Isch grieß eisch all, ehr Kerwegeile,
un ah die, die wäijem Lärm rumheile.
Un weil isch gonz viel Ohstond hab, -un jetzt horschda-
sag isch leise Servus zu unserm Bojemoschda!
Isch bin eiern Parre, de Wewwers Marc,
un heit is im Lewe moin allerschennschder Dag!
Bin e Urgewächs do aus dem Ort,
im Lebdag gängd isch do net fort!
Mer Hemsbäscher Kerweparre sin wortgewondt,
gutaussehend, mit Sinn un Verstond.
Isch bin im Außedinnschd fer Gastrobedarf,
gelernter Koch, die Klinge sin scharf.
Isch war Kerweborschd, wieviel Johr waas de liewe Gott,
der mir des schun in moi Kinnaschäis gelegt hot.
Isch bin quasi einer Kerwedynastie entsprunge,
un jetz endlisch ah mol unna de Zylinner kumme.
De Vadda war Mundschenk, moin Bruder alles außer des,
fer misch is die Kerwe moi Lewe, un im Lewe kohn Stress.
Moin Mundschenk, de Nedzas Andreas, en treue Begleiter,
ihr kennt den als ohna fun de „Right Said Fred“-Bulldog-Reiter,
der ist faschd uhgfähr so in moim Alter,
schaffe dudder beim Krause Walter,
bei de Keggler isser in de Freizeit unnawegs,
zwo liewe Kinna gäin dem dehom uff de Keks,
schunschd hot der blouß daijre Hobbys, kohn Witz,
un dodenewe koh Zeit fer nix.
De erschde Borschd is de Sascha Winden,
bei de Wahl ledschd Johr konnte se kohn bessere finden,
der is stets mit de Borschde unnawegs un fabondelt,
was de schunschd so mäschd „Sascha“, hawwe mer noch gar net behondelt?!
Is ah net so wischdisch, mer fonge donn oh,
schunschd isses ledschde Thema erschd heit Owend um zähine droh.
Auf Mundschenk schenk mer ohna oi,
es muss emol getrunke soi – Prost

In Monnem is ma nobel, do fährt ma mit de Schees,
der ohne Gaul hot Plattfieß, der onnre is nervees.
Sou wie die Alten sungen,
zwitschern es die Jungen.
In Monnem uff de BUGA – do sin sä all nervees,
die Hernkäschte gelocht – wie Emmentaler Käs.
Frier Monnem Multi-Kulti heit sin sä national,
bischt ethnisch falsch gekleitet, in Monnem net egal!
Kulturelle Aneignung – werd fun de BUGA unnastellt,
gleichzeitisch sieschte Blumme – aus de gonze Welt.
Moin Froind, ein Afrikaner – träischt Lederhosse foi,
die BUGA-Chefindianer – losse die ihn noi?
Moralistische Wahnvorstellunge, fun Akademische – Intellektuelle,
die bringe die Faschiste, ball wier on erschte Stelle.
In Hemschbach uff de Kerwe, sinn alle oigelade,
ah die, die in de Woch blous 4 bis 5mol bade.
Konnscht ohziehn was de widd, Hauptsach bischt net naggisch,
Ausnohme bestehn, wond jung bischt, schee un knackisch.
Moral gibt’s uff de Kerwe, bei uns in Hemschbach net,
mer londe allminonna irgendwu im Bett.
Prost Mundschenk auf mer saufe, uff die Alkoholvernichtung
des is laut Boijemoschda, unsa moralischi Verpflichtung!

Driwwe in de Gaadestrooß, ihr wisst des wohl
steht seit 1901 unsa scheeni Goetheschul.
E Gebäude rondvoll gfüllt mit Geschichte,
kennde die Mauern babbeln, die heede zu berichte!
Schun elloh fun moinre Familie gäbs e paar Sache,
awwer des Buch will isch jetz net uffmache.
Stattdesse hot mer in de Zeitung lese misse,
un jetz kimmts, des misst ihr wisse,
dass es koh Kronkezimmer fer die Kinner gibt,
beim Lese bin isch ball fum Kischestuhl gekippt.
„Familienfreundliche Kommune Plus“, der Titel is Beschiss,
wonn in de Schul noch net mol Platz fer malaade Kinner is!
Sonja K. gilt unsan Donk,
jetz waas de Boijemoschda, ah Kinner sin mol kronk!
Die hottem in de Gemeoinderatssitzung erschdemol uffgezeigt,
was des potentiell do fer ihn in soim Château bedeut‘,
do deed der zwische Oiwohner, Ausweis un Schnaggler,
kronk uffem Flur rumlaije, wie de ledschde Barackler,
misst waade, un wär‘er noch so malaad,
uff soi Rettungs-Kronkefahrt.
Heert‘s donn do uff, dass mer diskutiere üwwer so en Krom,
johrelong war de Unnarischd blouß dehom,
die Kinner, die unner Corona beschult worn sin,
die hawwe doch eh schun en Schade fers Lewe drin,
muss mer do jetz ah noch ums faregge,
om Platz in de Schul sparn, diese Jecke,
des Gebäude is halt alt, schee un cool,
net so wie die Hebelschul.
Die is nooch neijschde Wissenschafte kreiert,
do werd maximal flexibel e Wond verrickt un dekoriert.
In altehrwürdische Heiser geht sowas halt net,
do drin ah net – jedi Wett.
Nooch de Sitzung gabs in de Verwaltung wohl en Ruck,
newam Buwe-Abbort gibt’s jetz e klooni Kronkestubb,
wu frieher de Butzfraa ihrn Bese stond,
kriggschd jetz en 1a Wundverbond.
Besser wie nix, awwer gut isses noch net,
so long bis es Lehrerwohnhaus fer die Schul gonz nutzbar werd.
Auf Mundschenk, jetz trinke mer mol uff die ältschd Schul om Ort,
do drin galt schun immer ‘s gesprochene Wort!

Die CDU ihr liewe Leit,
die hot jetzt jo die Schwierischkeit,
noochdem Fraa Zimmer abgerickt,
un jetz die FDP beglickt,
fehlt ‘re nun „eine Quotenfrau“,
doch unsa CDU, die is schlau!
Weil es on Personal ihr mongelt,
hot se sisch jetz en Prinz geongelt,
en Prinz gonz ohne Furscht un Tadel,
kohn FUN, kohn ZU, jedoch fun Adel,
der mohnt mer sollt mol was probiern,
um junge Leit zu akquiriern,
so en Jazz-Friehschobbe wär de Clou,
do käme bestimmt ah junge Fraue dezu,
die schone de Partei ihr Kasse,
do brauchts ah koh Stitzstrimpp ohzubasse!
Altersdiskriminierung nenn isch das,
moin liewa Prinz des is kohn Spaß!
Un dodezu noch en guude Rat:
is die Presse do, sei moderat!
Knappe schenk er mir was ein,
isch trink uff de Prinz Sayn-Wittgenstein.
***
Awwer des solls net gewese soi,
de CDU, der fällt noch mäijna oi!
Die Grundsteier, die eh verhasst,
werd jetz mit Uffwond ohgebasst,
gonz klar, des werd bestimmt mäijna koschde,
belaschdend is der Haushaltsposchde,
die CDU is gonz gewitzt,
mol sehn, ob’s bei de Wahl was nitzt,
die Hebesätz, die will se senke,
de Mehruffwond de Bürger schenke,
um nooch de Wahl, ihr werd all sehn,
die Hebesätz um e paar Punkte zu erhöhn.

En Schelm, der Bäises debei denkt,
wer Grund besitzt, der kriggd nix gschenkt!

Grundbesitz is e guudes Stichwort,
bringt Londwirte in Rage in unsam Ort.
Solarstrom is e foini Sach,
des waas mer sogar in Laudebach.
Die CDU is net begeischdert,
dass Ackerlond werd zugekleischdert!
In Hemschbach uhdenkbar, ausgeschlosse,
Solar uffm Acker werd hart beschosse.
Mer soll debei jo net vergesse,
Solarstrom konn mer halt net fresse.
Die CDU sagt do gonz rischdisch,
Getreideäcker, die sin wischdisch!
Drum setze die uff Biogas,
aus Rinderdung, Abfall un Gras.
Gibt’s donn – des frog isch misch ear Leit,
genügend Rindvieh drauß uff de Weid?
Den Standort sollt mer üwwerdenke,
de Blick in unser Stadt noilenke,
Rindviehscher gibt’s doch do en masse,
die produziern viiieel Biogas.
Mundschenk schenk nooch, aller, na zu,
isch trink uff die Plän fun de CDU!
Hemschbachs naije Cannabisvaroine, isch derf‘s net vagesse,
die suche dringenschd Ackerfläche.
Aa, des is denne viel zu kloh,
die wolle liewa Hektar ho.
Willschd doin Acker verpachte, on die Helde,
konnscht disch drin uffm Rothaus melde.
Negschd Johr uff de Kerwe, des is de Hit,
mache acht naije THC-Varoine mit.
Do beruhischt sisch die Suchtberatung mol wier,
die biete kohn Schnaps oh, un a koh Bier.
Aus eigenem Anbau, sou wie die foine Kartoffel vum Miller,
verkaafe die grasgriene Duddefiller.
Hemschbach‘s Kerwe is bunt, do simma debei,
sinn nischdan, beschwipst un zwischedorsch high.
Auf Mundschenk dreh emol ä Dudd!
Hea Parre, is doi Hern kabutt?
Aller hopp isch loss des mit dem Kiffe soi,
dodefor schenkschd du mer jetzt noch ohna oi.

Im Friehjohr, do hot ohner in Laudebach gezecht,
un ordentlich gelitert, wie fer en Hemsbäscher gerecht.
Uffem Hohmweg, do isses donn bassiert,
wie der beim Fahrrad schiewe soi Gleichgewicht verliert.
Beim zweite Gleichgewichtsverlust, hots den sou gerisse,
dass sen im Kronkehaus hewwe nähe misse.
Zur Beobachtung musst er bleiwe iwwer Nacht,
„om Arsch leckt ihr mich!“, hot der sich gedacht.
Der rieft soi Nochbarin oh, „bitte sei so nett“,
„hol mich in Hepprem ab, ich geh in koh Krankehausbett“.
Wie er drauß‘ steht, uff de Gass werd em gewiss,
dass des gar net des Kronkehaus in Hepprem is.
Fun weitem do sieht er des Licht fun Shell un Aral,
do werd em klar, do wu er is, is Woinemer Areal.
Un wia die Nachbarin ohrufe will, kimmt des Karma geballt,
verliert ah des Handy soi Gleichgewicht, un fliegt voll uff de Asphalt.
Wie‘s halt so is, ich sags gonz salopp,
de Akku fällt raus, un de PIN net im Kopp.
Er geht on die Tonkstell, säigt „loss mer mol e Taxi kumme“,
awwer blutverschmiert, wie er noch war, hawwe die den gar net fer voll genumme.
Was solls, donn laaf ich halt zum Bohnhof un wart uff en Zug,
jetzt reicht mers, fer heit is echt mol genug.
Om neggschde mojend, do schellts on de Deer,
‘s werd die Nochbarin soi, die will zu mer.
Statt desse stehn do ach ohwei,
zwee in Klamotte fun de Bolizei.
Die mache a net viel Querele,
im Kronkehaus, do deht ohner fehle.
Die zwee mache a net long Bosse,
un hewwen ohfach dehom gelosse.
Nüchtern betracht war die Idee verrickt,
im Kronkehaus hätter nämlich ah was gäje die Schmerze kriggt.
Denn unsern Zecher, der konnte nix mache,
mit gebrochene Rippe, weder huschde noch lache.
Ich trink uff de Urs, den alde Zecher,
uff Scarface, un onnan Schwerverbrecher.

Es gäit uff de Sack, un gäit uff die Gall,
jetz isse dout, die Mischelhall,
200 Leit derfe noch noi in die Hall,
mit mäijna Leit brennts schunschd iwwerall,
was do in de Hall brenne soll, des waas isch net,
blouß Beton un Stahl awwer nirgends e Brett,
drei grouße Diern gibt’s drin fer die Flucht,
wer die net sieht, keehrt unnasucht.
Doch doo hilft uns koh Groine, kooh Kruzifix,
ohne Brandschutz gäit halt nix.
De Boijemoschda hot’s fapennt,
un wonna jetz ah wier laut schennt,
nemm halt Geld in die Händ, du alter Schotte,
un duu die Brandschutzlöcher stobbe,
ich geb dir en Tipp, geb jedem 4. Besucher en Ohma Wasser mit in die Hall,
des macht gute Brondschutz uff jeden Fall,
wonn dreitausend Leit in de Hall drin sin,
sin ah 7.500 Liter Wasser mit drin.
Do konn mer spritze wie die Wehr,
volles Rohr un noch viel mehr.
E Plonungsleischdung werd jetz mol vergewwe,
des dauert un frisst Zeit, die mer net hewwe!
Die Hondballer dun jetz schun leide,
donn kumme ah noch Plonungszeite,
bis donn ohns do is, wu des mäschd,
geht’s unsam TV Hondball gonz arig schleschd!
Un des ihr Leit, des will kohns erlewe,
Hondball in de Mischelhall musses weida gewwe!
Isch häib moin Bescha prost eisch zu,
de Brondschutz is e bleedi Kuh.

Ear Leit horschd, kennt ihr schun die G’schicht?
Die haaßt: „en Sherlock Schulte beklaut man nicht!“
Im Winter ging der ins Geberg, platzt schier vor Zorn,
in soi Wingertshitt is oigebroche worn!
Was net niet- un nagg‘lfeschd war, is nimmäi do,
noch net emol ‘s heilische Wingertsradio.
De Oibruch gemeld, awwer des bringt erschdmol nix,
des is grad so, als longschd de Katz on die Bix.
Doch donn hot de Kommissar Zufall Erbarme,
iwwer Umwege fällt en entscheidende Name.
Zwo Daag schbäda, säschd en Nochbar im Larrer-Feier-Geflacker,
„isch glaab der Kerl, den du suchschd, der haust bei mir uff‘m Acker!“
Dem Typ hot mer Daags druff en Besuch ohgediehe,
em Sherlock soin Akkuschrauwer war dort uffem Disch geliehe.
Die Bolizei kimmt, un packt den Kerl om Schlawittche,
„den nemma mit, der kimmt jetzt erschdmol ins Kittsche“.
De Sherlock forschd weiter un mit viel Couraasch,
erfährt noch fun Hehlerware in re Sulzbäscher Garaasch.
Ah der heiße Tipp werd fun de Polizei ohgenumme,
en Haufe Zeig aus Garddehitte in Sulzbach gfunne.
Ordentlisch in die Mongel genumme, den Klauer,
warn die Beomte donn ah glei schlauer,
bei de Vernehmung kam raus, der Kerl hot noch mäiner Zeig versteckt,
un de Sherlock hot ohni fun de greischde Oibruchserie on de Bergstroß uffgedeckt.
En warme Händedruck fun de Bolizei – wie wunderbar,
bei uns do bischd du ab heit Ehrenkommissar.
Isch häib moin Krug uff unsern Hemschbäscher Held,
Sherlock Peter Schulte, du baschd in die Welt.

Dodefu hot Hemschbach schun immer geträumt,
jedi Strooß is fun orangene Plakate gesäumt,
seit Monate is alles in den Farbton getaucht,
un die hawwe noch net e mol daire Plakat-Plakette gebraucht!
Fer was die aggressiv Werbung gut war, mer waases net genau,
verzweifeltes Werben für GigaNetz-Glasfaserausbau,
zur Infoverohstaltung hot die Stadt in die Mischelhall gelade,
stattdesse wars awwer im BIZ mit Schnittsche-Abschwaade.
E paar Leit warn do und hawwe sisch hinnenooch mokiert,
dass des Thema jo schoinz nur alte Leit interessiert.
Fun de Jüngere war kaum ohns uff de Matt,
trotz dem Bonusprogramm mit „Frühsurferrabatt“.
Im Briefkaschde hoschd donn ständisch Werbung gfunne,
in Hemschbach sogar vereinzelt fer die Laudebäscher drunne,
mehrfach wurd on de Diern gschellt,
so long gebabbelt bis ohns im Haus Glasfaser bestellt,
un hoschde des alles net gewollt,
hawwe se disch mit Gemeggel als weida üwwerrollt.
Fun bedrängte Eigentümer war do die Redd,
un fun ohnare, die faschd die Polizei gerufe hätt.
Mer hot bei Willische … Giganetz-Stegge onns Trottwar gebaut,
üwwer Nacht wurde die mancherorts grad fort geklaut.
Was soll isch saare, des wisse mer all,
zum Stichdaag im Juli: falsche Prozentanzahl.
Aus Verzweiflung hawwe se jetz die Frischd verlängert,
bis September werd jetz weida on de Hausdiern genängert.
Isch prognostizier eisch jetz mol gonz vage,
ah mit Verlängerung werd die Aktion versage!
Wonn die Leit des net wolle, soll mer’s akzeptiern,
un net bis in alle Ewischkeit Nerve strapaziern.
Wie die NetCom schun, werd ah GigaNetz scheitern,
mit so viel Energie soll mer g‘scheiter de Service im Rothaus erweitern!
Mundschenk schenk oi, awwer nix in aaroosch,
mit Lichtgeschwindischkeit rauscht jetzt die GigaNetz dorsch.

Wohl dem, der guude Freunde hat,
om beschde in re Partnerstadt,
in Mücheln bei de Feierwehr,
do gäits bei Feschde gonz heiß her,
fun Hemschbach aus fuhrn unsa Kommerade,
fum Bauhof sin ah e paar mit – die Granate,
herzlisch begrüßt un ab dorsch die Mitt,
es Stadtfeschd in Mücheln, des is de Hit.
Getränkeständ all leer g‘soffe – schade,
beim Brotworschdstond gabs ah koh Gnade,
die Hemschbäscher Jungs in ihrm Element,
weder Zeit-Reschnunge, noch Rischdunge gekennt.
Un sou is des Nachts ohna uffgebroche,
wollt ins Bett, hot schun streng geroche,
hot sisch gedenkt, es war e Zwo-Bett-Zimmer,
moim Mitbewohner gäit’s sischa schlimmer,
der werd schun laije mit großem Getöse,
un im Neschd soi Üwwaliterung ausdöse,
leeft mit Gottvertraue, denn er is sisch gewiss,
dass die Zimmerdiehr net abgschlosse is.
Sou hotter sisch des halt gedenkt,
un is in die zuen‘ Diehr noigerennt.
Liewe Leit wu is donn der Kerl hieh,
rieft en halt oh, de Kopp voll mit Brieh,
„saaremol wu treibschd du disch mit unsam Schlissel rum?
Isch muss ins Bett, kumm vor Müdischkeit um!“
„Ah isch bin uffem Hohmweg, um misch rum is viel Wald!“
„Du Dabbes, du leefschd in die falsch Rischdung, mach sofort Halt!“
„Noh, des konn net soi, sogar die Polizei war sisch sischa,
isch bin uffem rischdische Weg, du Aarewischa!“
„Ferddisch jetz, du drehschd rum uff de Stell,
schunschd bischd du moije noch net do – un glei werds hell!“
Er hot Kehrt gemacht, uff soine Pfade,
de onner musst halt noch e bisselsche waade.

Isch trink uff die Feierwehr, fum Stadtfeschd geheilt, Thorsten, hoschda des Johr wier
e Zimmer mim Volker geteilt?! Prost

Un jetz zu’me Thema, des bringt misch in Rage,
es gäit um die Kerwe un e Ratstisch-Blamage!
Viel Lärm um de Lärmschutz, so hot mers gelese,
die Woinemer warn do die Vorreida gewese,
un Hemschbach bedient sisch gern, is schließlisch in Baden ganz oben,
wollt sisch selbschd vor‘m Gemoinderat üwwer de Kläii hinweg loben.
Oh ohnzischi Stadtradsitzung sollt unsa Kerwe rasiern,
scheißegal was die Hemschbächer Bürger präferiern.
Do häwwe die Dollbohrer als Scharfgericht,
ledschd Johr de kloh-Runde-Tisch-Kerwe oigericht.
Der runde Disch, mit Leit, die kohns kennt, hot gonze 4 Mol getagt,
donn war die Kerwe abgenagt.
Des spiegelt de Kerwe-Stellewert,
mit 4 Sitzunge die Kerwe abgschmeert.
Im Vergleich on de Bergstroß entlong, hot Hemschbach die friehschde
Kerwesperrzeite,
un beim Lärm, dut die Stadt doch schun ewisch oischreite.
E 70-Dezibel-Grenz war g’fordert fer de Kerwegass-Schall,
do isses bei re Beerdischung lauter – driwwe in de Leichehall!!
Grie-Gäihl gemischte Kerwezerstörer packe die Kerwe on de Krutz,
verkaafe Kerweverbote als Gesundheitsschutz!
Denne trau ich zu, dasse beim Seniore-Nochmitag fun de AWO oigreife,
zu laut …, wonn im Saal zwonzisch Hörgeräte paife.
Bei moina Schwesda driwwe stäit schun de Lärmpegel-Vergleichs-Wasserkocher
bereit,
koh Messgerät uff derre Welt iwwalebt des, wonn die mol schreit!
Lärmgeplogte Ohwohner losse vielleicht ah mäijner Milde walte,
deed mer zu Konzerte om Schloss e schäines Rundschreiwe schalte,
mit Dank, Hiehweis uff Verständnis und Bitte um Gnade,
im beschde Fall fer sou e Konzert noch drei bis vier Oitrittskaade.
Isch trink mol horddisch en Schluck, wie schnell is die Kerwe varreckt,
s‘wärt kohn Kerwezerstörer fun uns om Arsch geleckt.
Viel Stadträt fun Hemschbach, isch sags heit mit Stolz,
die stäihn zu de Kerwe, die saare „was soll’s?!“
Dass Politiker heit noch die Menschheit vertrete,
des gibt’s blouß in Hemschbach, im Bund konn ma bete.

E paar Stadträt werrn in de Zeitung als Konzert-Chor der Neinsager verpönt,
die sin Runde-Tisch-Kerwe-Diktature schlischt net gewöhnt.
Hemschbäscher Stadträt, häwwe Rickgrad gezeigt,
dem Runde-Tisch-Kerwe, de Arsch zugeneigt!
De Boijemoschda hot soi Händ in Unschuld gewäsche,
er mohnt, dass jetzt halt Gerichte Recht spreche.
Do simma mol g‘sponnt und gewwe foi acht,
weller Wellepäida, gäije die Kerwe die erschd Ohzeig macht!
Nooch de Kerwe-Stadtratsitzung, stond in de Zeidung, Leit basst gut uff,
eijan Boijemoschda hot
– die Abstimmung abgebroche,
– begibt sich uff die Rückfallebene,
– fürchtet ein Abstimmungsdebakel,
do kimmt schunschd kohna druff!
Viel Stadrät_inne, die stäihn zu de Hemschbäscher Kerwe,
die losse unsa älteschdes Kulturdenkmal net sterwe!
Ihre Kompfwut sollte die Hemsbäscher Verwaltungsrecke,
g‘scheiter in unsa verkummene Schule un Sporthalle stecke.
Mer Kerweliebhaber saare gonz still,
mer wolle wisse, wonn wer un wu, was genau will.
Mer fordern eine Kerwe-Zukunfts-Präsentation
– fun de Stadt,
– fun de Parteije,
– fun de Varoine un wer mitmache will fun eich Ohwohner all,
om beschte gonz grouß mit Belegte – drin in de Michelhall.
Do kennt ma Moinunge un Lösunge vergleiche,
blouß sou konn Hemschbach was Gscheides erreiche!
Hinnenooch e „Hemschbächer-Bürgerabstimmung-Kerwe“, die fordere ich,
die Kerwe muss weg, fum Kloh-Runde-Tisch.
Ich beton unsa Kerwe g‘hert Hemsbach, die Kerwe g‘hert unsa,
vum Nawwel bis zum Brunsa,
un der g‘hert do im Ort ah immer noch unsa.
Auf Mundschenk loss uff de ledschde Lärm-Akt was riwwawachse,
Ear Leit: Investiert eier Geld in Ohrn-Stepsel-Aktie! Prost!
E Kerwe wie frieher, sou sollt’s laut Stadt wirra soi,
in de Häif drin un ruisch, bei Kerzeschoi.

Doch mit frieher-„ruischi Hof-Kerwe“-Fake News zu kumme,
glaabt ehr isch bin bleed, un ah die Leit all do drunne?!
Im Johr 1490, die Kloster-Lorsch-Dokumente zeige klar,
dass domols, e groußi Jacht, uff de Hemschbäscher Kerwe war.
Eisch Noigeblaggde, sag jetzt ISCH,
ä groußi Jacht, des is koh Schiff.
In de siebzischer Johrn offiziell, des konn ich eisch zeije,
gäiht die Kerwe mit Musik bis moijens om dreie.
Achzischer-Neuzischer endet die Musik um zwei,
de Posaunechor bläst, bis nachts um halb drei.
Beim Bacchus- un Ratskeller-Open-AIR, do wars frieher laut,
sou laut häwwe mer‘s uns noch üwwerhaupt gar nie getraut!!
Wer hot‘n die Bass-Boxe-Bum-Bum-Ständ um‘s Rothaus garniert?!?
Die hot doch die Verwaltung selwat platziert!!!!
Jetzt kenne Kerwebesucher un Varoine leide,
weil Stadtverwalter falsch entscheide.
Unsa Kerwe wie schee, soll jetzt in die Innehäif noi,
sou wie‘s frieher war, bei‘s Schäfer’s mim Skiclub-Varoi‘,
Awwa im Kerwegebiet werd des nimmäi gelinge,
Kerwehäif werschd dort leider kohni mäi finne.
Die Stadt hot die alt Seniorenresidenz gekaaft fa viel Geld,
der Hof werd unsara Kerwe awwer net zur Verfügung g’stellt!
Die Kron‘ verkloppt, in ä Wohnhaus verwondelt,
Hemsbachs Kulturgut, net gut behondelt.
Jetzt is die Ringerhall droh, ich konn‘s gar net raffe,
die wern dort Wohnunge un koh Kulturräume schaffe.
De Kraftsportvaroin konn soi Hall nimme halte,
wirra oh Straußwertschaft weg fun de Alte.
Un donn noch die Zehntscheier raus außem Kerwegebiet,
mit Reddeverbot fa de Parre, sou endet dies Lied.
Isch, eiern Parre sag‘s awwa ah,
ä Hofkerwe wie frieher, wär‘ wunderbar.
Vergräißert das Kerwegebiet, un die Kerwe brauch kohn Stroßestond mehr,
wonn in de Schloßgass bis nunna, un in de Bachgass bis nuff,
drinn in de Häif, ä Hofkerwe wär.

Auf Mundschenk mer trinke uff Häif un Hernne,
fer die gonz Bleede hawwe se noch Platz driwwe in Vernne.