Ich grieß eich all emol dodrune,
rund um unsan Rothausbrunne.
Als Kerweparre mit viel Masse,
grieß ich alle Hemsbächer, Kaschte un Klasse.
Die Klassegesellschaft konscht erkenne,
Arm un Reich sin gut zu trenne.
Ich grieß die arme Leit gonz leise,
die wu mit Öl ehr Heiser heize.
Gegrießt sin die, mit Heizungsgas,
ehr seit nimme die „upper class“
Ich grieß die Photovoltaiker, die edle Zescher,
doo sieht ma‘s Geld uff eire Dächer.
Grieß herzlich Leit die niemols faschte,
die reiche Wärmepumpe-Kaschte.
Den grouße Klasseunerschied,
erkennscht om Haus, wu‘s jeder sieht.
Dämmung, neije Fenschter, neies Dach mit Solar un Speicher, Wärmepumpe,
Wallbox, Elektro-Auto SUV, elektrische Fahrädder häwe die,
koscht 300 tausend, die gonz Galerie.
Wonn des alles hoscht, wäscht gfördert, bischt heilisch un klimaneutral,
ärmere Leit, bezahle grad sou die Miet un sin scheißegal.
Un die arme Leit, ich will jetzt net lieje,
wärn nimme in de Urlaub flieje.
Ich loss des jetzt emol sou stäin,
die Kerweredd muss weiter gäihn.
Wen isch net grieß, des sin die Verbrecher,
die dabbede Reife-Messer-Zerstecher,
die ledschd Woch hinne bei de Ongler om See,
Reife fum Kerwehaisl kabudd gemacht hawwe – gar net schee!
*******
Kerweredd 2024
Jetzat zu mer, ich haas Nils Drücker,
bin Parre un kohn Schlappeflicker.
Im Mountenbike-fahrn, do bin ich firm,
ich flieg ah noch mim Motorgleitschirm.
Ä Woikenischin gheiert, des häwisch ah,
die wunderschöne Annika.
Häb zwee Schwestern, als Woikenischinne sin die net faul,
isch brauch „Nerve“, wie en Schoggelgaul.
Auf Mundschenk nemm de Woi mol glei,
es muss emol getrunke soi.

Moin Mundschenk is de Florian Bauer,
ein Karoserie- un Fahrzeugbauer.
Is Adler-Monnem-Fan, en gonz versierter,
alte Autos restaurierter,
fährt mit ma Fahrrad, sou musses soi,
er schenkt mer gonz präzise oi.
Mer zwee warn erschter Kerweborscht,
mer wisse dieses Omt macht Dorscht.

Hemsbachs erschter Borscht stäiht hier,
ein „Womanizer“, en Kerl wie en Stier.
Jan Vondung is des Johr de Borscht,
voll im Saft un ausgedorscht.
Mer drei sin Hemsbachs Leitkultur,
sin alle drei ä Frohnatur,
wär die Menschheit sou wie mer,
wärs Läwe schee un niemols schwer.
Hemsbach brauch uns in der Noud,
ohne die Kerwe, wär Hemsbach toud.

Auf Mundschenk schenk uns ohna oi,
es muss emol getrunke soi. Prost Gemeinde!

KERWEFRIEDE
Hemsbach „ich“ konn dir was biete,
„ich“ bring der heit de Kerwefriede.
Ich konn eisch Hemschbäscher erläise
vun eijerm Schwermut, eijerm bäise.
Häb iwwaläigt un rescherschiert,
häbs Schulproblem re-la-ti-viert.
Wie domols dem Albert Einstein – sou is mer‘s kumme,
120 Millionen Koschte, ich relativier eich die Summe.
Wissenschaftlich betracht, was die Fakte betrifft,
im Bildungszentrum gibt‘s gar koh Gift.
S’gibt Gase dohinne, un die kumme im Moor,
gonz natürlich normal imma wier vor.
Wer im Moor baut, un des muss ma wisse,
der iss schun speziell, vielleicht a gerisse?
Frieher de Schulzweckverbond, awa des waas ma erscht heit,
der war domols bestückt mit besondere Leit.
Doch moin Blick geht nooch vorne, ich sag’s eisch gonz korz,
des Moor unnam BIZ entlässt Methangas als Fortz.
Isch fortz jo als ah, macht eisch konn Kumma,
awa Giftgas, des is e gonz onnari Nummer.
Des Grundwasser ums BIZ, seit 35 Johr werds unnasucht, jetzt kimmscht du,
kein Gift weit un breit, schunscht wär die Schul schun long zu.
Vor dem Freidenberg-Gummi im Unnagrund,
muscht doch koh Ongscht hawwe, wie vor me bissische Hund.
In Hemschbäscher Nacht-Tisch – Hetero, Bi orra Schwul,
do liegt doch ah Gummi, wie unna de Schul.
Kerweredd 2024
Des macht uns koh Ongscht, no des macht Freude,
alle Hemschbäscher Parre, saare des heute.
Moi Kerweborscht versichern, uns Schlaue un Doofe,
sie heen schun ä Nacht long, mit Gummi druff gschloofe.
Un drotzdem was ä goußes Glick,
is alles gsund om beschte Stick.
Alla macht eisch kohn Kopp meh um eier BIZ,
e normali Sanierung des longt, ohne Witz.
Renoviert ma die Schul, eirer Kinder zum Wohle,
mit Hemsbächer Hondwerker, un net schwarz mit de Pole.
Schulzweckverbond, du hoschts prowiert, gekämpft un geprahlt,
awa der Sauschwoob in Stuttgart, hot die nai Schul net bezahlt.
Wie naiv muss ma soi, ich sags gonz gequäilt,
wonn ma denkt, dass der Schwob de Schulbau bezäihlt.
Ich verkünde eisch jetzat, es iss mer ä Freude,
blous 40 Millione, des longt fers Gebäude.
Un unsan Boijemoschter, der schlaue,
muss sich halt ä kleneres Denkmal baue.
Ich häib moin Becher des koscht nix,
un trink uff unsa Schul, des BIZ!
Kerweredd 2024

GASTROSTERBEN
Wu frieher die „Alt Palz“ mol war,
wachse Brombeern wunderbar.
E Symbolik, die ohm traurisch stimmt,
Wertschaft zu un nix mäij kimmt?
Jingschdes Beispiel steht bevor,
de Watzenhof schließt Tür un Tor.
Ein Kleinood drowwe in Balzebach,
hot ab Oktober Ruh unnerm Dach.
Die Jillandy mit ihrm Werschdelstond,
die is schun fort, es is allerhond.
Awwer wer wills bestreite, Gastro is hart,
vor allem wonn kohns kimmt aus de eigene Stadt.
De Herrmonnshof hot seit 4 Woche uff,
es Kochemer hot en stramme Max jetz druff,
in de See-Terrass driwwe is jeder willkumme,
werschd uff de Arche fum Noah mitgenumme,
de Tennisclub hot ah wier en Pächter,
es kennt uns sou gut gehn – vielleicht ah schlechter. (?)
Awwer hauptsach gemault un ah gschennt,
dass mer Esse ah preiswerter ohbiete kennt,
dass de Nome nix is oder was waas donn isch,
seid bloß ruhisch, isch konn se nimmäij heern die Sprich!
Donn bleibt halt dehom un babbelt eisch satt,
isch bestell mir später erschdemol e Schnitzelplatt.
Mer misse in die Wertschafte un alle unnerstütze,
schunschd duts gräischde Ohgebot gar nix nütze.
Wonn se all zu hawwe, werd wier gejommert wie laut,
un depressiv dehom on de eigene Dischplatt gekaut.
Drum heert uff zu maule un nemmt die gonz Bloos,
die Kisch bleibt kalt, mer esse auswärts gonz groß.
Gäiht mol wier fort, seid net so dumm,
mer derffe all wier – Corona is rum!
Auf Mundschenk, schenk oi uff die große Küche im Ort,
hoffentlisch sin se net ball all wier fort!

GIGA-BAHN
Mit de Bohn, do hot mers net leicht,
selten werd e Ziel pünktlich erreicht.
Stehschd uff Gleis 3 fährder uff de oins,
un des om beschde glei um sechse moins.
Donn quäle se uns mit allerhond,
Baustellepläne – schoinz ohne Sinn un Verstond.
Es Großprojekt Riedbohn zieht soi Kreise,
mutisch is seller, wu begibt sisch uff Reise.
Zwische Fronkfort un Monnem alles gestört,
weil nix mäij wie gewohnt verkehrt.
Zwische Fronkfort un Monnem, Schienenersatzverkehr,
isch kenn do zwee Strooße, do isses net schwer!
Die Kaiser- un die Lupinestroß,
de Verkehr is dort famos.
Als Ersatz, so hot mer sisch gedenkt,
wern mit Busse die Reiseström gelenkt.
Extra un eigens musste se rekrutiern,
Busfahrer wu die Passagiere schoffiern.
Erkenntlich is de Ersatz on lilane Schilder,
oder gleischfarwische Gehweg-Uffkleb-Bilder.
Stehschd quasi om Bohnhof un waaschd net wu hieh,
guggschd entweder nuff oder ah abwärts de Knie,
siehschd de lilane Wegweiser, geh als hinnerher,
zum rettende Schienen-Ersatz-Verkehr.
Ende Juni war alles beschildert un beklebt,
so saudeires Zeig, wu ah 5 Monat hebt.
Bleed war halt nur, un des is kohn Scherz,
de gleischzeidische Baubeginn fun de Giganetz!
Die lege bekanntermaße Glasfaser in de Erd,
wozu die halt zwongläufisch uff gemacht werd.
Beim Loosmonn vorne wars als erschdes zu sehn,
fum Bohnhof aus sollschde dort hieh gehn,
es Trottwaar war für nur wenische Stunne,
mit em lilane Uffklewer verbunne.
Ma munkelt, awwer des waas mer net,
ob die Giganetz des als Grabungsmarkierung k‘halde hätt.
Fer die Verlege-Arweide, sou hot mers gsehn,
musst e Subunnanehme in die Umsetzung gehn.
Die Vorankündischunge zu spät bei de Besteller,
de Subb‘ler macht die Strooß uff, tausend Mol schneller.
Wonn de net uffgebasst hoschd, isch sags net so laut,
hawwe se um siwwene moijns de Gehweg vor de Oifahrt abgebaut.
Un es vorhandene Gas- un Strom-Leitungsnetz,
is eher egal gewesst – des is kohn Scherz.
Om End bleibt fer uns offe, awwer voll,
ob mer die nägschd Zeit net liewer mim Auto fahrn soll.
Isch trink uff de Hons-Gugg-in-die-Luft – mit Kuss,
isch waas ohns, der kriggd soin Bus!
Allerdings hot so en Hons wiederum des Problem,
wonn die Absperrunge fun de Baugrub net rischdisch stehn.
Prost!

BACHGASSEFESCHD
Wonn mer ohns kenne, isch brauchs eisch net saare,
donn isses feiern mit Herz, Kopp un Maare.
Zum Woifeschd war’s wier schee, ungeloge,
des Johr hot ah kohns en Stecker gezoge,
un grad erschd war wier unser Bachgassefeschd,
Ohgebot un Stimmung war’n gar net schleschd,
üwwer die Uhrzeite konn mer wahrlich streite,
frieher war früher, un heit is halt heute.
Mer munkelt, awwer gonz genau waas isch’s net,
dass mer de DJ gebucht, die Ohlag awwer vergesse hätt.
Obwohl des im Vorfeld onnerschd geklunge,
hawwe se sisch noch en Ehrebachgässler abgerunge.
De Aschemonns Lars, der wurds uff die Schnell,
herzlischen Glückwunsch on derre Stell.
Unsern Boijemoschda hot wier onnern Termine kadde,
do stand halt dem soin Vertreter driwwe uff de Matte.
Zur Eröffnung, un des is so Brauch – frieher wie heit,
stäit e Fass Freibier zum Ohstich bereit.
De Hertingers Ernschd voller Tatedrong,
nimmt Hommer un Hoahne, faggeld net long,
schläischd energiegelaade, des hoschd noch net gsehn,
uff de Hoahne druff, als deed die Welt unner gehn.
De erschde Schlag, nix is bassiert,
Nummer zwo un drei wern ohvisiert,
Schlag vier erfolgt, de Deggl fliegt weit,
mim sechste Schlag, do wars ferddisch ehr Leit,
de Hoahne war hieh, es Bier schießt, awwer net in de Krug,
em Hertingers Ernschd wars do grad genug.
Letzendlisch hotter’s wie’s Wetter gemacht,
fum Himmel is jo ab middags de Räije gekracht.
Nur gut, dass sunndags zum Picknick do hunne,
die Elite bei Sonnenschein hot zomme gfunne!
Auf Mundschenk, jetz trinke mer, un des mit Segen,
uff em Hertingers Ernschd soin Bachgasse-Bier-Regen!

SANITÄR-EIS
Seit Mai, ihr habt des alle gsehn,
is unser Alleestroß wier wunderschön.
Die Bäum musste all fort, es Klima egal,
jetz is die Fahrbahn mit de neije derre Bäum nimmäi so schmal.
Mer konn wier raase mit Schwung, es is net schwer,
fun de Londstrooß, bis direkt in die Feierwehr.
Während de Baustell war – wie solls soi,
gsperrt – kohns kimmt mim Auto naus oder roi.
Freidaags eröffnet, mer durft die Stroß wier befahrn,
en Honderwerkerbus is noi fers Belade – voller Elan,
schnell noch ins Büro, die Babbiern sortiert,
hot en gonz onnere soin VW-Bus in die Alleestrooß laviert.
Gonz dringend zu Kunde hott der gemisst,
schoinz so in Eile, dass mer was wischdisches vergisst.
De Deifl is e Eichhörnsche – ah bei dem Held,
der hot wohl soi Hondbrems net rischdisch feschdgstellt,
de Bus is gerollt, ihr kennts eisch denke,
drin war kohn Fahrer, der heed kenne lenke.
Bis on die Schloßparkstroß bewegt sisch de Bus,
bis ihn dort ein Hindernis stobbe muss.
Des Hindernis, es is gar net schwer,
war es Beladungsfahrzeug fum Fachbetrieb Sanitär.
Es dut en Schlag un die Hondwerker-Fraa mohnt,
des is sischer die Stadt, die die Schilder fort rohmt,
„Gonz sischer net!“ sou sagt ihrn Monn,
weil des freitagsmittags, net die Stadt soin konn.
Naus uff die Gass, kimmt fun owwe ohner gerennt,
die zwo hawwe sisch schun vorher gekennt,
gonz owwe warer in de Strooß verpflichtet,
is soim Bus noch hinnerher gehechtet,
hotts awwer net gschafft, war zu lahm fer den Kaaarsch,
jetz is halt de Transporter fum Honderwerker om Arsch.
Isch trink uff Strooßebau un eisische Zeite,
uff Hondbremse un Sanitär – ohne Einzelheite.

VOLKER-PAULI-PLATZ
Traurisch blicke mer zurigg un sehn,
drei Hemschbäscher Originale musste gehn.
Als erschdes ging de Moose Felde ,
donn net long druff, die Dugimonts Hilde.
Zuledschd, de Schmerz sitzt rischdisch tief,
de Hergott unsern Pauli’s Volker zu sisch rief.
De gonze Ort is noch immer arg betroffe,
sin die drei zomme doch fer unsern Dialekt Werbung geloffe.
Im Mai kam unser Verwaltung uff die Idee,
so e Strooß mim Volker soi‘m Nome wär schee.
Der Gedonke kam allerdings in ‘me Gewond,
pietätlos, ohne Sinn un Verstond.
Bekonntlisch steht driwwe die alt Beltz-Druckerei,
on dem Gelände führt die Carl-Benz-Strooß vorbei.
De Beltz is Geschichte, die Halle solle fort,
gedruckt werd schun long onnemme onnare Ort.
E neiji Bebauung is dort ohgedacht,
im Rothaus en Idee-Wettbewerb entfacht.
Die Pariser Nummerierung isses Gebot,
im aktuelle Zustond awwer aus em Lot,
des Nummerierungs-Debakel lässt nur ohns zu,
der Strooßeteil beim Beltz muss onnaschd haaße, donn is Ruh.
E Abfallprodukt, so kennt mer vermute,
gibt dem Nome en Platz, en guude.
En Platz awwer, so hot Pro Hemsbach im Gemoinderat erklärt,
wär viel rischdischer, die Strooß wär verkehrt.
De Rothausplatz sollt soin Nome traare,
musst er sisch doch mit de Sanierung rumschlaare.
Verwaltung un Gemoinderat sin sisch net grieh,
vertage die Thematik wuonnaschd hieh.
Isch saags eisch, wonn unsern Altparre Volker des erlewe deed.
So e dabbisches Gemeggl heed der arg verschmäht.
Entweder mer würdischd jemond ordentlisch un ehrlisch,
oder mer lässts grad bleiwe – Abfallprodukte sin do entbehrlisch!
Auf Mundschenk, jetz trinke mer in ohm Satz,
uff de Volker Pauli – egal ob Strooß oder Platz!

BAUVORHABEN
Es werd gebaut, die Stadt hot Geld,
Hemschbach, dir gehört die Welt!
Drowwe, Dank Lond, strahlt die B3 gonz adrett,
fun Sulzbach bis Laudebach mit neijer Fahr-bohn-deck.
Die Arweide, fum Zeitplan nur wennisch verzögert,
hawwe fer Verkehrschaos gesorgt un monsch ohns verärgert.
Die Busfahrer hawwes als net genau gewisst,
un ah mol aus Versehe dorsch die Gaadestroß gemisst.
En Lkw wollt dorsch die Frankfurter Strooß,
stegge gebliwwe, die Uffregung groß,
üwwer de Feldweg die Autos, was war des en Krom,
bei so Bauarweide bleibt mer besser dehom.

Net weit weg, beim Deckert drowwe geht’s gar net weiter,
steht de Bau still, sieschd gar koh(n) Arweida.
Die Penny-Markt-Gänger uff ihre Reife,
fahrn schun seit Monate dort die Warnbarke-Schleife.
Ob der do drowwe, mer babbelt im Ort,
wohl e Dauer-Abo fer die Stroßesperrung hot?

Om Minera-Gelände, de Dauerbrenner on de Autobohn,
gibt’s endlisch e Lösung un en neije Bebauungsplon.
Do hab isch net schleschd geguckt beim Zeitunglese,
is doch die Redd funneme Drive-In-Bäcker gewese.
Wonn nämlisch die Mutter-Kind-SUV-Flotte fers Friehstigg unner de Woch,
net aus’m Karsch aussteige muss, schließt mer e Bedürfnis-Loch,
un ah fer die, die sunndags im Schloofohzugg sin,
wär so en Drive-In-Bäcker en eschde Gewinn.
Isch bin bloß om Staune un kriggs net uff die Reih,
muss donn des alles wirklich so soi?
Mer hot doch Fieß, un meischdens ah gsund,
ehr Leit seid so gut, un laaft halt e Rund!
Oder machts wie isch, seid net so malaad,
stellt eisch net so oh un schwingt eisch uffs Rad,
Mundschenk mach mer mol was in moin Krug,
fum Baue hab isch awwl grad genug.
Kerweredd 2024

REISELUSCHD UN KOFFERFRUSCHD
Wenn einer eine Reise tut,
gäit des als noch long net gut.
Grad wonn Hemschbäscher verreise,
bassiert alleweil viel Sch..(eiße).
Schun vor 10 Johr war mer net gewiss,
dass uff Reise alles in Ordnung is.
Grad wonn de Flug üwwer Heathrow fiert,
konn’s gut soin, dass mer soi Gepäck verliert.
So im Friehjohr bei ‘me Flug nooch Üwwersee,
die Umstände vorab warn gar net schee,
gestreikt is worn, de Flug vertagt,
die neij Routeführung sehr gewagt,
fun Fronkfort, nooch Hamburg, donn Heathrow bis Hong Kong,
27 Stunne faschd ohne Schloof – des is schlimmer wie long.
Om Zielflughafe samstags es Chaos om tobe,
de Koffer hot seller net fum Bond gehowe,
der war nämlisch fort, Recherche ergabe,
den hawwe se in Fronkfort gar net oigelade!
Der arme Kerl mim Hondgepäck ins Hotel,
Ersatzklamodde kaafe wollter schnell,
awwer die Konfektione in Fernost sin onnerschd wie do,
genau zwo T-Shirts hotter gfunnde, was warer froh.
Dienschdags donn kam zu ihm de Sege,
es Gepäck hot uff soim Zimmer gelege.
Ja werd ihr saare, des bassiert e mol,
unlängschd hotts onnern ähnlisch getroffe – uff eier Wohl.
Die onnern, die warn schun vor 10 Johr betroffe,
un ah ledschd Johr isses net sou gut geloffe,
awwer des Johr, des war halt de Hit,
zu dritt gereist, nur zwo Koffer sin mit.
Die Dreiergrupp nooch Görnsey fliegt,
koh Sau waas, dass des im Kanal drin liegt,
fun Fronkfort per Heathrow, Gatwick zum Ziel,
oohner fun de drei frotzelt derweil arg viel,
ob des fer die onnern zwo ausgeht wie schunnemol,
dass irgendwas bleed leeft, des wusst der wohl.
Die Männer onns Kofferband, die Fraa musst uffs Klo,
kimmt raus, is erleichtert un gonz arg froh,
Kerweredd 2024
guggd in zwo Gsichter, mit Ohsponnung voll,
„irgendwas stimmt net“ denkt sich die Fraa Kroll.
Ihrn Monn steht mit zwo bunte Koffer vorm Bond,
de onner guggd stooisch uffs Gepäck-Förder-Bond,
Bewegung war aus un druff war nix,
longschd halt e mol de Katz on die Bichs.
Ihr habts verstonne, es Gepäck war abhande,
dem Frotzler soi Nerve, die warn am Rande.
Ah der war nur mit Hondgepäck ausgstattet,
hot uff Hilfe fum Flughafepersonal gewartet,
nix war zu mache, ab ins Hotel,
unnerwegs Hygieneartikel besorgt gonz schnell,
moijens druff genervt Klamodde gekaaft fer 3 Daag,
Handynetz ah noch scheiße, was om Betreiber lag.
Die Rezeptionistin, unserer Sprache mäschdisch,
fand die Airline ohnehin sehr verdäschdisch,
der Gepäcklose awwer koh Zeit verliert,
hott üwwer die Umständ glei die gonz Insel informiert,
un on Daag 5 noochem erschde Schreck,
meldet es Hotel „es is do, ihr Gepäck“.
De Koffer war völlisch verfronnst un zerstört,
de Concierge/Portier hot trotzdem gewisst wem er keehrt.
Der war froh, alles war wier gut, –
wonn ihr reist Leit: seid uff de Hut!
Isch heb moin Krug uff Heathrow-Reise,
un grieß jetz eher laut wie leise,
die zwo Globetrotter Gauch un Müller,
die Kofferverluschd-Reise-Knüller,
es nägschde mol fahrter mim Auto oder mim Zug,
es Gepäck is om Monn, erlewe konnschd trotzdem genug!
Proschd!

SILVERSTARS
Im Rothaus, ihr werd des kaum glaawe,
is ah vor de Kerwe die Reitschul om Trabe!
Was do drin abgeht, basst in koh Redd,
mit Ende om Kerwe-Sunndag zumindeschd net.
Do is Fluktuation, es is net zu fasse,
konnschd beim Zuhörn – nur erblasse.
Jetz is im Regebogeland mol Ruh,
war‘s Standes- un Friedhofsomt wochelong zu,
die Sekretärin fum BM war vor de Ooschdan plötzlich fort,
bis heit hoggd die fum Pauli’s Volker wier on dem Ort.
Fer es Sachgebiet Schule un Kinngärdde hot mer gewieft,
die alt Schillerschul-Sekretärin uff e frej-i Stell gehieft.
Die zwo sin schun long in Rente misst ihr wisse,
es find sisch schunschd kohns – is des net beschisse?
Zu de Wahle kam wier de Junge Bernd her,
im Ordnungsomt isses schoinz ah gonz schäi schwer.
Em Engeldorfers Karl lässt mer genauso koh Ruh,
macht regelmäßisch im Archiv Aktedeggl uff un zu.
De Lars fum JUZ is grad fortgonge,
wahrschoinz wars em Winkenbach do ah korz Ongschd un Bonge.
Was is donn des froog isch misch grad,
is der Lade, so malaad?
Warum will kohns mäi im Rothaus schaffe?
Do konnschd bloß dumm aus de Wäsch raus gaffe.
Ear Leit warum renne die all weg,
hawwe die do drin Schimmel in de Deck?
Es helfe weder Bike-Leasing noch e Fahrkardd‘ – so als Tipp:
ehrlischi Wertschätzung un echtes Teamwork sin grad hip.
Wonn des so weitergeht, is noch mäjner zu wie uff,
un do mohnschd, du hoggschd rickwärts uffem Silverstar druff.
Auf Mundschenk, jetz trinke mer uff de Schimmel fum Omt,
„alter Mann hilf uns“ – es Rothaus is kronk!

STADTRATSSITZUNG
Im März do hab ich gedacht mich trifft de Schlag,
ich seh die Tagesordnung fer die öffentlich Sitzung fum Gemoinderat.
Do warn zwe Punkte die viel Uffsehe errege,
un uff jeden Fall en haufe Bürger bewege.
Do frog ich mich wie die uff dem Omt so schalte,
wolle die wie gewohnt doch die Sitzung im MAX abhalte.
Noch dezu soll de neie Feierwehkommandont vorgestellt wern,
geht halt glei in die Michel-Hall, un benutzt eier Hern.
Tagesordnungspunkt 6 → Unterbringung von Geflüchtete, Standort für eine Containeranlage.
Des Thema wurd awwer fum Regierungspräsidium noch vor de Sitzung erschlage.
Container uff die Rohrwiese, wo donn knapp 100 Mensche noibasse solle.
Ich sag eich, der Gedonke war kohner fun de gonz Dolle.
Vom Regierungspräsidium aus, do heeßts gonz stumpf,
die Fresch misse wondern, fun de B3 in de Sumpf.
Punkt Nummer 7 uff de Tagesordnungspunktelist,
es geht mol wia um die Michel-Hall un wie diese zu sanieren ist.
Des Thema war schun bei re Sitzung im Dezember ohgeklunge,
awwer scheinbar hot des Ergebnis im Rothaus kohner gut gefunne.
De neieschte Oifall, do kimmt mer es Graue,
wolle die fa große Sportereignisse die BIZ-Hall umbaue.
Anstatt glei die Michel-Hall ordentlich zu saniern,
will ma fa wenisch Geld im BIZ erschtmohl e Tribühn installiern.
Geld in e Gebäude zu stecke, des ohm eigentlich gar net gehert,
die Idee dodehinner, die bleibt mir irgendwie verwehrt.
Glei zwe Sai dorchs Ort getriwwe, es wär eigentlich zum Lache,
do frog ich mich als normaler Steuerzahler – un ah als Parre,
konn ma sich do net vorher schunn Gedonke iwwer die Umsetzbarkeit mache?
Doch uff ohns kommer sich verlosse, des waas ich genau,
des sind klar denkende Hemsbächer Bürger, un die Leit fum TV.
Jetzt en neie Ohlauf, mim nei gewählte Stadtrat, do krigschd grad die Kretz,
jetzt solle die Container newer de Alla Hopp uff die Tennisplätz.
Liewi Stadtverwaltung mir schlägts uff de Maare,
Mensche hoggd mer doch net in Containerohlage!
Ich trink uff Hemsbächer un Halle un Hürde,
vor allem awwer uff Menschenwürde!

PYRO-NEDZA
Im letschde Oktower, do isses geschehn
was genau, wärrd ehr glei hearn, awwa net seh’n.
Bei de Hellesema ging die Kerwe los,
desmol mit Umzugg, riiiesegroß.
Hemschbach debei, des wär jo gelacht,
mer vaspreche, dass es knallt – un nur so kracht!
Parre Henrik begeischdert, fraat sisch wie Hund,
bis dann des naie Umzuggs-Regelwerk kummt.
Pyrotechnik is g’strischde, was en Skandal,
so manchem stinkt des – un Ohnem total!
Die Parade ging los, die Stimmung gedrückt,
bis dann ohn‘s plötzlich soi Kriegsarsenal zückt.
Der in Schwarz sagt “Loss bleiwe, mer sin umstellt“,
der in Weiß jedoch – sein finanzielles Todesurteil fällt.
Die Gendarmerie im Nacke un ah vorne in Sicht,
moohnt der Kerl kalt “Des geht uff mich“.
Wie de Deifl hot der soin Krempel platziert,
un prompt e Armageddon-Szenario inszeniert.
S’hot geraacht, geblitzt, g’florre sin die Funke –
korz druff kriegt’er vun de Bolizei gewunke.
Paragraf „So-un-so“, Absatz „Such-da-was-aus“,
hole se mol ehr’n Personalausweis raus.
Vun Frohsinn geprägt un e Grinse im G’sicht,
verhandelbar war die Sach jedoch nicht.
Glick g’hatt – in de Knaschd musser net,
doch e Stroofohzeig kimmt – un zwar rischdisch fett!
E dreivertel Johr später, s’war schun vergesse,
kam die Quittung, an des Zündlers Adresse.
Noochem uffmache schluckt er, es is net zu fasse,
mit üwwer 1000 Eurone, wärd’er gebeede zur Kasse.
E Bild vun dem Wisch macht die Rund, schun wars geschehn,
dun die Hellesema mit’re Spendeaktion in de Startlöcher steh’n.
Vier Stunn späder, ma will’s faschd net glaawe,
wurde schun üwwer 300€ zommegetraare.
1000€ – Stand jetzt – sin in de Kass gelond,
so viel Gas wie der hot – do schlägschd de Kopp an die Wond.
Bei dumme Ideen, so lautet mein Rat,
steht de Nedzas Andres, als Experte parat.
Mit dem als Sündebock, ehr werd schun sehn,
kennt jeder e Ordnungswidrigkeit begehn.
Uff de Pyromane Nedza trink isch jetzt was,
uff Feierwerk un quasi Staferlass.
Prost!

PETER KAIN
Im Onglerveroin issa, des waas isch genau,
ein Urgestein vum ASV.
Die Ongler, backe fa Hemsbach, zwee mol im Johr Fisch,
un – unsan Held, der backt‘n dort frisch.
Der coole Typ, werd nie nervees,
Karfreitags on de Fischfritees.
Zweehunert Leit stäihn in de Schlong,
er backt die Zonder mit de Zong.
Kerweredd 2024
Om End vum Dag sin alle satt,
de Päida hot ä Vorbild katt.
Er hott jedoch koh Fisch vermehrt,
on Galilä-a denkscht vakehrt.
Die Ongler kaafe en Haufe oi,
mer fresse alles zomme noi.
Donn das Wiesensee-Wunder beim Veroinsongle fum ASV,
warn sä voll orra nischtern? Kohna waas es genau.
Der Koin wollt iwwas Wasser gäihn,
sou wie soi Vorbild, des muss gschriwwe stäihn.
Mit voller Onglermontur lag der in de Brieh,
zum Glick nix passiert, awwa jeder waas wie.
Nass wie ä Katz om Ufer, do stäi ra,
unsan liewe Koine Päida.
Bei de Ongler om Stommtisch, vazäile se offe,
de Päida wär siwwe Schritt weit iwwas Wasser geloffe.
Auf Mundschenk, Woi, noi des is geil,
uff dich moin Päida – Petri Heil
SCHLUSS
Jetzt bin ich fertig ehr Hemsbäscher Leit,
un geb eisch mit ‘me Gebet Geleit.
(Alles in Gebetsstimmung)
Mer warn in Monnem , – warn in Paris,
om Berling drowe, – uffm Bach soinrä Wiess.
Awa s`beschte war, – im gonze Läwe,
die Hemsbächer Kerwe!
Mer trinke de Schnaps, – vum Grinnewalds Paul,
mer sin sou hart , wie de stohnane Gaul.
Awa s`härtschte is, – im gonze Läwe,
die Hemsbächer Kerwe!
Kerweredd 2024
Ich ess sou gern, – Kartoffelbrie,
die griegt koni, wie die Modda hie.
Awa ‘s Beschte iss, – im gonze Läwe,
die Hemsbächer Kerwe!
Mer gäihn im See, nachts naggisch bade,
mer grawe oh, mit unsere Spate.
Awa ‘s geilschte is, – im gonze Läwe,
die Hemsbächer Kerwe!
(Normale Rede / Hände hoch)
Der Thomas Michel behüte euch,
der Abele’s Karl lasse sein Licht leuschten über euch,
un de Kronauer’s Hoinz gebe euch seine Sesche.
Gehet nun hin in Frieden und fürchtet euch nicht, wenn euch einer abgeht,
denn es werden euch im Leben noch mehrere abgehen.
Fürchtet euch aber auch nicht wenn sie kommt und schreit,
weil donn isse soweit.
Gebt ihr Nodel un Fade un sie wird den Abgegangenen wirra drohnähe.
Wonns zu long gedauert hot, donke fer eier Geduld,
wonn sich ohner äjert, donn isser selwer schuld.
Es waas jeder Hemsbecher, die sinn jo net dumm,
was in de Kerwredd steht, des nimmt mer net krumm.
Des war’s fun eierm Parre, ihr habt all moi Gnade,
kennt jetz uff die Jubiläums- Kerwe im nägschde Johr waade!
So steig isch zu eisch nieder un will misch erbarmen,
feiert unser Kerwe – in Ehwischkeit AMEN
Wem ghert die Kerwe …
Fum Nawwel bis zum …
Un der ghert ah noch …
Fürchtet euch nicht….