Anfang
Ich grieß eich all, ehr Kerwefans,
vorbei die Kerwe-Abstinenz.
Ich bin eiern Parre, Manuel Fink geborener Dein
Hemsbach konn sehr zufriede sein!
Bin bescheide, wie es sich geziehmt,
sag: Hemsbach, du hoscht mich verdient!
Mer Hemsbächer Kerweparre sin charismatisch,
gutaussehend, potent, sympathisch.
Ich hock im Stadtrat, häb zwee Kinna, ä Mädsche un in Bu,
bin Hemsbachs erschter Vorsitzender der CDU.
Die schöne Sina is moi Fraa,
die wu 2013 Woikenischin war.
Ich war Kerweborscht, donn Mundschenk, bin Feierwehrmonn,
es gibt ball nix, was ich net konn.
Moi Lebenslauf is exzellent,
weil Kerweparre steht om End.
Ko Ongscht, ich sags hier gonz in Ruh,
de Boijemoschta-Titel, kimmt a noch dezu.
Doch bischt Kerweparre, des is bekonnt,
hoscht Hemsbachs allerhöggschdes Omt.
Do konscht grad sarre was de witt,
do kimmt kohn Boijemoschter mit.
Moin Mundschenk de Millers Patrick hilft gäije de Dorscht.
De Vondungs Jan ist immer noch de erschte Kerweborscht
Lady Corona, die bleed Kuh,
zwee Johr long war die Kerwe zu.
Die Kerwe lebt, is noch net dout,
was war da des ä groußi Nout.
Variante BA 5, die is jetzt nai,
basst ma gut uff, bleibt alle treu.
Es hilft uns awa koh Gewimmer,
de Kerwedienschdag is viel schlimmer.
Corona mol mit Ruh betracht,
die Kronkett hot varickt gemacht.
Hernkäschte sin schwer betroffe,
gut, monschmol a de Arsch blous offe.
Die Hemsbächer Kerwe feiern wir,
auf Mundschenk geb mer mol ä Bier
De Mundschenk säicht, ich redde muss,
Bier gibt’s leider erscht zum Schluss.
Zwische de Theme schenkt er mer oi,
immer blous ä 1/8 Woi.
Ihr steht dodrunne, uff moi Koschte,
un ich armer Deifel, konn dohowwe verdorschte.
Auf Mundschenk schenk mer ohna oi,
es muss emol getrunke soi – Prost
De erschte Altparre Hemsbachs, des geb ich bekonnt,
den hot de Kerwe-Architekt Paul Kretzler ernonnt.
1995 war dieser Moment,
wu unsern Paul, Andreas Opfer „Altparre“ nennt.
Sou uralte Kerwe-Traditione,
entstäihn in Hemsbach, wu mer wohne.
Sie vermehrn sich wie die Hase,
jetzt hämma 35 Ex-Kerweparre, die Altparre haase.
Uff jeden Fall un alle Fälle,
der Opfer, is in gonz Spezielle.
Er hot Charisma, net gelorre,
soin Glatzkopp glänzt, ich sehs do howwe.
In 7er BMW mit Akkustaubsauger, hot der sich gegönnt,
uff den BMW issa stolz, sou wie frieher uff soi Ent.
Ä Carbonversiegelung hot die Karre uff‘m Lack,
die Alufelge butzt Opfer mimm Zohbärschtel ab.
Er wienert soi Auto un pflegt‘s wie ein Schatz,
der BMW, der glänzt wie soi Glatz.
Kronkhaft schrubbt er, bohnat, wixt,
soi Auto in der Sonne blitzt.
Sou fährt er dorsch die Grawestroß,
rechter Hond, do war was los.
In Bulldock un ä Roll stäihn do,
uff die Roll flieje Dachziegel – un newedroh!
De Werner Schulz soi Dach abdeckt,
mol trifft da die Roll, mol trifft da sä net.
Hauchdünne Ziegel-Artefakte,
treffe ‘s Auto, des gelackte.
De Hobbydachdecker guckt emol dumm,
de Opfer hupst im Dreieck rum.
Cholerisch dem Infarkt gonz nah,
Andreas Opfer groint sogar.
Greischt „Schatz, moin Schatz“, sou heert mas klinge,
wie Gollum, aus ‘m Herr der Ringe.
Er hot sich net in de Gewalt
soin Karre grad vier Woche alt.
Die Windschutzscheib en Kratzer hot,
den sieht ma blous mim Mikroskop.
Doch fa den Auto-Fetischist,
des Kratzerle ein Grawe ist.
Nomen est omen, sag ich blous,
deswäije heest se Grawestroß.
Is alles wirra gut bei denne Halunke,
de Werner hot mim Altparre ä Biersche getrunke.
Auf Mundschenk, Woi noi un koo Soß,
mer trinke uff die Grawestroß.
Woifeschd
Wie en Urknall, sou gewaldisch un eschd,
sou war des Johr unsa 60. Woifeschd!
Om Freidag is gfeiert worn mit de Bongaz – full house,
die Leit im Zelt warn in Rage, wollte gar nimmäi naus!
Getränke leer, du liewa Gott,
wonns warm is, gäit halt alles fort!
Om Samstag war wie immer die Krönung,
fer die neije Hoheite wars faschd e Verhöhnung,
es Zelt war in Uffruhr, die warn alle net leise,
fer die Mädsche uff de Bühn war des rischdisch scheiße,
de Kilians Stefan fun Lützelsaase,
hot die Leit faschd all zum Deifl gehaase,
om lautschde war, so hab ich vernumme,
ohna fun unsare Trachteträger, der war dorschdisch kumme,
der hot gschennt wie en Rohrspatz, weil des gabs noch nie,
Krönung noch net rum, Freigetränke-Kontingent hieh,
ohna hinna de Thek hot gemohnt er kennt reschne, wär schlau,
der Dorschdische hot laut gschennt wie die Sau!
Die Mikrofon-Technik derweil noch net repariert,
dodebei is do extra e Technikerin rummarschiert,
awwer wonn die Verbindung halt fehlt, do machschde nix,
noh, des is jetz echt kohn Witz!
Ohgeblich hot ohner fum Woirondell,
dem war beim Ausschenke die Akustik zu grell,
de Stecker fun de hinnare Box gezorre,
wonn isch sag, es war en Goldische, isses net gelorre.
Un om Samstag grad schun wier,
leer war de Bestond fum Bier,
awwer bei‘me wohlgsonnene Bauer in de Siedlung hinne,
konnt de Verkehrsfaroin noch 400 L Gerschdesaft finne.
Es Woifeschd war schee un wohnsinnisch wischdisch,
un wonn vorne ohns babbelt is mer still – nix onnares is rischdisch!
Jeden Owend warn die Getränke schier leer,
in Hemschbach steppter wier – de Feschdzelt-Bär.
Mundschenk schenk oi, bevor unser Kontingent,
do in de Middagshitz verbrennt,
isch trink uff Elektrik, Reschner un Woi,
so uffregend kenne Hemschbäscher Feschde soi!
See
Hemsbach hot mol wir ko Geld,
mag glaabt net, was de Stadt oifällt.
Präsentiern unsan Wiesensee, gonz uff die schnelle,
als eine offene Badestelle.
Dodebei genau betracht,
hot dem Jürgen soi MAX, mäi Verluschte gemacht.
Un was heest offene Badestelle?!
Wie soll ma sich donn des vorstelle?!
Rund um die Uhr konnscht dich dort aale,
brauscht kohn Oitritt zu bezahle.
Rase mähe, Abort putze,
mache die, die des dort nutze?
Trinkwasser, im Sanitär,
gibt’s natürlich keines mehr.
Im See als offene Badestelle,
schwimme Knoddel, uff de Welle.
Hunde sieht ma dort frei laufe,
die schärre Sond uff Hundehaufe.
Meterhoch Gras uff de Liegewiess,
un zwischendrin wächst Cannabis.
Kompfschwän kämpfe gäije Schwimmer,
wer‘s iwwalebt is de Gewinner.
Glassschärwe, Spritze, Verhüter im Sond,
ma denkt, ma is om Wolgastrond.
Es gängt net long, ich sags mit Ruh,
es Gsundheitsomt, mach alles zu.
Donn kimmt fa uns, die Bürgerstrafe,
die Stadt muss unsan See vakaafe.
Das sich ein See net rentiert, do brauscht net rumeiern,
heer, nemmt doch ohfach unsa Steiern!!
Im Mittelalter de Zehnte, es Finonzomt kassiert heit beinoh de zweite,
fa Energieversorgungfehler, un Maut-Wixer-Pleite.
Ich muss mich beruische un ebbes Trinke,
ich seh moin Dokta drunne winke.
Horsch emol, du ma moi Troppe noi. ………….Parre trinkt
Jetzt geht‘s wier, ehr Leit ich bin wirra do,
ich fong om beschte noch emol oh.
Ach wie war des friehr sou schee,
in unsam alte Wiesensee!
Mer Hemsbächer un all die Fremme,
hawwe do drin schwimme kenne.
De Bootsverleih war intressond,
weit iwwa Hemschbach naus bekonnt.
S’gab ä knietiefes Wasserbecke, fa gonz klone Reiwa,
un ein Wassergymnastikpool, fa die ältere Weiwa.
In dem Pool häwwe Kinna schwimme lerne,
ball gäiht‘s noch Woinem, Hepprem, Verne.
Mim See als Urlaubsparadies, is Schluss,
fa arme Leits Kinna, war er ein Genuss.
Ja unsan Wiesensee, muss weiche,
dort gibt’s jetzt Bauplätz, fa die Reiche.
Hoscht 10 Millionen Euro zur Hond,
grikscht 1000 qm mit eigenem Strond.
Unsan See wert uns fehle, dort hämer bussiert,
häwe beim Geisel, beim Pauli, beim Kater, beim Mongold, bei de Erna diniert.
Sinn uf Biene getrete, wu die Reiche ball wohne,
die alte Kerweparre, schwärme vum Trend, owe ohne.
Mundschenk schenk oi, ich trink uff die schnelle,
uff offene Ärsch un Badestelle.
Dr. Hilkert
Wer Dr. Otto Hilkert kennt,
der waas, der Monn is kompetent.
Vorgs Johr issa zommegfahrn,
soi Rousesteck voll Blattlais warn.
Er ist mit de Wingertspritz in die Rouse noi,
die Blattlais, die gäin alle oi.
Die Wingertspritz hot unsern Held,
s‘war noch was drinn, in de Garage abgstellt.
Im Friehjohr warn wier Blattleis do,
die Rousesteck, do warn sä droh.
Für Dr. Hilkert wars net schwer,
er spritzt die Wingertspritz gonz leer.
Der Deifel im Detail drinnsteckt,
die Rousesteck sinn all varreckt.
Geschdan noch sou gritzegrie,
dags druff schwarz, die Rouse hie!
Dr. Hilkert hot zwee Buwe,
de Bernd un unsan Lutz, der Guure!
Altkerweparre Lutz der Held,
mer wisse wie er sich verhält.
Der nahm die Spritz zu Winterzeite,
un dut ä Spritzbrie zubereite.
De Rousesteck hots nix genitzt,
ma waas net, was de Lutz verspritzt.
Sogar moim klone Informant,
is dieses Mittel unbekannt.
Auf Mundschenk her, kumm on die Fohn, (Fahne)
mer trinke uff de Hilkerts Clan!
Christbaum
Woihnachte, Coronazeit,
in Haufe Kartons, liewe Leit!
Zalando, Amazon, Konsorte,
verschicke die on alle Orte.
Was Leit net gfällt, net rischtisch liggt,
wert umme-schunscht Retour geschickt.
Umwelttechnisch alles Scheiße,
dagtäglich gäiht de Dreck uff Reise.
Bei Chrischtbehm sieht des onnascht aus,
die griekscht so schnell net aussem Haus.
Mit Corona war des schwer,
es kimmt ko Jugendfeierwehr.
De Bauers Sven, de Sohn vum Fritz,
heedt ehrenomtlich, is kohn Witz,
mit Container richtisch groß,
die Chrischtbehm abgfahrn – koschtelos!
Die Leit hehn ehr Behm blous bringe misse,
wern donn in de Container gschmisse.
Wonn ohns den Bohm net schmeise konn,
macht des vun’s Bauer’s halt in Monn.
Die Firma Bauer heedt fa die Jugendfeierwehr Spendeboxe uffgstellt,
und donn noch was gschpend, vun ehrm eigene Geld.
Sou isses in Sulzbach uffm Schulhof geloffe,
die Woinemer Stadtverwaltung war do gonz offe.
Hemsbachs Verwaltung war ultra-korrekt,
verlongt vum Bauer ein Hygiene-Konzept.
Des hehn sä sich selwat schreiwe kenne, noh die hohe Rathausherrn,
die wollte vum Sven om Arsch geleckt wärn.
Die Abfallpirate der AVR, häwwe in Hemsbach Container uffgstellt,
nochem Bauer-Konzept, fa in Haufe Geld!
Corona die Kronkett, ich sags nochemol offe,
Hernkäschte sinn schwer betroffe.
Sou in Hemsbächer Drecksack, sou in Wadebeißer,
wahrschoinlich ein besonderer Scheißer.
Der schmeißt bei mä Owa-Rothausverwalter, privat, ohn ohnzische Zettel in de Briefkaschte noi,
uff dem konn ma folgendes lese, des war foi:
An alle Hemsbacher Haushalte:
in der Zeit zwischen Heilige Drei Könige Mi. 06.01.2021
und Maria Lichtmess Di. 02.02.2021 können ihre Weihnachtsbäume im und rund um den Hemsbacher Rathausbrunnen kostenlos abgestellt werden.
Wir bitten Sie die AHA-Regeln einzuhalten.
Bauhof Hemsbach, Abteilung: Leergut-Produktion
Drei-Vier Dag später war in de Woinemer-Nochrichte zu lese,
dieser Zettel wär in alle Hemsbächer Briefkäschte gewese!
Es war blous ohn onzische Zettel, in ohm onzische Briefkasch un jetzt kimscht du,
in Amerika säischt ma „Fake News“ dezu.
Den Zettelschreiwa suche sä noch,
wonn sän vawische, hockt da beim Becker im Loch.
Auf Mundschenk schenk oi, schunscht misse ma boxe,
uff de Hernkaschte-Inhalt vun Hemsbächer Ochse.
Sexismus
Im Friehjohr gabs eine Sexismus-Debatte,
uff Schaustellerwagen häwwe sä Pin-Up Girls katte.
Comic-Zeichnunge uff Reitschul und Scooter,
zeige als Werbung, aufreizende Luder.
In Stuttgart un Monnem siescht halbnackte Weiwa
uff de Hemschbächer Kerwe nur gekleidete Leiber!
Unsa Hemsbächer Kerwe ehr Leit des wisst ich,
iss politisch korrekt, war niemols sexistisch!
Die Schaustellerbude sinn moralisch gebaut,
ma sieht iwwahaupt koh naggischi Haut.
In feministische Kreise waas SIE genau,
wer naggische molt, des is ä Sau!
Sai gabs viel in de Renaissance,
heitzudaag hehn die koh Chance.
Michelangelo war sexistisch gepolt,
in die Sixtinisch Kapell, de Adom naggisch gemohlt
Aus Carrara-Marmor, ich sags in mä Sätzel,
modelliert der sogar dem David soi Spätzel!
1480 Sandro Botticelli, molt in die Mitte,
die Geburt der Venus, mit einer naggischen Titte.
10 Johr Später flieje in Hemsbach die Scherwe,
1490, nachweislich – Schlägerei uff de Kerwe.
Im selwe Johr molt Leonardo da Vinci, Universal,
anatomisch genau, naggisch egal.
Moralistisch Grüne Politiker_inne, heert ma laut schenne,
die Renaissance-Kunst, deede die heit verbrenne!
Awa die schennschte Bilder gabs in de Ontike,
uff Pompeji‘s Mosaike, sieht ma alte Römer flicke.
De Feminismus treibt gonz besondere Blüte,
uffm Oktoberfescht wolle se ‘s Dirndel verbiete,
Ehr lacht, ich konn mich do net frahn,
ich bin den Busen zugetan. Prost ehr Mädchen !
Glocken
Die Marie un de Karl, die beide,
die warte bis die Glocke laite.
Wonn on de Christus-Kersch dohinne,
die schwere Glockeschwengel schwinge,
huppse die zwee in die Kiste,
sinn schoinbar Glocke-Fetischiste.
Was Marie kreischt, de Karl leis stöhnt,
wert vun de Glocke iwwatönt.
Die Nochbarschaft der Kersch dohinne, hot in Tinitus im Ohr,
imma wonn die Glocke klinge, im Homeoffice gibt‘s volles Rohr.
Toleranze iwwaschritte, Hernkäschte schun gonz varrickt,
Advokate häwwe g‘stritte, ich häb nimme dorschgeblickt!
De Prozess war korz, wäje denne bleede,
Dezibel – Hond – Messgeräte.
Mit dere gottverdammte Scheiße,
konn ma Lautstärke beweise!
Die Stadt, hot die Scheißdrecksdinger oigfiert,
un die Kerwegebiets-Ohwohner, gäije die Kerwe, uff Lärm sensibilisiert.
Sensible Ohwohner, bewaffnet mit dem Mess-Gelärsch,
ermittle die Lautstärke der Christus-Kersch.
Das Messergebnis-Protokoll der Glocke-Nochbarschaft zeigt klar,
dass die Glocke viel lauter sinn, als es die Kerwe je war!
Die Glocke häwwe ausgelitte,
de Karl wärt nimme zugeritte.
Ein Schallschutz um die Glock muss her,
schnell, schunscht gibt’s koh Glocke mehr!
Die Glock ruck-zuck mit Holz verbaut,
des hot de Parre, selbscht geklaut.
Die Glocke laite jetzt im Haisel,
dem Karl ist die Marie zu leisel.
Ä Eheberatung steht ins Haus,
die Marie geht nimme aus sich raus.
Das Beratungsergebnis war famos,
sie ziehe in die Gardestroß!!!
Auf Mundschenk geb noch ohner her,
uff‘s Gelait beim Kreischverkehr.
Kirchenmusik
Sie – gut katholisch, Doktortitel,
‘s hot kohna gsaaht, es brennt de Kittel.
Ihr Dokda-Ärwet iwwa Luther,
der gab ihr Protestanten-Futter.
Die Christuskersch, die ist ihr Ziel,
weil sie die Kersch stillhalte will.
Kersche-Musik wunderbar,
geht uff de Sack vun derre Fraa.
Mit Frauenpower demonstriert,
sie monchmol ah unkontrolliert,
wie eine Furie der Ontike,
die Kersche-Deer kriegt Schläg un Tritte!
Genau wie Luther schläischt die Kloh,
on die Kersche-Deer droh!
Der Orgelspieler, der nur iibt,
ist bei ihr net sou beliebt.
Wäijem Lärm der Orgelpfeife,
lässt sie die Polizei oigreife.
Die Polizischte warn vor Ort,
schittle de Kopp un fahrn wier fort.
Frau Doktor lässt Albert Löffel staune,
sie kämpft gäije die Orgel un Posaune.
Sogar ich bin gonz verwirrt,
ist Wallenstein Re-inkarniert?
Mer brauche kohn Prager Fenschterstorz,
mer hawwe diesen Kittelschorz!
Konfessions-Krieg kennt ma‘s nenne,
doch a die Katholike schenne.
Als Musiker, do muss ma iiewe,
schunscht heert sischs oh wie Kraut un Riewe.
Un Kersche-Orgel, was in Krom,
iibscht in de Kersch un net dehom!
Liewi Fraa nem mer’s net krumm,
vielleicht wär’s besser du ziegscht um.
Owweri Bachgass un Gardestroß wär garnet schlecht,
dort herrscht katholisches Lautstärke-Recht!
Ich häib moin Krug un frog om End,
was unsan Herrgott driwa denkt.
Musik:
Tink mer noch ä Achtel,
Tink mer noch ä Achtel,
oh du alti Bappedeckelschachtel
Tink mer noch ä Achtel,
Tink mer noch ä Achtel,
oh du alti Bappedeckelschachtel
Chor der Kerweborscht:
„Oh Susanna, du hoscht om Arsch in Lewafleck,
Oh Susanna, den lutsch ich dir noch weg“
Friedhof
Die Sachgebietsleiterin fum Friedhof, die gut,
des is die Iris Roinemuth.
Hochkompetent, sie ist ein Schatz,
sie find fa dich de rischtische Platz.
Do wert net ghondelt, blous gehändelt,
wonn sie fa dich doin Platz auspendelt.
Kohn‘s hot sich beschwert, niemond wollt fliehe,
uffm Friedhouf dohinne, do bleiwe sä lieje.
Abghaut is ohna, dassden garnimme findscht,
de externe Douregräwa, de Friehoufsdienscht.
Er hot Löcher gegrawe, und wirra zugschmisse,
Beerdischunge horra on sich gerisse.
Die Stadt wollt wier Geld sparn, wie ma sä kennt,
hot de Friedhouf vergewe in dem soi Händ.
Die Nummer, die war mol wir in Flop,
jetzt issa fort, der Dourekopp!
Sie häwwe de Friedhof wir städtisch besetzt,
die Abteilung Leergut vum Bauhof do hinnern versetzt.
De Welke Hoinz, do fraad der sich,
Leit, hot der gern unter sich.
Die Reinemuths Iris, dahlt wir die Liegeplätz oi,
do wäscht net verarscht, do kimmscht unne noi.
Externe Vergabe, wenns interessiert,
häwwe uffm Hemsbächer Rothaus noch nie funktioniert!
Mundschenk schenk oi, heit bin ich froh,
Frau Roinemuth ich bleib noch do.
Biomüll
Jedes Johr zur Sommerzeit,
die gleiche Sauerei ehr Leit.
Die Biotonne wärn zu Qual,
es is sou rischtisch asozial.
Die Tonne stinke wie die Sau,
ich bin im Gsicht als Grie un Blau.
Machscht du de Tonnedeckel uff,
do stinkts verweest vun unne ruff.
Die Madehaufe grouße Bolle,
es is viel Lewe in de Tonne.
Do konnscht kotze, des is foi,
grad naus in den Ohma noi.
Ja sagt emol, wu lewe mer donn,
im Mittelalter? A isch häb in Zorn.
Mer sinn doch ko Decksai, die des net steert,
im Summa kehrt wöchendlich geleert.
Monnem und Heidelberg leert wochenweise,
un mer? Mer läwe in de Scheiße.
Es longt doch im Lewe oh Pandemie,
ich nehm die Sauerei net hie.
Und die AVR säscht dozu foi,
in die Biotonne derfe koh Essensreste noi.
Und ah in die graue Tonne deets net noighern,
ja soll ichs vielleicht in de Abort noi leern?
Es gibt a schun Leit, a wie bled konn ma soi,
die gfriern bis zu Abfuhr ehrn Biomüll oi.
Abort und Oigfriern ist ökologisch koh Lösung,
donn liewa im Ohma die Abfallverwesung.
Awa jedi Summawoch Biomüllabfuhr des hätt in Sinn,
so denk isch, weil isch koh Decksau bin.
Ich trink uff de Biomüll un sag schee Proscht,
der in Monnem und Heidelberg a nix koscht.
Apotheke
Unsa ältschdi Apothek in de Bachgass do drunne,
hot de Abdelali Ziate als Käufer gfunne,
un die Koryphäe, des misster wisse
hots glei mit Personal un Kundschaft verschisse!
Die alt Apothekerin, die hatte Esprit,
ein Altkerweparre war verliebt in sie,
in wenische Monate hot Abdelali des gschafft,
die ältschd Apothek fum Ort hiehgerafft.
Wärn mer in Hesse, ohne Scheu,
in Bohnhofsnähe en Puff kämt noi.
Awwer midde im Ort, wer gängd donn do hie,
nur auswärddische Parre un onnares Vieh.
Jetz kimmt e feddi Inflation,
die Apothek werd Bohnhofsmission!
Die Heilsarmee zieht ball dort oi,
schlimmer net konns gar net soi!
S beschde wär des Ding nimmt gonz,
unsern alte Edoms Fronz!
Die alte Parre maches leichter
saufe dort ihrn Jägermeischda.
Die gewwe dem Lade dort ah ihrn Sege,
do brauche die net long zu iwwalege!
Mundschenk, schenk mer ohna oi,
es muss kohn Jägermeischda soi!
Stadt
Ledschd Johr im Herbscht, mer konnts in de Zeitunge leese,
war e 40. Dienschdjubiläum fun emme Beomte gewese,
e groußes Bild mim Jubilar,
Personalrat, Blume, Boijemoschda – klar.
Noh, so klar is des alles mol net,
jetz werd Tacheles geredd.
Wonn ohns sou long bei ohm schafft,
macht mer sisch Gedonke mit gonzer Kraft,
besorgt was schäines, bereit sisch bissl vor,
schreibt e Redd, bestellt vielleicht en Chor.
De Personalrat is los, kaaft riese Blumme un deire Woi,
zum 40. derfs schun was Besonderes soi.
De Dieschdherr awwer, der hot wohl nix vorbereit katt,
ohne zu froore hot der sich die Blumme fum Personalrat gschnappt,
un statt se dem jubilierende soiner Fraa zu gewwe, gonz galont,
driggder se grad soim longjährische Mitarweider in die Hond.
Dezu e Flasch, wahrscheinlisch ausm Rothauskeller,
zweitklassische Woi, des ging halt schneller.
Isch hab gheert, dass ah „The Länd“ e bissl hängt,
soi Jubiläums-Urkunde hewwesem ah noch net gschenkt.
Drum mach isch des heit mol üwwerbrückend vor sou viele Gsischda,
un üwwerreich die Urkunde stellvertretend fer de Inneminischda!
(ggf. Übergabe Urkunde an Rittersbacher …odda ah net)
*** optional je nach Öffentlichkeitsstatus***
Un noch was fun do drin hab isch uffgschnappt,
des mit dem Corona macht dabbisch hawwe mer vorhin schun g’habt.
Die Stadt is sou im Geldsparwohn,
do stehn noch gonz onnare Sache uff de Fohn,
es werd grad geprüft, un des detailliert,
ob de Bauhof fun Hemschbach net mit Woinem fusioniert!
Wie soll donn des wern, mit sou‘me Bauhofapparat,
wonns on so Feschde wie Kerwe gäit, froog isch misch grad.
Die fun Woinem, die wisse doch net,
on wellem Haus hängt die grouß Lichterkett,
wu is de Hooke un on wellare Wond,
fer die Wimpel üwwerm Gutselstond?
Isch hoff, die üwwerläije genau un es is noch net zu spät,
vielleicht froore se mol misch, de Parre als Kapazität,
der deed’s saare sou wie’s is,
heert uff mit dem dabbede Geschiss!
Mundschenk schenk oi,
ich trink uff die Weisheit im Woi,
uff dass die Denkkraft fun de Stadt,
mol blumisch en weise Woirausch hat!
Kerwegass (Reperbahn – Lindenberg 89‘)
Ich komm viel rum – häb schun was g‘sehn
Laurebach – New York – Athen
Coronazeit – s‘war iwaral so traurisch.
Liewersbach, im Owendwind
weit un breit ko Venuskind
Corona aus, do owedraus, sou traurisch
Orra in Woinem, uffm Marktplatz wasen Krom
Frog ich mich nischtern : Wu bin ich donn dehom?!
Ich stäi gonz bleed in Sulzbach da
such die Enjoi Erotikbar
Corona – Zu, es gonze Dorf so traurisch
Stürmich war‘s in Lützelsachse dort wurde alles weggeblase
Trotzdem war ich, irgendwie sou traurig
Ich waß net, warum ich net so richtig happy bin
Doch nach ‚rä Weil do kimmt mass wirra in den Sinn
Es gibt‘ n Kerwe-Boulevard
Die Kerweschlumpel ah ganz nah
ich brauch Läwe, uff de Kerwe
Kerwegass- mache mass
Du geile Meile, des macht Spaß
Kerwegass- alles klar
Und aldi Bäile, jetzt bischt du wirra da.
Bischt auferstanden, aus dem Siff Lady Corona, hatte uns im Griff
Kerwegass- du bischt schun alt
du aldi Bäile, ich bin in dich verknallt
Kerwegass – du heiße Braut ich bin so schüchtern un du sou arg versaut
Kerwegass- mache mass
Du geili Meile, des macht Spaß
Kerwegass- alles klar
du alti Gangsterbraut, jetzt bischt du wirra da.
Ich häib moin Krug, den klone Zwerg,
trink uff de Udo Lindeberg – Prost
Altparre
Ein Altparre, schun arig alt,
hot sich als net in de Gewalt.
Forgs Johr horra dumm geguckt,
er hot soi dritte Zäh verschluckt.
Soin Heidelberger Zohnarzt, ein Weiser,
säicht donn zu dem besondere Scheißer.
Kaaf da ä Nudelsieb, odda glei zwee,
s’is billischer wie neije Zäh!
Die Zahnwanderung vum Enddarm ins Klo,
die hält mit Sieb om Ärschel oh.
Mim Nudelsieb war er om saiern,
wonn ich droh denk, muss ich schun reiern.
7 kg Sauerkraut,
hot der in ohnre Woch verdaut.
Am siebten Tage auferstanden,
im Nudelsieb die Zäh sich fanden.
Die Dreifach-Implantatskrone ist wiedergekehrt,
der Scheißhaufe, 2.000 Euro wert!
Zwee Dag die Zäh geroinischt, ab ins Maul,
jetzt frisst un saift der wie in Gaul.
Ein Flohmarkt-Tipp, gonz newebei,
beim Sträiwel, kaaft ko Nudelsai.
Auf Mundschenk, uff die dritte Zäh,
Bernd, doi Raffel, wunderschee!
Schluss
Om Schluss will ich eich noch ebbes sarre,
des liegt mehr schun ä weil im Marre.
Wie kennt ehr blous, ich mach koo bosse,
eiern Hernkaschte, sou verkumme losse.
Leit basst uff, uff wenn ehr hert,
die Einsamkeit, hot Zelle zerstört.
Des dabbische, elektrische Internet,
ersetzt ä guti Freundschaft net.
Die Zeite, die wern immer schneller,
es gibt viel bleede Selbschtdarsteller.
De Influencer konscht net folge,
funn denne werd ehr blous gemolge.
Om End sinn alle bleed im Kopf,
un s‘gonze Johr im Onlienshop.
Mer misse wirr die Freundschaft pflege,
die gute Zeite net wegfege.
Gäiht zomme Esse, trinkt in Tee,
macht Rechner aus, kummt uff die Beeh.
Prost!
Ich will eich jetzt net länger qäile,
swar schee dohowe zu vazäile.
Den Kerwesege grigt er glei vun mir,
ich will jetzt koon Woi mer ich brauch jetzt ä Bier.
Sanftes Glockengeläut AC/DC Hells Bells
(Alles in Gebetsstimmung)
Mer warn in Monnem , – warn in Paris,
om Berling drowe, – uffm Bach soinrä Wiess.
Awa s`beschte war, – im gonze läwe,
die Hemsbächer Kerwe!
Mer trinke de Schnaps, – vum Grinnewalds Paul,
mer sin sou hart , wie de stohene Gaul.
Awa s`härtschte iss, – im gonze läwe,
die Hemsbächer Kerwe!
Ich ess sou gern, – Kartoffelbrie,
du griegt koni, wie die Modda hie.
Awa s`beschte iss, – im gonze läwe,
die Hemsbächer Kerwe!
Mer gäihn im See, Nachts naggisch Baden,
mer grawe oh, mit unsere Spate.
Awa s`geilschte is, – im gonze läwe,
die Hemsbächer Kerwe!
Jetzt gehet hin in Frieden und trauert nicht wenn euch einer abgeht,
denn es werden euch im Leben noch weitere abgehen.
De Thomas Michel behüte euch!
De Abeles Karl lasse sein licht leuchten über euch!
Un de Kronauers Hoins gebe euch seine Säsche!
(Normale Rede)
Mer drei gain jetzt nunna , von dort wo wir kammen,
ich sag eich blous ohns „in Ewischkeit Amen“!
Wem kert die Kerwe ……………………………