewunne, do war ich platt!
Awwer do defun, wird doch net emol en Reiher satt !
Bei de ältere, war mehr als Köderfisch debei,
De Sieger, fing e oh Kilo schweri Schlei.
Doch denne vum ASV, kumme die Träne,
duscht Du nur Waidsee, Wels und 78 Kilo erwähne.
Wege der Mutation, des laichd oi,
muss en Müllberg, newer dem Woinemer Waidsee soi.
Und so kam mir eines Nachts e Idee,
Mär nemme grad Wall, Hinterrot, und Sanierungsfall B
un versenke den Sondermüll, donn ofach im Wiesesee !
Do sparn ma mineschdens 2 Millione er Lait,
Un könne de See mit Fisch uffülle, bis in alle Ewischkeit
Die Ongla kräigte Fisch, des konscht du glaawe
Gräißa wie in Woinem, un vielleicht sogar mit drei Ache.
Mundschenk gib Stoff, Fisch muss doch schwimme
De Ongelwettbewerb, wärd des Johr besser gelinge
Isch trink uff Nemo, Weißer Hai un de ASV
Moje heb isch zwa rot Age, des was isch genau.
Frägscht Du ohner, der fum baue was versteht,
der segt da, dass baue wonns kalt is, gar net geht.
Un willschd Du die Baustell, donn zeitlich terminiern,
konnschd Du im Winter, eigentlich nur verliern.
Un weil in der Stroß, bis Weihnachte nur aus Gräwe besteht,
kriege die Anwohner extra gsagt, daß do 4 Woche gar nix geht.
Alle sage Dir, s’wär gscheiter
Parkst DU doi Karre, so zwo drei Straße weiter
Dodroh halte sisch brav, all die Baustelle Anwohner
Jeder hot des kapiert
– bis uff ohner,
Fer den war der Monat gonz Brutal,
der hot nämlich vergesse, soi Auto ausm Hof naus zu fahrn.
Un kennt ihr eich vorstelle, wie der Bischler donn nängert,
wie sich die Baustell uff 8 Woche verlängert.
Bei so rer Baustell, werd donn a laut geplärrt,
wonn se die Zufahr,t zu de Geschäfte versperrt.
En Geschäftsmonn in de Beethovenstross der blefft,
„Die Baustell, versaut moi gonz Woinachtsgeschäft!“.
Awer de Steilen, war net de ohnzich wu schennt,
Ah onnern beschwern sich, weil glei druff die nägscht Baustell ohföngt.
Weil Friedrich Ebert-, un Grawestroß ohschließend gesperrt sind
werd gemosert, dass kohner mehr de Weg, in die Bachgass find.
En Bachgässler, donn noch en Brief verschickt,
ob so e Planung, an zu wenig Herrnschmalz liegt.
Un die fum Bauamt, sage gonz kalt,
mer, kenne nix mache, der Winter, war halt heherie Gewalt.
Fun de Stadt, werd donn glei empfohle,
machts wie de Steilen, un dut eich selwert Schilder mohle.
So mancher folgte donn ohfach dem Umleitungsstrom,
getreu dem Motto alle Wege führe noch Rom.
Mundschenk, füll moin Krug, ich bin jetzt Tapfer,
Ich trink uf alle Baustelleopfer.
De Penguintappers is es gelunge,
die häwwe die Stepptanz WM, in Riesa gewunne !
Die Unnerstitzung fer de TV Hemsbach, die is groß
Moje frieh, geht die Versommlung fun de Sponsorn wia los!
Die Kerweborschtwahl, ehr wisst des genau,
is fer HEMSBACH, die KERWE, und de TV !
So newebei, will ich mich mol bedonke,
bei de Sponsore, die Kerwemontags, dorsch Hemsbach schwonke !
Als die Steppdonzmannschaft wia in Hemsbach war,
gabs viele Väter des Erfolgs, des is jo klar !
Mit em Empfong am Rathaus, der mit Sekt begosse,
hot ma se wia, in badische Arme geschlosse !
En Weltmeister aus Hemsbach, was e Sensation !
Der kriegt fun de Stadt, bestimmt oh Million !
Doch noch em Blick, in die Vereinsförderrichtlinie der Stadt,
war ich uff ohmol gonz sche Platt.
Als Badischer und Deutscher Meister krigscht Du Auszeichnung und Geld,
es fehlt awwer, was mer genau kriegt –
als Meister fun Welt.
De Bojamoschter, un die Stadträt, die häwwe donn beschlosse,
dass se zum trainiern, de 4malige Stepptanzweltmeister, Daniel Borak oiflihe losse.
Was der Borak gekoscht hot wisse mir net !
Awwer 200 Euro, die longe do net !
Isch frog mich a wia newebei,
was bringt de Borak, de Weltmeischter noch bei ?
Übungsraum gibt’s in Hemsbach a genug,
laut Förderrichtlinie, schlägt sogar de Saal fun de Kron noch zu Buch.
Awwer weils die nimme gibt, do konnscht zum ihwe,
Trainingseinheite uff die Bühn, fum Kulturcafe schiewe.
ie Jugend vun Hemsbach ruf ich jetzt uff,
macht mit in de Vereine, un ehr seid immer gut druff.
Schalt PC un Glotze aus, und rennt um de Block
Kriegt mol de Arsch hoch ! – Generation null Bock!
Spield Fußball, Handball odder geht Kegle,
Geht zu de Pfadfinder, Feuerwehr oder geht segle.
Bewegt eich rischtisch, rennt wie die Deppe,
Un wonns dodebei klackert, donn dut er ah steppe.
Heb de Becher Mundschenk, denne dun mers beweise,
mir wern Moschder im einarmige Reiße.
In de 80er Johrn sou wärts moncher noch wisse,
warn die Hemsbächer Trotwars vun de Hunde verschisse.
Parre Bernd tat domols in de Kerweredd kund,
frieher hot jeder Hund ä Arschloch katt, heit hot jedes Arschloch in Hund.
2010 sin die Trotwars wie gschleckt,
die Hemsbächer Hundeklos sin perfekt. Der Hundeklo om Bildstöckel drin, is ä Gedicht,
den, hot die Stadt „First Claas
– 5 Sterne“ oigericht.
Ma sieht blous noch glückseliche Hunde wie foi,
die Scheiße dort, mit Inbrunscht noi.
Ich wär jo schun glücklich, awa ich bin jo a bleed,
wons in öffentliche Abort, mit zwee Sterne geb.
Oda grad on de Kerwe, kennt ma den Bürger beschern,
wonn in de Dixi
-Klo Lompe ohglosse wärn.
Doch ich schweif ab mit Repressalie,
es Thema war, tierische Fäkalie.
Biblische Ploge, herscht om Platonenweg schalle,
wonn Scheißhaufe vum Himmel falle.
Dem Dörfers Manfred soi Auto wert ohvisiert,
un tagtäglich, mit Vogelscheiße verziert.
Do konscht nix mache, liewa Alter,
sou in Vogel hot halt kohn Halter.
Drum sieht ma den Manfred, still un leise,
Stoh, noch denne Vögel schmeiße.
Halt still issa net , weil er jo schennt,
„Himmel,
– Herrgott,
– Sakrament“,
Doch uff soi Vögel, om Platonweg drunne,
läst unsan Herrgott, garnix kumme.
Soin letschte Wurf, hott de Manfred varisse,
un den Stoh, kerzegrad, Himmelwärts gschmisse.
Un sou wie a nufffliegt, des iss jo ko Wunna,
sou grad fliegt der Stoh, natürlich wir runna.
Mit Masse mal Erdbeschleunigung im Quadrat, ich mach ko Bosse,
is der Stoh, dorch im Manfred soi Heckscheib dorchgschosse.
Seit dem, sou verzählts soin Sohn de Hadde,
schmeist de Vatter blous noch, mit rosa Watte.
Ich geb dem Dörfer jetzt in tipp,
laff mol om Fronleichnam mit.
Moin katholische Kollege, den herscht nimme klage,
seit sä dort de Himmel trage.
Auf Mundschenk schenk mer ohner oi,
ich hoff es Scheißt konn Vogel noi.
Jetzt issa zufriede de Owermatschores,
er nennt uns Kerwereddler, blous Chores.
Es gaiht ihm a als arig noch,
er saicht Kerweredd, iss Fäkaliensproch.
Des macht er jo a gern, sou gonz hoch zu trabe,
er kennt a ohfach Scheiße sarre.
Es letschte Thema war wia Fäkalisch verdreckt,
mer häwe zwee Arschlecher, un 5 mol Scheiße versteckt.
Erscht wonna die Scheißwörter find un die onnere Niete,
donn, iss unsan Boijemoschter, richtisch zufriede.
De Kerwevaroinsvorstond wird vunem Kreisrund gemacht,
donn räigtzn noch mäi uff, weil seller blous lacht.
Der Vorstond säicht a noch gonz newebei,
„Die Wörte mit „F“, warn diesmol garnet debei“.
Sou gäiht des Theater, seit Jahrzehnten jetzt schon,
a uralti Kerwetradition.
Ich nehm donn in Schluck, weil ohns is bestimmt,
es is „schee“ wonn de Stuhlgong fun Herze kimmt.
En Hemsbecher Bayernfan hot gedacht er fliegt,
zum Finale, der Championsleague.
Zwa Karte hot er, nimmt noch jemand mit,
zum Fussballendspiel, noch Madrid.
En Flug noch Spanien muss noch her,
un den zu finne, is net schwer.
Es muss net glei de deierschde soi,
er lässt sich a uff Umwege oi.
De Hieflug, iwwer Marokko des is ko Problem,
mer konn so noch un noch e bissl fun Afrika sehn.
Doch wie se in Marakesch om Flughafe stehn,
gibt’s uff ohmol, doch e Problem
Efja
– Efjan , ach leck mich du Biest,
halt des Ding uff Island
– wu Asche verschießt.
Sämtliche Flüg noch Europa gestriche,
wärn se doch liewer net, uff en Billigflieger ausgewiche.
Un noch rer Weil, do hawwe se begriffe,
des Spiel heit owend, werd ohne uns ohgepiffe.
Om nächste dag, donn des Malheur,
e neii Flugplanung muss her.
Hom noch Hemschbach, awwer flott,
suche en Flieger, der noch zwa Plätz iwwerisch hot.
Zwa Plätz fun Marakesch noch Deitschlond, jetzt kimmts dick,
koschte mehr wie en Direktflug noch Spanie
-hie un zurick
–
.
Uff Mirko Knapp und Christian Engelhard heb ich moin Krug,
die zwa fahrn, seitdem nur noch mim Zug.
De Kerwevaroinsvorsitzende, wir mol net Faul,
hot in de Zeitung, ä gonz groußes Maul.
De Kerweparre säischda, wie in bissische Hund,
nimmt diesmol bestimmt, ko Blatt vor de Mund.
Uns iss alles Scheißegal,
mehr suche diesjohr fär die Redd, in Rieseskandal.
Vor alle Dinge sin ma Kritisch,
un des speziell, Hemsbachpolitisch.
Der Kerl hot sou stark soi Maul uffgerisse,
schoinbar hora, ä schlechtes Gewisse.
Un donn kam diesjohr de Supergau,
ä Kerwereddthema, wie ä Schlachtreifi Sau.
Ich soll jetzt des heikle Thema ausschlachte,
soll schenne, bis heit owend om achte.
Üwwer in Kollesch, soll ich moi Maul zerreiße,
und Gott un de Welt, in die Wade beiße.
Viel Leit, sou hab ich des vernumme,
sin extra zu dem Schlachtfescht kumme.
Mehr häwe jo imma, alles verworschtelt,
ob Asylondeheimbrand, oda en Stadtrat der dorschtelt.
Doch diesmol frog ich erscht, wu steht ehr donn, ihr Leit,
ihr Leserbriefmoralischte, ihr seid doch immer sou gscheit.
Bei rä Kerwebeerdischung, mit Weihrauch un Woi,
do falle eich sämtliche Biebelsprich oi.
Ehr schreibt Leserbriefe iwa Jugendschutz,
un zieht de Kerweparre, in de Schmutz.
Un jetzt wuus wärklisch gibt in Skandal,
seid ihr gonz still, is des net doppelte Moral?
Net ohn Leserbrief, des is jo kla,
kohner wirft de erschde Stoh.
Wißt ehr was, ich sag a nix, ehr Moralischtebagasch,
gäiht ruf, un leckt mich all grad om Arsch.
Des Thema kimmt Mittags om Viere net droh,
es sin jo ah noch Kinna do.
Ich häib jetzt moin Becher sis noch was drinn,
weil ich kohn grouße Kerschgänger bin.
Wie jedes Johr, do wars soweit,
es war mol wia, Reisezeit.
E Städtereis iwwers Wocheend solls diesmol soi,
un so fährt e Stadträtin, un ihr Freundin, noch PARIS enoi.
Un um e bissl Geld zu sparn
konn ma dohie, jo ah mim Auto fahrn.
Wolle zomme in Fronkreich e bissel was seh,
Louvre, Eiffelturm und CHAMPS ELISEE.
Der Dag war hart, de fronzesische Woi war e Wucht,
jetzt noch schnell, e Plätzel zum iwwernachte gsucht
Un um noch mehr Geld zu sparn, die sin jo ko Doofe,
konn ma in dem Vehikel (VW
-Bus), jo a glei schloofe.
Die zwa hänge noch die Fenschter zu,
un begewwe sich, zu nächtlicher Ruh.
Kaum oigeschlofe, kenne die zwa e kloppe hern,
awwer dun sich do dro, erscht e mol gar net störn.
Wies donn als wia on de Autodier muckt,
werd halt doch emol rausgeguckt.
Ach Du Schreck, was die zwa do sehn,
des Auto, dut mitte uffem Pariser Stroßestrich stehn.
Ich trink uff die Beate Adler un ihr Freundin
–
denne is nämlich seitdem gewiss,
warum Paris, die Stadt der Liebe is.
Ehr Leit, nie war des Thema aktueller denn jetzt,
seit Griechenlands Pleite der Euro zur Talfahrt ohsetzt.
Bald kreist iwwer Europa der Pleitegeier,
unn ich sag eich, donn werds richtisch deier.
Un Berlin, konn do noch so viele Sparpakete schnürn,
wonn mir immer mehr Wert, vom Euro verliern.
Drum sag ich, all mitnonner hier und jetzt,
schlau is, wer soi Geld, in Naturalie umsetzt.
Drum segn ich all die uff die Kerwe gehn,
un bei de Veroine in de Straußwertschafte vor de Bonkass ohstehn.
Gepriese sein die, mit Weck, Woi un Worschd,
awwer a Bier, un Wasser, is gut fer de Dorscht.
Ehr Kinner, habt eiern Spass mit Schießbud un Karussell,
awwer verprasst eier Kerwegeld net gonz so schnell.
Legt was zurück, mir werns eisch jetzt verspreche,
Unsere Schulde, die därft ehr fer uns bleche !
Ihr Männer sauft eich, om Mondagmoind net so zu,
Sunnscht hemmer mit dem Kerwemontag bald unser Ruh.
Unn ihr Fraue, dut eisch mol zommeraufe,
un dut net probiern mehr, als eier Männer zu saufe.
Fer unser Kerwe Ihr wisst es schon,
ist St. Laurentius der Schutzpatron.
Dank Wikipedia, is mir jetzt a gewiss,
das der a de Patron vun de Bierbrauer ist.
So geht ein Dank an Laurentius fer unser Kerwe,
hoch lebe unser schenschtes Erwe.
Un fer gutes Geleit uff Hemsbecher Wege,
empfangt ihr fun mir jetzt noch de Sege.
Ihr Affe, Blede, Herrnverbronnte,
do unne, uff de Bordstohkonte.
Die hinne bleed, om Rathaus stehn
Un mich nur hern, un nimme sehn.
Die, die was ogstellt hawwe, was heit ko Thema war
Denne erteil ich die Absolution, des is doch klar.
An wem der Kerwereddkelch jetzt vorbeigezoche,
dem war ich dann heut wirklisch, wohl gewoche.
Was negscht Johr passiert des wisse mär net,
Fescht stäit es gibt wia ä Kerweredd.
Moi Redd is jetzt fertig, a in Laurentius Namen,
hoch de Becher, des wars vum Tim, in Ewigkeit AMEN !